الثلاثاء، 10 أغسطس، 2010

خــرااريـــف



.

السلام عليكم .. !!

.

بعد إنقطاع إسبوع لأني كنت مسافرة حبيت أفرغ كل طاقتي و أقولكم كل خرااريفي ههههههه .. !! الصراحة أحتاج أطلع تعرفوون الوحده لو كبتت بتنقع ههههههههه ..

.

الخروفة الأولى:-

.

إنصدمت صدمت حياتي من الأتراك، أشكره يسبوونك في الويه، مايتريوونك تروح أو حتى تلف ويهك على طوول يسبوون أنا كنت على نياتي أول ما سرت بس بعيدن غيرت طريقتي يوم أحس إنه يالس يسب و أنا أشتري أكرر نفس الكلمة اللي يقولها و إذا شفت علامة تعجب على ويها عرفت إنها سبه هههههههه .. و إستوتلي سالفة و يا ثنين طلالييب " شحاتين " يهال كانوا قالي كلمة و رديت نفس الكلمة و المشكلة أخوه كان ساكت و أنا من رديت قلت نفس الكلمة كلهم هجموا عليه سب ههههههههههه و أنا ميته ظحك أعيد وراهم نفس الكلمة الله يستر شو كانن الكلمات حسيت إني بنت شوارع وقتها ههههههههههه .. !! بس طبعا ما أجمع كل الأتراك البعض و هالبعض مخربين عليهم ..

معنى كلامي هذا لو سرتوا تركيا إذا حسيت إنه هالشخص يسبك كرر نفس الكلمة، أو إطلع من المحل و لا تشتري منه ..

.

الخروفة الثانية:-

.

قبل لا أســافر، كنا متيمعين أنا و ربعي في دبي مول على الغدا، و عقب الغدا سرنا نحلي و نحنا سايرين نحلي يونا مجموعة بنات سعوديات على كويتيات شكلهم أهل كانوا يسألونا على أماكن في دبي و كانوا أول مره إيوون دبي و غمضووني إنهم إلا سايرات المراكز و هم يدوروون على قرية التراث، و كانوا يسألونا عن الأماكن التراثية، و إستغربت إني يالسه أعصر مخي عصااااار بس عشان أطلع الأمــاكن مع إنه عندنا بس لأنه محد ياني و سألني و هاي أول مره حد يقوولي نبا أمكان تراثيه دايما يسألوونا عن محلات معينه أو سووق الحلول " العطارين " هالأماكن يعني ..

و المهم طلعنالها واايد أمــاكن، و كانوا يبون يتحنون قبل لا يسيرون الكويت و السعودية فأنا قلتلهم سيروا الصالون الفلاني و الفلاني و هم على بالهم إنه نحنا يمكن نتحنى في قرية التراث ههههههههه مب في الصالون أنا كانت فيه ظحكة هني بس سكت .. لأنه حرام ما يعرفوون، و قلنالهم في قرية التراث نحنا ما نتحنا هناك و لو يحنونها شويه و وغالي نحنا في الصالوونات أكثر شي و عطيناها الأماكن العدلة، ووحده منهم بغت أغراض أم خماس و أغراضهم شي في إمارات مول و الفيستفال بس ماشي وقت يسيرون مراكز لأنهم يبون أشياء تراثيه، فأنا إقترحت عليهم يسيرون بيت أم خماس هو مب بيتها بيت ربيعتها اللي في الفريج نسيت إسمها على شارع جميرا عدال ميلس الشواب و تتصور عداله ..

و آخر شي إكتشفنا إنهم بيسافرون اليوم الثاني الصبح يعني ما عندهم وقت يسيرون هالأماكن .. فإختصرنا الوقت إلهم قلنالهم سيروا تصورو عدال هالبيت و كملوا لين أتلانتس شووفووه على الأقل تغغير و هناك محلات يحنوون و تحنوا و إذا خلصتوا سيروا مدينة جميرا على الأقل شوي تراثية ..

و من هاذاك اليوم و أنا أفكر في هالموضوع أبا صدق أشغتل في السياحة الحين ههههههه .. عيبتني السالفة .. !! أحس ما عنا وايد مواطنين في هالمجال مووول .. و اغلب اللي إيوون دبي ما يعرفوون غير مراكزها ..!!؟؟

شكلي بسوي مدونة يديده متخصصه في السياحة ..

الخروفة الثالثة:-

.

