سؤال صــبــاحي على أجمل صبــاح

صـــباح الخـــير ..

سؤالي هو بكل بســاطة، سؤال وايدين بيشووفنه ماله داعي، لكن مجرد سؤال خفيف الظل يا في ذهني ..

ليش القهوة مرتبطة دايما بالصــباح ..؟؟

و جاهي حليب أو كما يسمى كرك مرتبط بالصــباح ..؟؟

أغلب الكتاب عايشين مع قهوة الصباح المرة ..؟؟

إذا نبشت في الشعر تلقى قهوة الصـباح موجودة في قصائدهم ..؟؟

يوم أسير الدوام من الصبح، أشوف أغلب السيايير واقفة تتريا الكـرك .. ؟؟

يوم أوصل الدوام أول شي أطلبه يا كرك، يا قهوة .. ؟؟

و أغلب الإماراتيين ما يروومون يعيشو بدون جاهي حليب، و بالذات في الصباح ..؟؟

يا ترى شو السبب و ليش ؟؟

رحلتي الأولى إلى الكويت .. " عرس "

الســـــــــــلام علــــــــــيكم، شحــــالكم .. ؟؟


خراااريييف بناااات و حريم يفضل عدم دخول الرجال ههههههه ..


و أخيرا سرت الكويييييييييييييت و اليوم راده من الظهر، طبعا سفرتي كانت ليوم واحد مال بسرعة بسرعة، كنت سايرة أحضر عرس ربيعتي .. !!


والبارحة سرت الكــويـــــــــت .. و كنت طايرة على طيران الإمارات، و يا كثر الهنووود ههههههه، قلت ما شاء الله بنوديهم ويانا الكويت هههههههه، أغلب اللي في الطيارة مهنده .. الله يبارك هههههه ...
المهم وصلنا على الساعة 5 و الحمد الله إجراءات الدخول كانت سريعة، طلعنا بسرعة ما طولنا، من وصلنا الفندق أبوي قال يالله بنسير سوق المباركية، و أنا الصراحة ما كنت متفيجة مووول أسير لأنه ورايه عرس، بعدين قلت يالله خلني أسير إلا يوم واحد خل أشووف الكويت شوي، إلا هي ساعة و سرنا و شفناه، بس والله حلو طلع ينفع حق تصويييير ... !!


المهم أنا بغيت أتكلم عن العرس، لأني مووووووووول ما توقعت أعراس الكويتيييين جي مووول .. أنا قبل لا آي وحده من ربيعاتي قالتلي ترا أعراسهم غير عنا، و قالتلي النظام كيف، بس أنا قلت لا ما أعتقد مستـــــحيل هههههههه .. بس يوم سرت قلت زين إنها قالت و لا جان إنصدمت و تحسبت إني داشة قاعة بالغلط .. !!


إنتو الكويتييييين عارفين نظامكم في العرس هههههه بس بشرح حق الإماراتيــــــــات كيف عرسكم ..


تخيلوا أول ما دخلت ما أعرف وين أسير سألت حرمة أول شي عن الحمام أضبط شعري .. و عيبني هالشي عندهم، نحنا ما عنا هالشي إذا تبين تعقين عباتج حاطين معاليق و فلبينيات يعلقونهن ..


بعدين سرنا للقاعة، القاعة إنصدمت منها، ليش لأنه نحنا في الإمارات ماجد شفت في حياتي عرس جذي حسيتبه عجــــيب عيبني تغيير .. مدرجات و عليهن كراسي .. بقربلكم أكثر شفتو كيف عرض الأزياء المصممين و الناس ييلسون على الأطراف العرس جذي و في النص يرقصــــــون .. و الكوشة ملموومة و صغير و حلوة، عكسنا ..
الشي الثاني تيلسين، و إطالعين عيبني رقصهم هههه و الله حلو حسيتبه هادي، مع إني ما أعرف أرقص، لأنه نحنا نص أعراسنا مافيها رقص، و لو في رقص مب الكل، بس أنا أحب أحضر أعراس العيم عنا لازم يرقصوون عكس العرب عيب و عيب ههههههههه ..


و إستغربت من شي ثالث، صح نحنا خليج واحد، لكن في إختلافات في أمور معينة، و اللي الحين بقوولها..


الشي الأول: - نحنا عنا نعشي المعازيم بعدين تدخل العروووس، و أحين حد بدا يسوي هالحركة تدخل العروس بعدين يعشون، بس الأغلب يتعشون و عقب تطلع العرووس، و عيب إذا طلعوا عنج و ما عشيتيهم و بالذات قبل لا تي العرووس ههههههههه ...
في الكويت شفت العكس .. العروس تدخل و لين ما يدخل المعرس و يطلعون عقب نسير للبوفيه، بس المهم عقب ما تدخل العروس و تقعد يستوي تتعشون .. ههههه ..


الشي الثاني:- عيبتني دخلت الرياااايييل الصراحة العايله كلها ما شاء الله تكون موجودة .. وما أعرف إذا أبو العروس دخل أو لا، بس نحنا عنا أبو العروس مايدخل، ما اعرف إذا هالشي في الإمارات الثانية أو لا، و ليش ما يدخل ما أعرف، أبو المعرس عادي أبو العروس لا..
و صح .. و كم من واحد من هلها رقصوا، بس ما أعرف شو هالرقصة بس كانت وااااااايد حلوة .. مثل اللي كان يركض ما أعرف رقصة سريعة كانت ...
نحنا مجرد ما إنه تسمعين ريال يرقص؟؟ ترا شي وايد غريب، و عنا الريال عيب يرقص، نحنا ما إستوت عنا ريااييل يرقصون في العرس، بس اليولة سوها رقصة الحين هههههه، بس لا تقولولهم إنكم ترقصوون بيفرونكم بالسلاح ههههههه، بس قولوا نبا يووله ههههههه ..
بس صدق أنا يوم شفتهم يرقصووون عيبني الوضع، لكن ما أقدر أتقبل هالشي إماراتي يرقص واايد غلــــط هههههه مب عشان مايعرفوون، لكن عيب عنا الريال يرقص ... خخخخخخ


بس العرس حلو تغغغغييييييير شوي عن نظام أعراسنا، شفت شي يديد ..


