بالمصري الفصيح ..

بما إن الأستاذ " يوميات مضيف طيران " و الأخ العزيز، و المتابع لمدونتي بالرغم من صعوبة اللهجة الإماراتية و في كل مرة يحتاج ترجمة، قررت إني أترجم اللهجة هههههه .. 

و المسكين هو بيحاول إنوا يفهم لكن مفيش فايدة هههههه، مش بس إنت كتير زيك، و على فكرة موضوع " الخيبة " كتار اللي مافهموش إيه ياعني الخيبة و العسرة " العثرة " بالمصري تتحول العسرة هههههههه ... 

بس إن شاء الله حترجم كلامي مصري بعد كل موضوع أو حديلك المختصر المفيد .. 

و الله ما بتريأ عليك، لكن أنا لاحظت مش بس إنت عاوز ترجمه، غيرك كتير عاوز ترجمه هههه .. ف عشان كده حترجمه مصري، أحلى من العربي شوي تغيير .. 

إيه رأيك في لهجتي المصرية و لهجة المدونين اللي بيردوا عليه 

إزيكواا يا حباااايبي .. عاملين إيه .. 

الخيبة

ما أحب هالكلمة أبدا و توابعها 

الخيبة ..

و العثرة ..

ول عليج ..

أبا أعرف هالكلمات ليش موجوده عنا في قاموسنا الإماراتي، و يتم تداولها وااايد .. 

ما أداني يوم أرمس وحدة و أقولها مثلا نشيت اليوم الساعة 6 تقولي الخيبة شو يوعيج هالوقت، شو كالفنج ؟؟ 

و الله أنا هاي حياتي أنش متى ما أبا و المشكلة أحس هالكلمة تكسر الواحد أقوى حتى من العين ههههههه كل ما قلنا شي قالوا الخيبة و العثرة .. !! 

أنا ما أقولكم ما أقول هالكلمات، طبعا " ول عليج " ما أقولها و لا إطيح لساني لكن أقول ساعات الخيبة  والعثرة بس في حالات معينة، يعني مثلا وحده يت و دعمتني لا إرداي بقول و الخيبة .. 

أذكر مرة وحده مرة قالتنا و الخيبة عقب ما ردينا من العمرة و كنا بنسير الشرقية عقبه بكم من يوم جان تقولنا و الخيبة توكم يايين شو يوديكم و تخيلوا تكنسلت الرحلة هههههههههههه .. 

أنا أصلا طبعي أزيغ من أي حد يقولي كل شوي الخيبة و الخيبة .. 

و الله لاعت جبدي يوم ناكل قالولنا الخيبة تسرطون و تظعفوون ههههه

و يوم نلعب رياضة قالوا و العثرة ما تتعبون ههههههه

و يوم نرقد من وقت قالوا الخيبة دياااايه شو يرقدج ما عندج شغل هههههه 

أبا أعرف شو يرظيهم هالناس .. 

و هالكلمة العلة على قلبي .. 

أفففففف أكره هالكلمة 

أبا " SHAKE SHACK "

نص الليل و مشتهيه آكــــــــــل شيك شاك و ما أبا آكله .. 

أحلى برجر كلته في حــــــــــياتي .. و توه يديد مفتوح يمكن الحين كمل شهر مفتوح في إمارات موول .. 

بس شو لذيــــــــــــذ لو أمدحلكم إياه من اليوم لين باجر ما بخلص ههههههه .. 

بحطلكم صور بالضبط نفس اللي يسونه هني .. و هم عندهم أونواع برجر بس الأغلبية يطلب شيك برجر ..  أنا مصورة من التلفون بس مضيعه الواير ف مدوره صور نفس اللي موجود عنا في دبي 

أهم شي إنك تطلب و تسير تيلس لين ما يهتز الجهاز .. و الله أريح و الزحمة تخف، بس على هذا كله وااايد زحمه عليه .. 

ما أعرف ليش عيبتني صينيتهم ههههه، أحسبها صغيرة و خفيفه و حلوة، و شفتو كيف البرجر بالضبط نفس الشي..

أنا ما أحب، آكل لحم من برع، أصلا ما أدانيه لكن هذا لذيـــــــــــذ خبزتهم غير، هم يسوونها، الجبن غير اللحم غير، طري لذيذ يذوب في الحلج السندويش بكبره لذيــــــــــــــذ ..  و لو أقولكم وااحد ما يشبع ما بتصدقووني، أنا أول مرة كلته، و لد خالي قالنا واحد تراه ما يشبع، و صدق عقب ما كلته بغيت واحد ثاني .. و مرة أنا و بنت خالو خلصنا من النادي سرنا كل وحده فينا طلبت 2 .. ما بغينا وجبة بس نبا البرجر، كلت الفرايز ما عيبني واايد، و الفرايز مالهم عليه جبن، .. بس البرجر و الله لا يقاوم، حد بتشوفونه ياكل 3 من كثر ما هوو لذيذ، و ما بتصدقووني لين ما تجربووونه و تاكلوونه .. 