بسبب الإقبال على الكتب اللي أقراها و طبعا بسبب طريقة العرض .. اللي لاحظت وايدين تشجعوا على قراية الكتب .. ف قررت إني أفتح نادي مختص للقراءة فقط .. " أسوي دعايه " خخخخخخخخخ ..

.

الخروفة الرابعة:-

.

في خاطري أتعلم شي واحد في حياتي إني أحمد الله و أشكره يوميا على النعم اللي عندنا، في كذا مطار لما أسيرلهم و من بينهم كطار تركيا الطامة الكبرى تتعب تعب و تهلك لين ما نطلع من المطار .. أو حتى في الطلعة، و يوم أكون هنالك على مطاراتهم، أقوول و الله مطار دبي نعمه و نحنا مب حـــاسين يعني يوم أفقد النعمة أتذكرها و هاللي قاهرني ..!!

صدق مطار دبي غـــــــير رااااااااااحة نفسية .. بس ما حبيت مطار ترمينال 3 حبيت السوق الحرة اللي فيه كل الطياايير .. أما اللي في ترمينال 3 حسيت كأني في مركز بس حلو بعد و الحمد الله ما أبا أذم عشان وقتها ما أقووول وين دبي ..

.

الخروفة الخامسة:-

.

مستانسه إنه رمضااان ياي و الحمد الله، و إن شاء الله ألتزم بالجدول اللي بسويه .. لكن في شي بفتقده في رمضان و اللي هو الشلق .. أحس من زمان ما سمعت حد ينقع شلق و الشلق هو " الألعاب النارية " .. صدق صووت الشلق يحسسك برمضــان .. تحس أجواء فرح بعد صلاة الترااااويح .. لكن شو بنقوول سلامة الإنسان فوق كل شي ..

هناك 19 تعليقًا:

  1. الحمدلله على السلامة وخلج بعيد عن الشر وعن هالأتراك ما تدرين شاللي اييج من وراهم ;p
    وترى الشغل في السياحة ممتع جدًا ; )
    بخصوص نادي القراءة, ليش لا؟ :)
    أما مطار دبي فـ ماشاءالله أكيد نعمة.. ما يتقارن مع المطارات الثانية
    ومبارك عليج الشهر :)

    ردحذف
  2. الحمدلله على سلامتج ..وانا اقول وين هالغيبه ما تخبرين !!
    ههههه حلوه تردين الكلمة بكلمة ..
    عجبتني سالفة نادي للقراء انا بشترك ^^
    الحمدلله نحن واايد احسن من بعض الدول ..
    ياااي ذكرتيني بالشلق يباله اقولهم ييبون خخخ

    كل عام وانت الى الله أقرب ~

    ردحذف
  3. الحمدالله ع سلامتج..

    وخخ حلو تردين عليهم المسبه انزين اشوه ماسولج شي :\

    عاد الكويتيات غير عن السعوديات انا لما رحت دبي كنت ابي العاب وهالسوالف اكثر من الاسواق ..

    بسالج مدام بتشتغلين بهالمجال خخخ مى تبطل القريه العالميه ؟؟


    حلو ماشاءالله عندج وايد اهتمامات وافكار بس يبيلج تنظمين افكارج .. وموفقه يارب..

    مطار دبي متعب ماشاءالله كبير انا كنت يايت له من كار سعد العبدالله اهو مطار الوطنيه للطيران كان صغيرون حبيته مريح خصوصا امي ماتقدر تمشي وايد بس بدبي طاح حظي خخخ..

    مبارك عليج الشهر وعساج من عواده..

    ردحذف
  4. الحمدلله على سلامتج .. نطالبج الحين بتقرير عن تركيا وأهم الأماكن الحلوة فيها واعتبريها خطوة أولى بالسياحة :)


    ووالله دبي بكبرها تهبل وماتنعاف ومطارهم أصنفه شخصياً أحلى مطار في العالم والله يهنيكم بديرتكم ويحفظها لكم من كل شر يارب

    ومبارك عليج الشهر

    ردحذف
  5. seema*

    الله يبارك فيــج حبيبتي ..

    والله قهرووني من كثر ما يسبوون، و ساعات يوم تقووليلهم غالي شوي و بيروغج .. مع إني لا كاسرته و لا قلتله شي .. بس قلت غالي شوي و بياكلني .. !! من جي غيرت رايي يا أودر الشي ما أشتريه و أخليه يموت قهر يا أرد نفس الكلمه ..