و لووو إني ما يلست في الكويت وااايد بس عيبتني، إن شاء الله أردلها حبيتها واااايد ..




و إستويت شرات رووروو الشخبوووطة صورت كل شي في الفندق عيبني ههههه شوي و كنت بصور الفاتوووورة ههههههه .. !! يبالي أنزل بوست عنه نسيت شو إسمه ماريوت يمكن.. المهم الفندق اللي تابع له قاعة الراية ..

شــخابيط

الشخبوطة الأولى :-

طبعا هذا مب دعايا حق رووروو الشخبوطة تشابه بالأسامي فقط هههههههههه

اليوم أقولج يا شوجي " خسر خسر خسر خسر خسر خسر "،البارحة على يوتيوب بالصدفة شفت لقاء شوجي مع نيشان في برنامج إبشر، و تعجبت من أمر غريب، و لاعت جبدي و ما كملت اللقاء..

الأمر الأول و اللي هو : شوجي تتكلم "English " هههههه، المشكلة إنه المذيع لاحظ هالشي و نغزها و عطاها في الويه لكن ما حاولت إنها تتكلم عربي نفس ماكانت في برامجها، المشكلة إنه كانت إدخل بزيادة و بالذات كلمة Family اللي كل شوي تعيدها مالها داعي هالكلمة أصلا ..

و الحين مال أول يدخلون بعض الجمل الإنجليزيه في الكلام، مووضه و طــاحت، و ثاني شي حتى اللي يدخل، يدخل في أماكن معينه..

حسستني كأنها متعلمه توها إنجلش ويايه إطبقه على البرنامج " يعني أعرف أرمس بعد أنا " هههههههههه

تعذرني شوجي لكن ما أعتقد بس أنا اللي لاحظت هالشي، الكل لااااااحظ ، ماحيدها ترمس جي في برامجها ؟؟؟

الأمر الثاني: خطوبة على الهــــواء ههههههههههه، أصلا كيف سمحتلي يتكلم، لو كانت غشمرة البنت حليلها كانت بترتبط لكن الله مارااااااد، بس أنا أول مارمس هالممثل و قال على الهواء و هي كانت مستحيه و تظحك، مالومها لكن في نفس الوقت خل يستحي على ويهه هالممثل، البنت من فترة كانت كانت بتعرس و أكيد نفسيتها تعبانه بعدها، و هووو على الهوا يخطب، شو السالفة يبون يسوون ضجة إعلامية مثلا ؟؟

==================================

الشخبوطة الثانية:-

بالعربي الفصـيـح، و للبالغين الراشدين فقط:-

تعجبت من تلك العلاقة بين الزوجين، زوجة لا تعلم كم مرة يجب على زوجها أن يلمسها، بالرغم من أنهم من دولة أوروبية و كنت أعتقد أن هذا المفهوم عند الزوجات العربيات فقط و إنما هو يضم كل نساء العالم..

هذه الزوجة في المحكمة تسألني، لا يلمسني إلا كل شهرين مرة فقط، أقول لها و أنتي ألا تسألينه، تقول لا لأن هذا الأمر كنت أعتقده أنه هكذا مرة في الشهر أو مرة كل 3 أشهر، و لا أعلم أنه يستطيع أن يعاشرني دائما ... !!

تعجبت من هذا الزوج، اللذي ضحت زوجته له بكل شي، فهي تنجب و هو لا ينجب، خضعت ل 3 عمليات لكن كلها بائت بالفشل، بعد فترة إكتشفت أنه تعرف إلى إمرأة من الجنسية الآسيوية، و تحدثت معه حول هذه الخيانة، و إكتشفت مرة أخرى، لكن رده لها إذا كان هذا الأمر لا يعجبك، أخرجي من المنزل، علاقاتهم كانت مرة صافية و تارة متعكرة، و في يوم عيد ميلادها أخرجها و تعشى معها في أفخم الفنادق في دبي و كأنه لم يكن شيئا، و كانت في غمة السعادة..

في اليوم التالي صباحا إكتشفت أنه كان يعد لها وجبة دسمة عند الإفطــار تسمى " طــالق "، هكذا لا يريدها، و هي تريديه و تعشقه، و هو لا يريدها لأنها تغار منه، و أنا لا ألوومها من هذه الغيرة لأنه خائن ..

بعد هذه التضحــيات تخوون ؟؟

=======================================

الشخبوطة الثالثة:-

هذا كلام موجه لكل مقيم في بلادنا، نحنا نحترمكم، و نحبكم، و نعاملكم شراتنا، و الدولة تعاملكم شراتنا حالنا من حالكم، إلا في بعض الحــقوق، لكن إنكم تتعدون على أشياء معينة أنا ما أرضاها في حقنا..

- وحده إدوخ جقارة " إدخن زقاير " جدام اللي يسوى و اللي ما يسوى و ترمس شراتنا، و حافظه " هي و فديتج " و اللي ماااار يتحسبها مواطنه شو درااااااه الحبيب، صح في مواطنات يدووخن لكن منخشااات بالدس..

لكن أنا اللي أقصده قوم بو عيني عينك، جدامي و جدامك و تتحيس إنها إماراتية ... و يوم بتخشين هالجقارة في حلجج و بتسوين حركاتج لا تلبسين شراتنا، و اللي قاهرني حتى لفتنا في الشيلة ضابطينها ..

بس مهما سويتي بنعرفج من ثوبج و من ويهج ... لكن اللي مايعرف بيقوول بنات البلاد .....!!!!

أحين المشكلة إذا واحد قالهم إنتو من هل البلاد قاااالواا هي و أكبر دليل اللي على بعض القنوات المحلية دون ذكر أسامي، نحنا نعرف إنهم مب إماراتيات لكن اللي برع عارف هالشي بس هم يقوولوون نحنا بنات البلاد..

بالعكس نحنا نستانس يوم نشوف إنه الناس تلبس نفسنا ها معناته إنه نحنا على قلة عددنا لكن مأثرين، لكن مب ياخذون هالشي و ينقلونه بطريقة سلبية ..

خــرااريـــف

.

السلام عليكم .. !!

.