و الفرايز مالهم جي شكله، ذكرني ب مال أو، بس حد عيبه، لكن أنا حسيتبه عادي ..




و الله يخلي الشايع دوم يفتح أشياء حلوة عنا ههههههه

سوالف

تولهت على هالمكان، من سويت البلوق الثاني و أنا لاهيه وياه، و مسويه طاف حق هالبلوق المسكين .. !! والله صدق مب عارفه أوفق بين ثنين صدق يوم قالوا صاحب بالين جذاب، الله يعينهم اللي ياخذون أكثر من حرمة ههههههه .. حسيت فيهم الحين .. !! حتى عفان الله إستويت ما أرد على حد بس أقرا .. 


المهم شحالكم و شخباركم .. علوومكم ..؟؟ 




بخبركم شي إستوالي الإسبوع اللي طاف و إستغربت منه .. 


الإسبوع اللي طاف ما شاء الله دبي كانت كلها سعودييين ما شاء الله، عشان إجازتهم، و طبعا لا يقدرون يسافرون مصر و لا سوريا و لا البحرين ف الحل الوحيد دبي المنقذ ههههه .. و الله غمضوني بس، الفنادق لعبوا لعبتهم، و يعرفون إنه الأوضاع الأمنيه في الدول الثانية مأساه ف إستغلوا الفرصة و رفعوا الأسعار .. قاهريني ..  !! 


و الشي اللي كنت مستغربه منه، كنت سايرة النادي، و هالنادي اللي أسيرله عبارة عن نادي و في نفس الوقت في مكان للفنون و سبا و الحلو فيه يطل على البحر و مسكر و للنساء فقط المهم كنت أمشي ويا وحده أعرفها من زمان شفتها صدفه في النادي و كلاسي يبدأ 5:30 و كلاسها هي نفس الوقت ف قلنا خل نتمشى على البحر .. لين ما يبدأ الكلاس .. 


سرنا نمشي، و ما شاء الله السعوديين كانوا في النادي و إستغربت كيف عرفوه لأنه أنا من سنين آي هالنادي و من دول الخليج ما شفت حد إيييه إلا العايشين في دبي .. 
ف المهم سرنا نمشر، ف يتنا أم سعودية، وااايد حبيتها، تعرفت علينا و سألتنا إذا نحنا من البلاد، قلنالها هي .. !! 


و هذا أول سؤال دايما اللي يبغي يكلمنا ما أعرف ليش يقولوولنا إنتوا من أهل البلاد؟؟ ههههه أحس لأنه محد يشوفنا فيتأكدوون قبل أو أشكال الإماراتيات صعب ينعرف هههه .. 


المهم تمت ترمسنا، و إنها مستانسه في هالمكان، و حليلها كانت يايبه وياها دلالها ويالسه ويا عيالها، و هم يتسبحون، فاللي إستغربنا منه أنا و ربيعتي، يوم قالت إنتو وين بتسيرون عقب النادي، قلنالها البيت، قالت ليش إنتو ما تطلعون، قلنالها نطلع، قالت شو يوديكم البيت أنا ظحكت، قلتلها شو نبابها الحواطة بسنا يايين إنطلع طاقتنا في النادي و مروحين، المهم تمت تسولف و ردت نفس الموضوع و قالت ما تطلعون الفليل تتعشون برع ههههههه و الله ظحكت وحليلها كيووت كانت، قالتلها ربيعتي إنها تطلع تتعشى برع في الويكند لكن أيام الإسبوع ما يناسبها، من الدوام للنادي للبيت ..  و ما أعرف ليش شكلها حاطة في بالها إنه يعني نحنا اللي في دبي، 24 ساعة برع ..
بس وحليلها واايد زينه و طيبة،  تنحب بس ماأعرف من وين من السعودية هي بالضبط نسيت أسألها هالسؤال ؟؟ 


بس هذا هو انا اللي لاحظته بالذات إذا حد يعرف إني من دبي يتحسبون أهيت برع البيت طول اليووم هههههههههه، ما أدري ليش مع إنه السياح اللي إيوون دبي يعرفون الأماكن أكثر عن أهل دبي .. هههههه يعني أنا ربعي ساعات الكويتيات ماشاء الله عليهم يحبون يستكشفون هذا أحلى شي فيهم، ساعات هو يقولووولي عن أشياء انا ما أدري عنها هههههههه .. 


يعني أنا أطلع لكن مب طول الوقت أنا في السوووق و مراكز .. !! 


يالله ما تعرفون شقى متولهه على هالمكان، أبا أكتب شي يسوي ظرابة في البلوق ههههه .. و الله إستوى ميت هالمكان .. كئيب أستغفر الله 

مبروك علينا الرحمة

و أخـــــــــــيرا مطر و رعد و برق، و مازاااااااااااال و إن شاء الله يتم ما يوقف يارب .. الحمد الله .. بس شي غريب هذا وقته، و نحنا مول مب متوقعين أصلا إنه إيينا شي خلاص الصيف .. بس الحمد الله لكن صوت الرعد يخوف .. يالله الحمد الله 

اللهم صيبا نااااافعا

بدأ التشجيع على الزواج من الثانية يا سلام سلم هههه

شوفوا عشان يعدلون نسبة المواطنين في الدولة، اليوم في الجريدة عن نسبتنا كأنه شي يديد بس يبين إنه تمهيد لهالشي، و من قبل نسمع هالشي لكن بدوا شوي شوي يصــرحوون، اليوم الرياااييل ا ما بيرقدووووون ههههههههه .. 