    هذا نادي القراءة لازم أسوييه بس أبا أفكار يديده لكن تدرين شو المشكلة يوم سويت سيرج أدور كيف تؤسس نادي للقراءة ما لقيت شي على عكس يوم إدورين بالإنجليزي يا كثرة ..

    و شكرا على مرورج ..

    ==========================
    أم حروبي

    الله يسلمج من الشر .. و السفره بسرعه بسرعه كانت ..
    ههههه و الله يبالج .. تولهت على الشلق ما تدرين كيف .. أحسبه صدق يسوي جو في رمــضان و أهم شي يوم إنلبق الليفه ههههههههههه .. عجيبه و الله ..

    بس إن شاء الله أخلص النادي و بخبرج عنه ..

    و مشكووره يا أم حرووبي..
    ==================================

    شخبوطة كويتية

    أنا ظحطت على هالشي يوم أرد نفس الكلمة هالولدين سبووني سب ههههههههههه بس زين و الله ما سووولي شي .. ولا جان رحت فيها ..

    و عن البنات كانوا سعوديات و كويتيات و شكلهم يستوون لبعض هو أكيد الإهتمامات تختلف .. بس تحسين الأغلبية إيوون دبي عشان السوق .. و هذيلا يبون سياحة أكثر من سوق ..

    هههههههه و حليلي بعدني ما قررت إني أشتغل لكن ودي عيبتني السالفة خخخخ .. القرية العالمية بعدها يوم بيبرد شوي الجو .. واايد مستعيله اللي أعرفه يا شهر 11 أو 12 شي جي بس أول ما أعرف متى بالضبط بخبرج .. بس هي إطول تقريبا 4 شهور .. يعني بتم لين مهرجان دبي ..

    مطار دبي المتعب فيه المشي لكن أموورج تمشي بسرعه .. عشان جي أنا مرتاحة بالذات مبنى 3 .. و هو صح صعب إذا أمج ماتروم تمشي واايد .. بس لو ركبتيها السيارة بدال المشي تعب عليها جي ..
    و الله يبارك فيج .. و مشكوورة على المرور ..

    ==================================
    Engineer A

    الله يسلمج من الشر .. هههههههه توقعت شخبوطة تطلب هالطلب مب إنتي خخخخخخ .. و الله أحس موول ما عندي وقت أحط عفان الله مادري شو بلايه ما أتفيج موول .. إن شاء الله يوم بتبرظ بحط صور و عن الأماكن اللي زرناها بس الصراحة اللي يحب المتاحف و الأشياء الأثريه يسير تركيا واااايد فيها هالأشياء ..

    و إنتوا محلين دبي بوجودكم فيها و الله يهنيكم يارب في بلادكم ..

    ردحذف
  6. الحمد لله على الف سلامتج والله.. يااااربي تسبينهم هههه حلوة هاي بس ماحيد يسبون بالعكس يبتسمون بالويه ماشاء الله علليهم والله حبوبين ..

    حرام عليج قوليلهم الاماكن التراثية .. عاد ذكرتيني مرة واحد كان ياي من بوظبي مايعرف طريج الردة لبوظبي .. ههههه عاد تخييلي سالنا كنالها مكان ثاني وديناه طريج الذيد..

    ههه وكل عام وانتو بالف خير ورمضان كريم:)

    ردحذف
  7. اول شي الحمد الله على سلامتك

    ثانيا و هو السبب الرئيسي اللي خلاني اجي المدونه

    مبار عليك الشهر و كل عام وانتي بخير

    الله لا يحرمنا اجره

    ويكتب لنا الرحمه و المغفره و العتق من النار في هذا الشهر الفضيل



    لي عوده من اجل قرائة البوست :)

    ردحذف
  8. الحمدالله عالسلامه

    لول بس حلوه تكررين الكلمه الي يقولونها ..