بعد إنقطاع إسبوع لأني كنت مسافرة حبيت أفرغ كل طاقتي و أقولكم كل خرااريفي ههههههه .. !! الصراحة أحتاج أطلع تعرفوون الوحده لو كبتت بتنقع ههههههههه ..

.

الخروفة الأولى:-

.

إنصدمت صدمت حياتي من الأتراك، أشكره يسبوونك في الويه، مايتريوونك تروح أو حتى تلف ويهك على طوول يسبوون أنا كنت على نياتي أول ما سرت بس بعيدن غيرت طريقتي يوم أحس إنه يالس يسب و أنا أشتري أكرر نفس الكلمة اللي يقولها و إذا شفت علامة تعجب على ويها عرفت إنها سبه هههههههه .. و إستوتلي سالفة و يا ثنين طلالييب " شحاتين " يهال كانوا قالي كلمة و رديت نفس الكلمة و المشكلة أخوه كان ساكت و أنا من رديت قلت نفس الكلمة كلهم هجموا عليه سب ههههههههههه و أنا ميته ظحك أعيد وراهم نفس الكلمة الله يستر شو كانن الكلمات حسيت إني بنت شوارع وقتها ههههههههههه .. !! بس طبعا ما أجمع كل الأتراك البعض و هالبعض مخربين عليهم ..

معنى كلامي هذا لو سرتوا تركيا إذا حسيت إنه هالشخص يسبك كرر نفس الكلمة، أو إطلع من المحل و لا تشتري منه ..

.

الخروفة الثانية:-

.

قبل لا أســافر، كنا متيمعين أنا و ربعي في دبي مول على الغدا، و عقب الغدا سرنا نحلي و نحنا سايرين نحلي يونا مجموعة بنات سعوديات على كويتيات شكلهم أهل كانوا يسألونا على أماكن في دبي و كانوا أول مره إيوون دبي و غمضووني إنهم إلا سايرات المراكز و هم يدوروون على قرية التراث، و كانوا يسألونا عن الأماكن التراثية، و إستغربت إني يالسه أعصر مخي عصااااار بس عشان أطلع الأمــاكن مع إنه عندنا بس لأنه محد ياني و سألني و هاي أول مره حد يقوولي نبا أمكان تراثيه دايما يسألوونا عن محلات معينه أو سووق الحلول " العطارين " هالأماكن يعني ..

و المهم طلعنالها واايد أمــاكن، و كانوا يبون يتحنون قبل لا يسيرون الكويت و السعودية فأنا قلتلهم سيروا الصالون الفلاني و الفلاني و هم على بالهم إنه نحنا يمكن نتحنى في قرية التراث ههههههههه مب في الصالون أنا كانت فيه ظحكة هني بس سكت .. لأنه حرام ما يعرفوون، و قلنالهم في قرية التراث نحنا ما نتحنا هناك و لو يحنونها شويه و وغالي نحنا في الصالوونات أكثر شي و عطيناها الأماكن العدلة، ووحده منهم بغت أغراض أم خماس و أغراضهم شي في إمارات مول و الفيستفال بس ماشي وقت يسيرون مراكز لأنهم يبون أشياء تراثيه، فأنا إقترحت عليهم يسيرون بيت أم خماس هو مب بيتها بيت ربيعتها اللي في الفريج نسيت إسمها على شارع جميرا عدال ميلس الشواب و تتصور عداله ..

و آخر شي إكتشفنا إنهم بيسافرون اليوم الثاني الصبح يعني ما عندهم وقت يسيرون هالأماكن .. فإختصرنا الوقت إلهم قلنالهم سيروا تصورو عدال هالبيت و كملوا لين أتلانتس شووفووه على الأقل تغغير و هناك محلات يحنوون و تحنوا و إذا خلصتوا سيروا مدينة جميرا على الأقل شوي تراثية ..

و من هاذاك اليوم و أنا أفكر في هالموضوع أبا صدق أشغتل في السياحة الحين ههههههه .. عيبتني السالفة .. !! أحس ما عنا وايد مواطنين في هالمجال مووول .. و اغلب اللي إيوون دبي ما يعرفوون غير مراكزها ..!!؟؟

شكلي بسوي مدونة يديده متخصصه في السياحة ..

الخروفة الثالثة:-

.

بسبب الإقبال على الكتب اللي أقراها و طبعا بسبب طريقة العرض .. اللي لاحظت وايدين تشجعوا على قراية الكتب .. ف قررت إني أفتح نادي مختص للقراءة فقط .. " أسوي دعايه " خخخخخخخخخ ..

.

الخروفة الرابعة:-

.

في خاطري أتعلم شي واحد في حياتي إني أحمد الله و أشكره يوميا على النعم اللي عندنا، في كذا مطار لما أسيرلهم و من بينهم كطار تركيا الطامة الكبرى تتعب تعب و تهلك لين ما نطلع من المطار .. أو حتى في الطلعة، و يوم أكون هنالك على مطاراتهم، أقوول و الله مطار دبي نعمه و نحنا مب حـــاسين يعني يوم أفقد النعمة أتذكرها و هاللي قاهرني ..!!

صدق مطار دبي غـــــــير رااااااااااحة نفسية .. بس ما حبيت مطار ترمينال 3 حبيت السوق الحرة اللي فيه كل الطياايير .. أما اللي في ترمينال 3 حسيت كأني في مركز بس حلو بعد و الحمد الله ما أبا أذم عشان وقتها ما أقووول وين دبي ..

.

الخروفة الخامسة:-

.

مستانسه إنه رمضااان ياي و الحمد الله، و إن شاء الله ألتزم بالجدول اللي بسويه .. لكن في شي بفتقده في رمضان و اللي هو الشلق .. أحس من زمان ما سمعت حد ينقع شلق و الشلق هو " الألعاب النارية " .. صدق صووت الشلق يحسسك برمضــان .. تحس أجواء فرح بعد صلاة الترااااويح .. لكن شو بنقوول سلامة الإنسان فوق كل شي ..

موضة هالإسبوع ..

.

.
.

أحس من زمان ما كتبت شي..

و الله هالإسبوووع كان متعب، ما خبرتكم أشتغل تطول الحين في واحد من المراكز الصيفية ..

.

.

أعرف الحين بتقوولوون شو يخص هالشغل التطوعي في المحاماة ..؟؟

.

