رمستنا الغاوية .. !!!

هههههههه و الله ما أعرف ليش إخترت العنوان، عفان الله دوووم فاشلة في العنوانين، وبقلكم ليش إخترت هالعنوان ..

على فكرة أخس شي عندي إني أكتب العنوان .. واايد أعاني و أنا أفكر، بكتب مواضيع عادي عندي ، لكن قولولي تعالي و حطي عنوان هني أتوهق هههههه ..

أول شي السلاااااااااااااااام عليكم .. شحـــــــــالكم ؟؟ إن شاء الله كلكم بخير ياااااارب ..

ليش إخترت " رمستنا الغاوية " ههههههه ما أدري ليش العنوان يضحك أحسبه شوي هههههه، لأنه بكل إختـــصــار يتني طلبات على رمستنا يبوووون مواضيع أو بوست عن لهجتنا الإماراتية، لكن في بوست واحد صعب إني أنزل لهجتنا و كم مرة فكرت إني أنزل، لكـــن ما قدرت لأني ما أعرف شو أنزل، و ثاني شي أنا مب عايبني نظام المصطلحات اللي بهالنظام..

الرمسة: الكلام.

الغاوية: الحلوة.

ليش ما أحب المصطلحات، و يمكن تكون هاي معلومة يديدة عن اللي مايعرفون إماراتيين، نحن في الإمارات نفس اللهجة، لكن في إختلفات في النطق، و طريقة نطقها، و بعض المفردات، يعني مثلا الحين أنا لو تيني وحده من الشارجة ما يحتاي أسألها من أي إمارة بعرفها من رمستها إنها من الشارجة و نفس الشي الإمارات الثانية، للتوضيح يعني مثلا الشارجة يمدووون في الرمسة أكثر يعني مثلا أنا من دبي يوم أزقر الوالد أقوله " أبويه " ، على عكس أهل الشارجة اللي يقولون " أبووييييييييه " بكسر الياء نحنا نكسر بس مخفف هم على مد و أثجل شوي هههههه..

ثاني شي حتى المصطلحات في إختلافات من إمارة لإمارة .. و على فكرة في مصطلحات حتى في دبي بين ديرة و بردبي في كم من مصطلح غير، يعني أنا من رمستيه في كم من مصطلح إذا قلته وايدين بيعرفون منطقتي و هل ديرة نفس الشي ..

يعني بعطيكم مصطلح ..

المصاص اللوليبوب هل ديرة يقولون مصاص أعتقد، لكن نحنا نقول مصيصاو ههههههه أدري بتظحكوون و الله يقطعوووني دوم على هالكلمة أستانس يوم ربعي مال بردبي يكونون ويااايه ندافع عن بلادنا " بردبي " هههههههههه ..

المهم فعشـــان جي ماحبيت أسوي مصطلحات و من هالســوالف المتعبة، و هالمصطلحات ممكن تلقونها على النت،

ملاحظة

Successful pilot،أم حروبي، سمو الأميرة، lil.D

هذيل الإماراتيين اللي أتابعهم و يتابعووني، طبعا أنا إذا قــارنت و غلطت صــلحوا مافيها شي، على الأقل تصلح الشي، و ثاني شي طبعا منكم إلي في العين و الفجيرة والشارجة و مناطق ثانية، أباكم في هالموضوع إطلعوون هذيج الرمسة الغاوية ، هههههههههههه .. طلعوا كل شي كل معاناتكم هههههههه و حتى قارنوا رمستكم بين الإمارات الثانية مافيها شي .. و الله أخاف ينجلب هالمووضووع آخر شي حرب أهليه .. هههههه

و أرحب بأي إماراتي و إمارتية يدخلون و يضيفولنا معلومة يديدة لمشاهدينا الخليجيييين و العرب ههههههه ..

ها شورايكم لين الحين برمستنا الغاوية ههههههههه؟؟ هي أدري فنااااانه رمستنا ..

على طاري كلمة " فنانة " تذكرت أيام ما كنت في الجامعة، كنت وايد أقوول كم من كلمة بس لأني رابعت كويتيات فعقدوووني ههههههههههههه من بعض المصطلحات و منها كلمة فنانة، هالكلمة نحنا نقولها متى ممممممم صبروا بعصر مخي، مثلا أنا عيبتني شخصية وحدة فأنا أذكر وحدة من ربعنا الكوتيات كانت تسألني عن وحدة فقلتلها بالعــكس هاي فنـــانة، محد شراتها ..

و كلمة فنانة تستخدم بعد إذا كان متمرس في الشي يعني هو يحب يصور وايد و شاطر في التصوير، أقول هو فنان في التصوير، و بعد تنقال في حالة الجمال يعني إذا حلوة نقوول فنانة ما شاء الله ..

.. فأذكر يوم قلت فنانة بطلعت عينها ههههههه و قالت فنااانة؟؟ و هي تتحسب إنها ممثلة أو شي، و طبعا علقوا عليه الكويتييين ياحبهم على التطنيييييييز هههههههههههههههــ ، أحين شوي بفج حرتيه على الكويتييييات هههههههه بس و الله أحبكم بس إنتوا ماتسووو واحد ثنين سيييدة تطنزوووون هههههه و هالشي يظحكني فيكم ما تتريووون..