    والاتراك ماادري شفيهم عالعرب

    خصوصا من سالفه اسطول الحريه واهما كارهينه

    ردحذف
  9. الحمدلله على السلامة
    استغربت,, أنا هالسنة رايحه تركيا والمعاملة كانت تمام التمام والناس طيوبة وحبوبة والكل يسلم ..
    خبرني عن المناطق اللي زرتيها؟

    فكرة النادي واايد حلوة وأنا من أول المشجعين

    مطار دبي رووعه, الله يهنيكم

    مبارك عليج الشهر وعساج من عواده
    وتقبل الله الصيام مقدماً :)

    ردحذف
  10. بالنسبه للخروفه الاولى ياما كليت مثلها بالمانيا يسبوني بالالماني لما حفظت مسباتهم ههههههه

    مرة قال ولدي كلمه موزينه وقلت حق ريلي ان ولدي يقول كلام موزين بالالماني قالي انتي شعرفج انه مو زين وناديت ولدي وقلتله شنو قبل شوي قلت وقال .. ريلي يقولي انتي اذا تبين تتعلمين الماني قوليلي ادخلج معهد مو تتعلمين اللغه من الشوارع لووووووووول

    والخروفه الثانيه انا صارلي فتره سنه مااحب اسافر اي مكان حتى لو يوم واحد الا وانا اللي اعتمد جدول الرحله واصير القايد للقروب ههههههه احساس حلو انصحج فيه وناسه


    والخروفه الثالثه مااحب اقرا كتب وااايد :(

    والخروفه الرابعه .. الله يحفظ دبي واهلها يارب من كل شر ويتمم عليكم اللهم امين

    الخروفه الخامسه .. مبارك عليج الشهر وكل عام وانتي بخير فديتج :)

    ردحذف
  11. اولا كل سنه وانتى طيبه ورمضان كريم ...اعاده الله عليكى وعلى اسرتك وعلى اهل الامارات بالخير والصحة

    ثانيا مين قال ان دى تخاريف ؟؟؟

    ثالثا مطار دبى بالفعل من اروع مطارات العالم ولا يتفوق عليه سوى مطارات قليلة مثل كوالالمبور وسنغافورة وبكين .....ادام الله عليكم نعمة العقل

    ردحذف
  12. ههههههه ... عش رجبا ترى عجبا عادي ياخيتي ضميها لحصيلة تجاربج

    مبارك عليج الشهر :*

    ردحذف
  13. Captin khalid
    الله يسلمك من الشر .. ترا مب كلهم و يمكن على حسب المنطقة .. أنا يوم أسيير بزاراتهم غير وزيينيين لكن اللي في المحلات يلوعوون بالجبد لو ما تقولين شي يسب ..

    هههههههه لا عاااااااد إنته سالفتك سالفه حرام من بوظبي ووديتووه الذيد هههههههه ..
    و مبرووك عليك الشهر يالكابتن ..

    ===============================

    فيلسوووف

    الله يسلمك من الشر ..

    و الله يبارك فيك يارب .. و ننتظر العودة إن شاء الله ..

    ==============================

    Made in Q8

    صدق؟ أول مرة اعرف هالشي من سالفة إسطول الحرية المفرووض يستانسوون شو بلاهم غريبة؟؟
    و الله يسلمج من الشر و مبرووك عليج الشهر ..

    ============================

    Nov24

    أنا كنت ساكنة في إسطنبول و المنطقة هي تقسيم .. و شارع الإستقلال بعد إنسبيت فيه هههه و الياهل اللي في تقسيم .. بس شوفي هم مب كلهم لكن اللي في المحلات يسبون و حتى في سوق المصريين حد يتمصخر أشكره .. لكن الحق حق البزار اللي كانوا مسوينه في تقسيم كانو اللي هناك الأراك أروع ما يكوون واايد زينييين و حبيناهم وايد ..
    ومبرووك عليج الشهر ..

    ======================================
    Crazy girl

    هههههههههه سالفتج نفسي و الله .. و لا أحلى شي ولدج حافظ السبات هههههههههه و الله صدق أنا عقب ما أقوول هالكلامات ما أعرف شو معناتها بس أقول أخاف يتحسبوون من الشارع هههههه ..

    أنا لاحظت في سالفة السياحة إنتي ماشاء الله شاطرة نفس يوم ييتي دبي في يوم واحد ما شاء الله حس تقريبا سرتي أماكن واايده .. و منج نستفيد ياااااارب ..

    و الله يبارك فيج يارب .. يمكن أستعين فيج يوم بسير المانيا هههههههههه ..

    =========================
    يوميات مضيف طيران ..

    و الله يبارك فيك يا مضيفنا ..

    أمال دي إيه .؟
    أنا قالولي مطار سنغافووورة روووووعه .. و خاطري أشوفه ... و شكرا لك

    =================================

    الوتين
    هي ترا الدنيا تجارب .. و مبرووك عليج الشهر ..