.
.

ما يخصه أبدا في مجال المحاماة، لكن نحنا نظامنا في الإمارات شوي مختلف، يعني أنا الحين صح درست قانون لكن ما أقدر أشتغل ويا المحامي في المكتب و في أغلب الدول إنه نشتغل مع المكتب و مع مروور مده معينه بعطين يعطونك رخصة المحاماة، نحنا هني المشوار شوي طويل، يعني بعد ما نتخرج نقدم أسامي لوزارة العدل و نتريا لين ما يطلعن، و بعدين ندرب في هالمعهد لمدة 6 شهور، و الصراحة لو درسنا في المعهد بدال الجامعة، ما أدري متى بيطور نظام دراسة القانون في الوطن العربي..

.

و أنا عديت فترة ال 6 أشهر و الإسبوع اللي طاف طلعت علامتي جيد جدا و الحمد الله، و الحين لازم أحول لمكتب محاماة لمدة 6 شهور .. و لقيت الحمد الله، لكن بياخذ وقت بعد يعني المكتب لازم يطرش رسالة للوزارة و الوزارة ما أعرف شو تسوي، ف عشان جي قلت أطوع في مكان و لا أتم جي بطاليه و الله مللل..

.

.

.

موضة رقم 1

.

.

و اليوم بغيت أرمس عن موضة كأس العالم اللي لاعت جبدي منه الصراحة، أنا ما أتكلم عن المدونات هني، أتكلم عن اللي قاعد يستوي في البلاك بيري، طبعا هني كل واحد حر في إختيار مواضييعه و شو ما يبا ينزل على راحته..

.

.

لكن عن طريق البلاك بيري اللي ما يعرف في الكورة غصب إستوى يعرف، لو لايعه جبوودهم من هالشي، بس ما أدري أعتقد المووضه الحين لازم نشجع و لا نكون متخلفين و لا شو بالضبط..

.

و اللي أثار إستغرابي أكثر و أكثر إنه البنات ماشاء الله تبارك الرحمن عليهن، يعرفوون أسامي المدربين، طبعا مب من ناحية الجدارة يعرفون من ناحية الوسامة..

و كل واحده حاطتلها علم عدال إسمها ، بالعكس ها بعد على كيفها و هي حره دامنها مب مسوين إزعاج..

لكن العله يوم تبدأ المبارة.. أنا شلي فييييييكم.. ليش إطرشوولي ما أبا أعرف شو إستوى .. ياليتهم يطرشوون يوم تنتهي المبارة..

يطرشوون التقرير الكامل عن المبارة، ما بقى إلا و نيلسها بدال المعلق الرياضي..

حشروا اللي يتابع هالمبارة مب اللي عندكم على اللسته تسوون ضجه، و لازم نعرف إنكم إطالعوون.. غصب هوو ..

.

.

طبعا هالكلام مب موجه لكل البنات، في بنات صح يتابعون و يشوفون و ما يحشرون حد، لكن أستغرب من اللي ما تعرف شو يعني قول و بلانتي و فاول و عطني باص، إستوت تعرف كل شي الحين بسبت كاس العالم ..

ما تلاحظون استوت السالفة مووضه .. ؟؟

.

لو تقوولوولهم كأس الخليج بتقولك إييييييييووووو" لووول "

.

هالكلام موجه فقط للخقاقات المغروورات كأنهم ماشافو كورة في حياتهم ..

كرهت حياتي وين ما أسير أشووف أعلام كاس العالم مراكز مطاعم شوارع، ماروووم أتنفس، و حتى النت صدمووني قووقل يوم كانوا حاطين لوقو كاس العالم زين ما صحت ..

خلاص بغير الموضووع لموضووع ثاني منرفزني من فترة بعد

.

.

موضة رقم 2

.

.

و هاي شكلها مووضوه يديده قابله للإنتشار، و كلما زادت درجة الحرارة نص درجة أي نص إلا نقطة كل حد صور درجة الحرارة و حطاها، و حشروونا اليوم إستوت الحرارة مادري كم ..

.

.

.

و عفان الله ماشي شغل إلا يالسين تصوروون و تحطوون، شو الموضوع بالضبط، ما أدري و كل شوي تتغير الصورة مره يزيد و مره يرتفع، كأنه منو الأسرع فيهم يحط ..

شكلهم ما ينزلوون من سياييرهم موول ..

.

لا و بعد يعدلوون الصورة و يكشخووبها لوووووول حركــات و الله هههههههههه

.

.

ملاحظة/ أقصد البلاك بيري

.

.

.

.

و اليوم و أنا سايره أشتريلي جريدة جان أشوف إنه اليوم 17/6 اليوم الأول للمهرجان، و الصراحة إنصدمت ما توقعت إنه المهرجان بدا، لأنه كل مره دبي قبل لا يبدأ فيها أي مهرجان تحس إنه المهرجان واصل، يعدلون الشوارع و يزينون الشير، و يغيروون المراكز و تشووف صور مدهش في كل مكان، لكن فجأة إنقرض مدهش من الأزمة الإقتصادية، و بدت دبي ما تهدر فلووسها في كل شي ..

و يااااااااسلام الأسعار نصها طاااااااااايحة و رخيــــصة هذا أهم شي و أحلى شي في الموضوع ..

عكس التيار و مرة أخرى " مسلسل أوراق الحب "

اليوم الله يسلمكم وصلني كم من برودكاست و كان بعد عن مسلسل أوراق الحب.. و أكيد بتقولوون هاي بلاها ما عندها شغله إلا هالمسلسل، لكن أنا الحين في بالي أقول شي لازم أقوله و لازم أرد على هالمسج .. !!
شوفو شو يا في المسج ..