كنا أنا ووحده من ربعي الحين ويايه وايد .. من الشعب الكويتي الشقيق هههههه ، سايرين الكلاس و كنت لابس بنطلون كان طوويل، فيلست أعدله " أجسفه " ف " شهد تقولي شو تسووين يالله الكلاس بدا، جان أقووولها أجسف البنطلون .. جان تقوولي شنو ؟؟ قلتلها أجسفه صبري عليه شوي، إلا أشوووفها ناقعة من الظحك، أنا الصراحة شكيت في عمري إني نقعت في الكلمة قلت شي .. جان تقوولي أجفس موو أجسف هههههههههه.. هني حسيت إني ودي أصفعها خخخخخخخ قلتلها إنتو تقوولووون أجفس أنا شلي فيكم هههههههه .. والله يوم أذكر الحين أظحك على السوالف أحس بوووستي كله " ههههههههههه " يمكن إنتوا مايظحكم، بس أنا مجرد ما إني أذكر أنقع من الظحك " ..

و على فكرة حتى ونحنا و الإمارات الثانية و بالذات دبي و الشارجة دووم نتمصخر على بعض في الرمسة هههههه لأنهم يمدون في رمستهم ..

و أذكر مرة وحده من ربعي قبل لا نستوي وااايد ربع، و هي من إمارة الشارجة، كانت تباني أرااويها صور أنا مصوورتنها، جان أقوولها "تقصدين الصور مالييليي " جان تضحك و قالت أكيد إنتي مال دبي و كملت ظحكتها، هههههههه أنا هني جي إستوا ويهي *_* في خاطري "شو قلت الأدب هاي" أشكره تتمصخر و تضحك جدامي ههههههه..

.. عقب جان أقلها كيف عرفتي ما شاء الله إني من دبي جان تقوول من مالييليي ..

ترا أهل دبي الأغلب منهم يوم ينسبون الشي إلهم بالجمع يقوولوون مالييليي من مالي، يعني مثلا هالشنط ماليلي مب ماليليج، و الشارجة ما يقوولوون ماليلي في حالة المفرد و الجمع يقوولوون مالي ..

أنا ماكنت أعرف بهالأشياء إلى يوم دخلت الجامعة إستويت أعرف أفرق عدل لأنه في الجامعة تشووفيين من الإمارات كلها، من الدول الخليجية والعربية، فتستوي مواقف وياهم بسبب اللهجة . أعتقد أم حرووبي عانيتي من هالنقطة أول السنة ههههه .. لأنه أنا و هي من نفس الجامعة ..

صح صبـــروا عندي بعد شي ثاني و يا الكويتياااااااااااات بعد هههههههههههه أنا عانيت وياهم سنتين هههههههههه و هم يظحكوون على الرمسة ... و آخر شي يبونا نعلمهم كلمات و يبون يرمسوون شراتنا ههههههه عشان يوم يسيرون الكويت يرمسوون جدام هلهم ههههه ..

أذكر كنا في الكفتيريا و هنتين من ربعنا الكويتيات يو يلسو ويانا على الطاولة كنا نتغدى و الجوو كان وااايد حلوو..

ف جان أنش، طبعا عقب ما ترست بطني ههههه..

قلتلهم يالله منو بيطلع " برع " جان يطالعوني "س" و " ف " جان يقووولووولي ليش حرف العين، ليش إتعبون لسانكم حلاتها براااا هههههه ..

فقلت عشان أتفادى الطنازة بستخدم كلمة بديله على وزن برع ههههههه جان أقوولهم بتطلعوون "خاري" ولا شووو ؟؟

و أنا كنت عارفه إنهم ما بيعرفوون شو معنى خاري، بس كنت أبا أطلع برع قلت هم ما بينتبهون للكلمة، إلا أشووف الويوووه إستوت جي *_* و أول سؤال ياني هههههه "" شنو خــاري " ؟؟

ههههههههههه عقدوووووني هههههههه .. خاري، مشتقة من كلمة خارج، و نحن ما شاء الله علينا نحب نحول حرف الجيم إلى ياء .. ههههه .. نفس الجدار يدار، جارة يارة، جميلة يميلة ..

شو رايكم بهالدروووس الخصوووصية الفنااانة .. ههههههههه أحلى من المصطلحات، أنا شو قلت بدال ما أحطلهم مصطلحات بيييبلهم سوااااااالف إستوتلي في الجامعة و برع الجامعة أحلى و أحسن ..

فإذا حسيت في تفاعل في الموضوووع إن شاء الله بسوووويلك جزء ثاني أحلى و يضحك مادري شو بلايه على ال " هههههه " .. و الله ما تدروون كتابة هالموضوووع موتني من الضحك لأني أذكر عمري كيف كنت هههههههه ..

ما أدري لييش أحس و إذا ما خاب ظني إنها هالبوس بيحتل المركز الأول من بين بوستاااتي كلها هههههه ..

إذا حسيت إنه عيبكم و ما مليـــــــتوا .. بحطلك شي يديد و يا الشعب السعووووودي الشقيق ههههههههه .. و باقي دول الخليج و العربية إن شاء الله ..

ملاحظة صغيرونة"-

إذا مافهمتوا بعض الكلمات ترا بنترجملكم إياهن هههههه و ما يقصرووون ربعنا اللي حطينا أساميهم فوووق، ترجموا و شرحوو و خذو راحتكم ، البوست مالكم ..

و مثل ما يقول بوعمر " بنســـير شويه، بس لا تخوزووون" هههههههه وايد عايشه الدووور ..