نقلا عن جريدة الإمارات اليوم .

الزوجة الثانية

أكد مدير عام هيئة تنمية المجتمع في دبي خالد الكمدة، ضرورة العمل على تشجيع الزواج من ثانية بين المواطنين من خلال منح الزوجة الثانية امتيازات تشجيعية منها أن يحصل الزوج على منحة صندوق الزواج ومنزل حكومي على أن يسجل باسم الزوجة الثانية لضمان حقوقها، كما يجب حرمان الزوج من جميع الامتيازات عند زواجه من أجنبية، مطالباً المواطنات بتقبل فكرة الزوجة الثانية كأحد الحلول الجذرية لمشكلة العنوسة والتركيبة السكانية.

وذكر أن الهيئة أوجدت حلولاً جذرية لمشكلة تأخر سن الزواج، منها طرح خدمة توافق الزواج أو ما يعرف بـ«الخاطبة الحكومية»، التي تتولى توفير فرص زواج للمواطنين، بهدف تشجيع الزواج بين المواطنين، خصوصاً المواطنات اللاتي تأخرن في سن الزواج، وستعمل مراكز توافق الزواج عمل «الخاطبة» في التوفيق بين المواطنين الراغبين في الزواج، وفق شروط تضعها الهيئة منها تقليل تكاليف الزواج وتحقيق التناسب بين الزوجين.

------------

تأخر سن الزواج و يحطون بديل خطابة إلكترونية شي حلو و غريب، لكن إنه يشجعون الرياييل يعرسون من ثانية و الثانية تلقى بيت من الحكومة بإسمها و صندوق الزواج يعطيه بعد المهر، و الزوجة الأولى الله يعلم إذا هي ساكنة في شقة أو في بيت أهله في حجرة .. يعني في ظلم بعد ..

ثاني شي الواحد قبل لا يتكلم، لازم يعرف يوازن، يعني يقول مثلا حتى الحرمة الأولى اللي ما عندها بيت بنعطيها بيت صح أو لا، ليش إن شاء الله الحرمة الأولى شو ذبها ..  يعني بما إنك تشجع على الثانية شجع الأولى بعد و طيب خاطرها، على الأقل قولها بنزللها راتب شهري أو أي شي، مب تكون من العدم، الحين بيعرسون بيطلبون الزواج من واحد معرس بكل بساطة بييها بيت من الحكومة .. 

و عشان يعدلون التركيبة السكانية المفروض يشجعون الأمهات على الإنجاب و يشجعونهم برفع الرواتب و على كل ولد مبلغ معين .. 

ثالث شي كل الرياايل بيعرسون من الله يبونها، كل شي جاهز بيت و مهر، و طبعا اللي بيخطبها ما بترفض بيت حكومي بإسمها يضمن لها حقها، و باجر لو طلقها عندها بيتها و الزوجة الأولى وحليلها ..

براويكم المسجات اللي وصلتني اليوم و الله ضحكت عليهن .. 

كلام الحريم بعد الخبر عن زواج الثانية 

ريلي أحبك,,

ريلي تولهت عليك,,,

ريلي ما أٌقدر على بعدك,,,

ريلي إنت أحسن واحد في العالم,,,

ريلي لو شو تسوي فيني بتم أحبك و برضى أعيش وياك حتى في جهنم الحمرا..

ريلي ما أبا سيارة يديدة و لا أبا تسفرني مكان و لاتوديني السوق و لا سينما ..

يكفيني وجودك أناظرك و تناظرني هههههههههه..

عزيزتي الزوجة الأولى  تطلقي من ريلج اللي مسكننج فحجرة  فبيت أبوه وتزجي  واحد متزوج وكوني الحرمة الثانية تحصلي ريل يدي و بيت يديد خخخخخخخ ..

بس ما أروم أكتب زيادة واايد مسجات مساكين و الله هههههه

مقهووورة

مقهورة أبا أطلع القهر اللي فيني مب عارفه كيــف؟ فيه غبنه مب عارفه شقى أطلعه 

أصعب شي، يوم القوي فجأة تشوفه ضعيف و الصغير يستوي على القوي كبير، و تنعكس الآية الصغير يستوي كبير و القوي يستوي ضعيف 

و يوم أسأل القوي أقوله " كيف إستويت ضعيف جدام الصغير، و إستوى كبير عليك ؟ "

يقولي " الزمن يكبر، و الزمن يضعف " !!

قلتله " العيب فينا مب في الزمن " 

يقولي  " العيب في الصغير يوم يلعب لعبة الكبير، و القوي يتفاجأ من قوة الصغير، و يستوي ضعيف "

أقوله  " و الحل "

قالي " المسؤول يتحمل النتايج " ؟