    ردحذف
  14. خروفة مني : كل عام وأنت بخير ، وشهر مبارك عليك وعلى الأسرة الكريمة والمسلمين أجمعين ... مع أن التدوينة كتبت باللهجة المحلية لكن بعض الكلمات تحتاج إلى توضيح أكثر حتى تصل لأكبر قدر من المتابعين ... طبعاً أكتب هذا من الموانة ولا احنا في الخليج ماعندنا مشكلة نفهم على بعض .

    ردحذف
  15. شانيل..

    لانه ودي ايي دبي بعيد الاضحى عندي فلوس اماراتيه ماصرفتها خخ..

    انا قصدي بالستايل نختلف و انا كنت ابي بدبي السياحه مو السوق طفحنا ووملينا من السوق..

    مشكوره ..

    ردحذف
  16. الحمدلله ع السلاااامة
    هااا ويين صوغتي ؟؟:d

    تعليقي ع الخروفة الأولى :
    لووووووووووول.. ما شاء الله عليييج .. عجييييييبة ... والله زين قلتي لي ... الحين اللي بيسبني بلغته بسبه لوولز
    حركة حلووة
    (;
    ------------
    الخروفة ال2 :

    انا أستوي مرشدة ساحية فالجامعه
    خاصةً للطلبة المستجدين
    وين الكلاس هذا ؟ ووين المكتبة .. وو وين ووين ..
    يبي لي أقبظ راتب من الجامعه بعد ..لووول
    بس أحس بشعور حلو ..لما حد يسألني وأجاوب عليه وأساعده ..

    -------------
    خروفة رقم 3 :
    امممممم كتاب رؤيتي موجود عند أختي و أخويه بعد عنده
    بس ما أعرف ليش ما اتشجعت أقراه ..
    بس بعد ما جفت اللي كتبتيه عنه ..إن شاء الله أحاول أقراه أول ما اتفرغ له :)
    ------------
    خروفة نمبر فور :
    فعلا ..بلادنا على عكس بلدان ثانية متطوره .. ولله الحمد ... وهاي نعمة كبيرة من الله .. والله ييسرنا للشكره :)
    ------------

    والخروفه الخامسة :
    كل عااام وانتي بخيير ياارب
    وينعاد عليييج :)

    فعلااا أفتقد الشلق واايد واايد :(
    صدق يعطينا جو من الحماس
    ولا الأولاد ...يهربون الشلق
    ويجتمعون فأماكن ويتشرونه بالدسة
    تقولين محششين لووول


    وووووووو ثاانكس ع البووست الغااوي :)

    ردحذف
  17. كل سنه وانتى طيبه

    ردحذف
  18. ولكم باك :) وكل عام وانتي بخير وصحه وسلامه

    ردحذف
  19. تركي الغامدي ..
    و إنتي بخير يارب و ينعاد علينا يارب، يا تركي الواحد يبغي يطلع اللي في خاطره ساعات بلهجته .. شكلك إنته إستصعبت بعض الكلمات ههههههه .. !!

    =====================================

    رورو الشخبوطة

    ههههههه يوديهن عيل، و في المهرجان بترخص الأسعار إنشاء الله لو تين على المهرجان أحسن لأنه بتكون عندج القرية و المهرجان .. بس عن الزحمة تعالي قبل المهرجان ..

    هي والله السوق تيج فترة و تملين منه .. يبالي أطلعلج الأماكن السياحية في دبي ..

    ==================================

    سمو الأميرة ..

    هههههههه يبالج سوي هالحركة بس مب دووم عن يزخوونج آخر شي و يسطعوونج خخخخخ ..

    و ما شاء الله زين .. أذكر يوم كنت في جامعة زايد كنت مشتركة يوم إيبون بنات يداد نراويهم الجامعة و نرمسهم عنها بس تحسين حلو متعة .. و يوم يسألوونج و تجاوبين كشخة .. أستانس .. عاده أنا و حبي للتفلسيف ..

    و جربي تقرين رؤيتي حلو واايد .. باقلي شوي و بخلصه ..

    و إنتي بخير يارب .. و أنا بعد و الله في خاطري شلق موووول ما سمعت السنه مب حاله هاي ..

    ================================
    Hesham
    و إنت بخير يا هشام
    =========================================
    Tazmania

    و إنت بخــــــــير

    ردحذف