( اليوم أوعدكم إنه هذا بيكون البرودكاست الأخير بخصوص مسلسل أوراق الجرجير.. أقصد أوراق التنين .. أقصد أوراق الحـــــب ..
" مال قناة بوذبي لاه "

بعد عناء مشاهدة 30 حلقة من التفاهة و الرمسة المحتاسة المنقعة من مجموعة من المتأمرتين يعني اللي يبون يستون إماراتيين بالقوة الجبرية..
إستنتجت المعادلة التالية لما نمزج المكونات التالية:-

1. مخرج زلموكة قرعته و لا قرعة هتشكوك..
2. كاتب زلموكة كاتب قصة و يتحرى كاتب قصة تايتانك.
3. 90% من ممثلين و ستاف المسلسل زلموكة على حنابلص على مغربيات.
4. بطلة مغربية مركبة مطبات أم القيوين بدال شفايفها.
5. ميزانية مفتوحة من تلفزيون المملكة الأردنية الهاشمية، أقصد تلفزيون أبوظبي.
6. مشرف إماراتي حطوه يشرف على المسلسل و كل اللي سواه أنه ظاف حروف " ياه " بعد كل كلمة في الحوار عسب ينقال أنه مسلسل إماراتي " ياه " يستخدم الهجة الظبيانية.

ينتج مسلسل عيب يبنقال عنه مسلسل، أصلا بس مجموعة لقطات سياحية أبوظبي و لندن على قصص جب عبيطة مالها هدف و لا مغزى على قائمة طويلة من تنقيعات الممثلين على نهاية عبيطة و سطحية أكبر من المسطح المائي اللي على قرعة المخرج الخزوز الله يلوع بجبده على لوعة الجبد اللي سببها لنا..

ما أقول غير جسبي الله على يوم اللي خلينا قوم " زعطر و زطون و ليش هاظ يازلمة " ينتجون هالتفاهة على إنها إماراتية..

و نعلن نحن الإماراتيين بأننا براء من هذا العبط الي إنقال مسلسل إماراتي.. )

طبعا أنا من قبل منزله بوست عن " مسلسل أوراق الحب شو سالفته " و ما كنت أعرف شو الموضوع و قلت خلني أتابعه و تابعته و حطيت رايي بكل حريه في هذاك البوست ..

لكن أنا بعد ما شفت 30 حلقة إستنتجت الآتي و هالبوست إهداء للي كاتب هالمسج و نشراه، طبعا من حق كل واحد يعبر عن رايه بالشكل اللي يشوفه.. لكن في هالمسلسل شي إيجابي بعد و أنا بتكلم عن الإيجابيات ..


1. القصة كانت حلوة الصــراحة و من زمان ما شفنا مسلسلات من هالنوعية، الصراحة تعبنا من الضرب، و الصياح المؤرف و الخيانة و النهايات التعيسة اللي تلوع الجبد، هذا صح إنه ماله هدف لكن رد قصص الحب القديمة.. قصة يديده من زمان ما شفنا نفسها، يمكن مبالغ فيه لكن أنا أعلق على القصة كقصة كانت حلوة..


2. يمكن هالكلمة تكون قويه لكن هذا الواقع هالمسلسل أقوى دراما إماراتيه من وجهة نظري، أنا ما أتكلم عن مستوى الإمارات أنا أتكلم عن مستوى الخليج، كان قوي وااايد، و لاحظت واايدين يسألوني عن بعض الكلمات الإماراتية، و الكلمات الغير واضحة..

3. و المسج يتمصخر على رمستهم، زين منهم و الله قدروا يرمسوون، رمستنا مب سهلة، صعبه و نحنا على بالنا دول الخليج يفهمون كل كلامنا لا ما يفهموون في وايد كلمات غريبة عليهم و منهم يضحك عليك يوم ترمس لأنه مب فاهمين أو كلمات غريبه عليهم..

و هذا المسلسل الوحيد اللي فيه الممثلين حاولوا قد ما يقدرون يرمسوون اللهجة الإماراتية، و زين منهم و الله، إنهم تكلموا لهجتنا، و ترا لهجتنا صعبة عليهم.. مب هينه .. و يمكن هم خذوا أبطال من دول الخليج على القصة مب إلا جي و ياخذون و لا تنسوون مب كل الممثلين بيوافقون على القصة، أو يمكن حتى ياخذ شهره هالمسلسل، نفس حياة الفهد تراها مثلت أبلة نورة بس ما كانت ترمس شراتنا و ترمس كويتي، بس إشتهر لأنها في المسلسل .. !! و على الأقل هذا أحسن من نجمة الخليج اللي ما يمثلنا مووووووووووول ..

و الصراحة ما عرفنالكم، يوم يمثلوون خليجيين مسلسلاتنا و ما يرمسوون شراتنا قلتوا ليش ما يرمسوون، و إذا حاولو قلتوا ينقعوون في الرمسة ..

أنا أشجع يدخلون من دول الخليج و بالذات الكويت حتى تقوى المسلسلات الإماراتية.. مافيها شي و مب عيب دامنهم بيرمسوون نفسنا و بيحطوولهم واحد يضبط رمستهم ..

4. و الكل محتج على ميساء مغربي و أنا كنت منهم، لكن بعد ما وصلت 25 حلقة، قلت المخرج عرف يختار أحس دوورها راكب و دورت منو ممكن يركب لدورها لكن ما لقيـــــت .. هي تنفع ..

5. التصـــــــوير كان روووووووووعة الصراحة وايد معدل المسلسل، و صح كان دعاية لبوظبي بس أنا ما أشووفه شي غريب، بالعكس أحسبه شي حلو الناس بتغير بتسير تشوف بوظبي مب كله بس دبي .. و أنا شفت بوظبي حلوة وااايد من هالمسلسل و تبقى حلوة العاصمة ..

6. كقصة و مسلسل نـــاجح، و أبغي أشوفه مره ثانية ..

السلبيات:-

بعض العادات اللي يسوونها لا تتصل بالإماراتيين أبدا، و سوالف يسوونها مالنا خص فيها، القصة غير صالحة للمجتمع الإماراتي كثيرا و هي أنسب للمجتمع الأردني .. و حتى وضع بعض الجمل في غير مكانها.. و البذخ الزايد ..

أعرف إني عكس التيار و أعتقد 98% من الإماراتيين معارضيني .. لكن هذا هو الواقع، صح المسلسل تغلبه السلبيات لكن فيه إيجابيات بعد.. أحين بتشووفون المسلسلات الإماراتية كيف بتتغير هاي مجرد قرصه إلهم، و بتشوفون الدراما الإماراتية بسبت هالمسلسل إذا ما تغيرت ..

مسلسل " أوراق الحب " شو سالفته؟؟

أنا الصـــراحة ما كنت أتابع هالمسلسل، لكن بسبب الضجة اللي إستوت في الشارع الإماراتي، و المطالبة بوقف هذا المسلسل، قلت خلني أطمش و أشوووف شو السالفة؟؟ بلاهم الناس ما عندهم إلا سالفة هالمسلسل، و إنه ماله علاقة بالإماراتيين .. !!

وشفت الحلقــات على اليوتيوب 11 حلقة بس لقيت ..

كقصة حلوة لين الحين ماشي وايد أحداث و قصة حب هي و أحس الكاتب يبغي يسوي مسلسل تركي شكله

ثاني شي الصــراحة أول مرة يرمسوون إماراتي ممثلين من دول الخليج يرمسوون شراتنا دوم نسمعهم يتكلموون لهجاتهم، لو إنهم واايد ينقعوون و ينطقوون غلط و خص حمد لوول يظحكني شوي يحيس لسانه شرات العمانيين .. إلا إنه يرمس يحاول.. و قريت إنه معينين واحد يعلمهم لهجتنا و الله زين لأنها صعبه شوي ..

و يمكن اللي ما يخالط إماراتييين ما بيعرف ، صح إنهم يرمسوون إماراتي لكن ساعات يدخلوون كلمات إماراتيه لكن ما يخصها في الجملة، يعني كنت أظحك أقوول شو يخص هالكلمة، شو الموضووع بالضبط .. ؟؟

يعني من اللي الحين أذكره يوم قالت ميساء مغربي " تفضلوا إهبشوا، تفضلو إهبشوا" ظحـــــــــــــــكت الصراحة ..

نحنا يوم يكونون عنا ضيوف أو أهلنا و نباهم ياكلون نقوولهم إهبشوا أو هبشوا مع تكرارها، لكن مب تفضلوا هبشوا تفضلو لوووووووول عمري ما سمعتها، هل هم من هذا يبوون يفمهوون اللي ما يفهم لهجتنا إنه معناة إهبش تفضل هههههه ما أتخيل حد يستخدمها و يوم إيوونه الناس يقولهم هبشوو خخخخخخخخخ مع إنه ما يخصه ..

في شي ثاني ذلوونا ذل من كثر ما يقوولوون خالتيه و عمتيه، نحنا مب كله نقول خالتيه و عمتيه، نقوول خــالوه و عمووه ..

و حتى كلمة ختيه، يوم بزقر إختي أو بكلمها ما بقول ختيه، و الله يمكن هل بوظبي يقوولوونها و الله اعلم ..

المهم الشي الثاني اللي لاحظته، شحقى مستحقرين الشيلة في هالمسلسل ..؟؟

لو عينوووني جان راوويتهم كيف إنلف الشيلة .. خخخخخ

و أنا ما برمس عن سالفة ميساء يوم سارت لندن هي و أمها و عقوا الشيل في ناس يعقون و هم قلييليين، بس في تناقض مره لابسه شيلة و مره لا لووول وين تبا .. بنخلي هالموضووع يولي شويه.. و ما بتكلم عن الشرب لأنه ساعات يستوي بعد ..

لكن اللي إستغربت منه و عمري ما شفت هالشي و حتى في المسلسلات المصرية ..

يوم ميساء خطبها حمد و أمها يت بيتهم و كانت واقفة تستقبلهم؟؟ شو مب مصدقه لول ..

نحنا ماتستوي هالأشياء عنا .. حتى اللي ويها لووح تستحي تيلس و يا أهل خطيبها و هم بعدهم ما خطبووها ..

لاااااااااا و بعد تقول حق إخت حمد إنتي متزوجة .. يعني أشكره أنا كنت أكلم حمد و أعرفه من قبل و لا أمها قالت شي و لا أمه، قلنا فرييي لكن مب لهالدرجة نحنا رخـــاص و كل شي عـــادي ؟؟

و المشكلة في إماراتيات في المسلسل ما إنتبهوا لهالنقطة و المشكلة الأكبر ميساء عايشة في الإمارات و عارفه هالشي شو هالقواااه .. يعني صلحوا بعض الأمووور .. و اللي إستغربت منه إنه أم حمد عقت العباه من دخلت.؟؟؟ لوول شو السالفة ؟؟ نحنا مب جي إنتم بعبيييينا يوم نسير عند ناس غرب تعودنا على هالشي ما نعقب عبينا ..؟؟ حتى ساعات ربعنا يوم نسير بيوتهم ما نعق من ندخل ..

أوكي بنقووول هم فري وااايد و عادي ... لووول لكن مب لهالدرجة عادي ميساء إتسير بيت خطيبها و أول ما تدخل عقت الشيلة و يلست و الشعر مفتوح ياااااااااااا سلااااااااااااام سلم .. و الأمهات مستانساااااااااات هههههههههه .. و النعم و الله هههههههه ... و من متى البنت تسير بيت خطيبها، و المشكلة إنها بعدها ما ردت عليها يا سلام سلم ..

و ثاني شي شو هالقصـــور اللي مصورييييينها واااايد كــــبــــــــــــار قلنا تجـــار لكن مب كل التجـــار جي بيووتهم قصـــــــــــــور و الحوي هالكبر ماشاء الله ... شوي غيرو حطوا قصر و بيت عوووووووود .. !!

نخلي هالشي.. المفروض من عقب مسلسل نجمة الخليج يتغير الموضوع نجمة الخليج، لا صور حياتنا و لا شي و اللي صدمني إنه الكاتبه وداد الكواري.. و المخرج كان من دولة خليجية .. و الغريب إنه الممثلين الإماراتيين كانوا يصوروون عادي كأنه حياتنا جذي ..

هذا المسلسل رد نفس السيناريوا مؤلف إردني، و مخرج أردني و المشكلة اللي يغني بعد من بلاد الشام على الأقل الجسمي شوي يغني .. و الإنتاج فقط إماراتي

و عن راشد و هالسورية نسيت إسمها، و كيف ميته على راشد و تباه و تقوله أحبك و تسيرله المستشفى، ما أدري ليش مب مشتهيتنها في المسلسل تنرفزني ...

المهم أنا ما أعرف الناس ليش مسويييل بلبله عليه و لين الحين يطالبوون بإنه يتوقف، لكن صح عليه وايد سلبيات لكن فيه إجابيات بعد شوي يرمسوون عدل لو شوي ينقعوون لا مب شوي وااايد ههههه بس أحسن بوايد .. و التصوير زين، لكن أحس كأنه دعايا لبوظبي ما أعرف ليش ..

لكن هالمسلسل ناقل اعتقد المجتمع الأردني أكثر من هو الإماراتي .. عشان جي يا " أورق الحب " من أبوظبي لين الفجيرة محتجين عليك .. فكيف 7 إمارات متحدين يحتجون إلا جي أكيد كلهم حاسين إنهم ما يمثلهم .. صح أو لا ؟؟

صدقووني هالمؤلف يبا يسوي مسلسل تركي نسخة خليجية، إلا قصص حب هو و أخوه ..

بلاهم الناس يفاولون على عمارهم .. ؟؟

السلام عليكم ...

بــــــــــــــــــلاهم النـــــــــــاس جي يفاولوون على عمارهم، قلنا مصخرة.. بس مب لهالدرجة توصــــل عفان الله ..

صدق يوم قال الرسول عليه الصلاة و السلام " لا تتمارضوا، فتمرضوا، فتموتوا. "

يعني إييبون حق عمارهم المـــرض..

السالفة الله يسلمكم، اليوم يوم نشيت من الرقـــاد .. وحده من ربعي مطرشه برودكاااست " بــاجر بسوي عملية في القلب دعواتكم لي أقوم بالسلامة "

أنا هني تيبست من الزياغ، قلت شو السالفة و من شو ياها القلب ما أحيدها تشكت من شي عشان إييها القلب ..!! و عكر مزاجي بكبره على الصبح ..

المهم طرشتلها مسج قلت خلني أتأكد يمكن فيها القلب بعد و أنا ما أدري.. !!

قلتلها فلانه بتسوين عملية في القلب؟ ؟؟

قالتلي هي ..

و المشكلة إنها ما ترد بسرعة

و آخر شي قلت ليش شو فيج في القلب؟؟

و ماردت و حتى قلت بتصل حق وحده من ربيعاتي كانت من كم من يوم وياها فأكيد تعرف شي ..

و ما اعرف شقى نسيت السالفة و تخيلوا ردت عليه العصر تقووولي بكل بروود ..

أبد و الله يالغالي بس غلاك يزيد

ز قلبي ما يكفي غلاك

لا تخاف عملية بسيطة

بس بوسع قلبي

لأن غلاك يزيد

و قلبي ما يكفيه غلاك ..

نعم .. !!!؟؟؟

هالوقت طلع كله إستهباااال هههههههههههه ..

تنرزفت من الخــــــــــــاطر و أنا طول هالوقت مصـــدقه و على بالي صدق و آخر شي يطلع مسج سخــيف، المهم أنا هزبتها شوي و لو كانت عدالي جان خلاص سطعتها هههههههههه ... !!!

ما أعرف شو سالفة العالم بيمووتوون على هالمسجات، يزيغون الناااااس على الفاضي ..

لا و اللي قهرني من زمان بعد أذكر هالمسج اللي يوصل و الله فلانة توفت .. و آخر شي يطلع شي ثاني ..

ربيعتي تخبرني اليووووم، إنها كانت طالعه و سايره واحد من المراكز ووصلها مسج من وحده عن هالشي إنها توفت و ما أعرف شو .. و هي صدقت على بالها ريلها مطرش هالمسج، بس زين إنها كملته و طلع شي ما يخصه.. ولا جااان سوت مناااااااحه في المركز هههههههه .. !! بس ربيعتي بعد ما قصرت إتصلت فيها و عطتها كم من كلمة عدله .. !!

و الله لوووووووووعت جبد شوووها .. أنا لو كنت برع و طالعه بتخترب سيرتي و مزاجي بيخترب يوم كامل و بتم طول اليوم بتنرفز .. صدق ناس فاضية ...

ليكووون حد منكم شرات هذيلا هههههههه ..

مــقهورة..

اليوم الله يسلمكم كنت سايرة لمكتبة دبي للتوزيع أبا أدور كتاب قريته في مدونة " و غدا يوم جديد " لكن مادري شو تلخبطت في شارع الشيخ زايد و مالقيت المكتبه مع اني دوم أسير مب أول مرة.. و إستوت الساعة 6:35 قلت خلني أرد البيت و بيأذن المغرب ماشي وقت ...


و أنا راده البيت، بنت خالوه تتصل فيني و تلفوني في الشنطة على السايلانت، و شوي ويرن تلفون الدريوليه (السواقة)، جان تعطيني التلفون تقولي إنه إختي المتصلة ..

جان تقولي إنتي وين الحين، زغت الصراحة قلتلها راده البيت شو بلاج، جان تقولي نحنا على البحر، و في يخت صغير فيه أربع أجانب إنجليز و موقفينه على السيفه ويالسين يشربون خمر و معلين على الأغاني سكرانين.. " حسيت فجأه إني أشتغل في التحريات و أنا ما أدري " خخخخخخ .. جان أقوولها أنا الحين يايه..

جان أقول حق الدريوليه سيري البحر بسرعة، و بيتنا قريب للبحر، وسرت و نزلتني، و تشووفووني أربع أدور هاليخت اللي يقوولوون عنه، جان يقوولوولي هكو هناك..

قلتلهم بنبلغ الشرطة لكن أنا ما أقدر أبلغ لين ما أشووف بعيني و هم يحلفوون إنهم شافوا جان أقوولهم بس أنا ما أقدر أبلغ إذا ما شفت بعيني سرت صوبهم و أشوف الريال يرقص و الحرمة مب متوازنه لكن ما اعرف هل هي ترقص ولا شو الموضووع، جان أقوولهم ما أشووفهم يشربوون، كنت أبا أبلغ لكن ما أبا أقول للشرطة هي شفت و آخر شي يطلع عصير و أنا أتمشكل آخر شي و يالشرطة.. !!

إختي قالت أنا شفت بعيني و حتى بنت خالوه قالت نفس الرمسة جان أقوولهم إذا إنتو شفتوا إتصلوا،
و على طوول يتصلوون في الشرطة و إختي تقوولهم بسرعه تعالوا لأنهم تحركوا و كانوا سايرين صوب أتلانتس ..

و شفنا يهال على السيفه جان أقولهم إنتو شفتووهم، و كانو صغار صف رابع و ثالث، قالو هي كانوا سكرانين، و حتى وحده نزلت عدالهم ترقص سكرانه و سارت سيارتها.. و قالو شي إنصدمنا منه هو ماصخ بس اليهال يشووفوونه يضحك..

سمعونا و نحنا نتصل جان يقوولوولنا لو تشتكون السالفة بطيح عليكم لأنه عندهم تصريح يشربوون " أنا الصراحة إستغربت من رمسة اليهال، هذيلا يهال أكيد أهاليهم قالولهم مالكم خص فيهم، بس بعد غلط، لأنه يوم بيكبر بيقوول مايخصني، مايستوي جذي يا ناااس ... جان أقوولهم اللي عنده ترخيص يقدر يشرب في بيته بس مب برع على البحر و إذا شفتوا شي غلط إتصلو بالشرطة .. كنت وياااااااهم حاااار بحااااااااااار ههههههههه


و مايواحيلهم دقيقتيييين و وصلوا خفر السواحل و قالوولنا وينهم قلنالهم وييين إتجهوا و قالولنا أذوكم أو إنتوا إذيتوهم قلناااله لا الحمدالله.. و على طووول إتجهوا لليخت.. و نحنا مستاانسين كان أكشن الصراحة .. !! حققنا إنجاز هههههه


لكن أنا كتب هالسالفة مب عشان شي، لكن عشان شي واحد نحنا عنا قواانين و لله الحمد لكن في قوانين تتنفذ و قوانين ما تتنفذ ...
إلا إذا بلغت... لو مر الشرطي ما يقوول شي، نفس اللي على البحر إمفاااصيخ، و الله أنا أستحي أمشي، و سوري على هالكلمة "ريال بهاف مايوه يمشي على البحر " و الله تلوع جبدي و بعد الحريم نفس الكلام .. إحترموا قواانينا ياااناااااس.. منوو قال إنه أهل دبي فرييييييييي عادي كل شي عندهم بعدنا متمسكين بعاداتنا و تقاليدنا و فوق هذا كله فيه دين يحكمنا ..

و حتى الموولات لو هناك قوانين إنه ممنوع لبس اللبس الفاضح أو ريال و حرمته يتلاوون أو يسووون أشياء ما بعد اللويات هههههه بس بعد مافي إحتراااااااام موووليه للقانون .. !! تعرفوون ليش .. ؟؟؟

" لأنه نحنا الشعب ساكتين عنهم، لو كل واحد منا بلغ و هلكنا شوي الشرطة، من البلاغات الأمووور بتتغير "

و الصراحة الشرطة ما يقصرووون، و الله اليوم في دقيقتين وصلوا ماشاء الله..

أنا هالمرة ما برد على الحكوومة و الشرطة، بس لاعت جبدي كل ما إستوى شي قالوا الحكومة راضية ولا الوزارة مادري شوبلاها، و الله الخلل منا نحنا كله ساكتين..
أوكي إنتوا ما عندكم لسااان تكلموا قووولوو شي، ملينا كله نرد على غيرنا و نحنا ساكتين، أكييييييييد هم بيتمادووون لو شافوونا جذي ساكتين شي طبيعي يعني، الشعب ســـاكت، لكن من عقب اللي شفته اليوم قررت أنا و اللي ويايه أي شي نشوووفه على البحر غلط ما عنا غير

" 999 "

الشرطة

طبعا مب بس البحر، في كل مكان و كل مكان له إسلوبه يعني في المول أكيد ما ببلغ الشرطة ببلغ إدارة المول .. شكلي بسوي حمله هههههههه ..

و أتمنى من كل إماراتي و مقيم و زائر إذا شاف الغلط يغير بأي طريقه من الطرق السلمية

و شكرا

زاااااااااااد سعر البتروووووول ..

السلام عليكم ..

و عسى أن تكرهوا شيئا و هو خير لكم، لكم أتمنى هالزيادة تكون خير و بركة، و الناس يالسين يقووولووون إلا 15 فلس، و صح 15 فلس ما يسوى شي، لكن هالزيادة قالوا بتزيد و ما أعرف كم بيوصل هال 15 فلس .. و أنا ما أحاتي هال 15 فلس أحاتي شي واحد إذا زاد البترووووول، يعني كل شي بيزيد، و كل حد بيقووول البترول زاد يعني بنزيد كل شي، و الله يعين راعي الدكان شكله بيقوولنا توصيل البيوت ب درهم .. و الله عادي يسويها ..

و الله يستر الصراحة، نحنا ما صدقنا نزلن الأسعـــــــــار بسبت الأزمة و يا حلاة المهرجان يكون السوق طايح من الخاطر ههههههه صح البضاعة جديمة لكن يمشي السوق و كل شي يرخص ..

المشكلة الحين الناس يقوولوون إلا 15 فلس يعني لو فولنا السيارة الزيادة بتكون 10 أو 15 درهم يعني عــادي.. بس أنا ما أعرف ليش مب مرتاحة، أقوولهم ورا هالزيادة زيادة في كل شي، و سعر البترول كتبوا في الجرايد إنه بيستمر في الزيادة، و كل شوي بيزيدون فلس و الله يعين كم بيوصل، و السوق بيرتفع و كل شي بيرتفع .. !! أنا مستغربه ليش مستخسرين هال 15 فلس ؟؟؟

و الله أنا مب زطيه(بخيلة) لكــــــــــن أشوف الناس ما يشووفوون شو بيستوي عقب شهر 4 شهور، بس يشووفوون اليوم و خلاص.. !! صح انه هالمبلغ قليل و ما يسوى شي، لكن الزيادة مب بس بترووول كل شي عقبه بيزييييييييييد ..

و نحنا بعدنا في أزمة إقتصادية، و الحمد الله دبي قاعده تحاول و تحاول إنها تطلع من هالأزمة، و الزيادة لصــالحها، بس أنا ما أبا التضخم يرد نفس ما كـــــــــــان ..

و كان الله في عوننا .. !!