السبت، 29 مايو 2010

مسلسل " أوراق الحب " شو سالفته؟؟


أنا الصـــراحة ما كنت أتابع هالمسلسل، لكن بسبب الضجة اللي إستوت في الشارع الإماراتي، و المطالبة بوقف هذا المسلسل، قلت خلني أطمش و أشوووف شو السالفة؟؟ بلاهم الناس ما عندهم إلا سالفة هالمسلسل، و إنه ماله علاقة بالإماراتيين .. !!
وشفت الحلقــات على اليوتيوب 11 حلقة بس لقيت ..
كقصة حلوة لين الحين ماشي وايد أحداث و قصة حب هي و أحس الكاتب يبغي يسوي مسلسل تركي شكله
ثاني شي الصــراحة أول مرة يرمسوون إماراتي ممثلين من دول الخليج يرمسوون شراتنا دوم نسمعهم يتكلموون لهجاتهم، لو إنهم واايد ينقعوون و ينطقوون غلط و خص حمد لوول يظحكني شوي يحيس لسانه شرات العمانيين .. إلا إنه يرمس يحاول.. و قريت إنه معينين واحد يعلمهم لهجتنا و الله زين لأنها صعبه شوي ..
و يمكن اللي ما يخالط إماراتييين ما بيعرف ، صح إنهم يرمسوون إماراتي لكن ساعات يدخلوون كلمات إماراتيه لكن ما يخصها في الجملة، يعني كنت أظحك أقوول شو يخص هالكلمة، شو الموضووع بالضبط .. ؟؟
يعني من اللي الحين أذكره يوم قالت ميساء مغربي " تفضلوا إهبشوا، تفضلو إهبشوا" ظحـــــــــــــــكت الصراحة ..
نحنا يوم يكونون عنا ضيوف أو أهلنا و نباهم ياكلون نقوولهم إهبشوا أو هبشوا مع تكرارها، لكن مب تفضلوا هبشوا تفضلو لوووووووول عمري ما سمعتها، هل هم من هذا يبوون يفمهوون اللي ما يفهم لهجتنا إنه معناة إهبش تفضل هههههه ما أتخيل حد يستخدمها و يوم إيوونه الناس يقولهم هبشوو خخخخخخخخخ مع إنه ما يخصه ..
في شي ثاني ذلوونا ذل من كثر ما يقوولوون خالتيه و عمتيه، نحنا مب كله نقول خالتيه و عمتيه، نقوول خــالوه و عمووه ..
و حتى كلمة ختيه، يوم بزقر إختي أو بكلمها ما بقول ختيه، و الله يمكن هل بوظبي يقوولوونها و الله اعلم ..
المهم الشي الثاني اللي لاحظته، شحقى مستحقرين الشيلة في هالمسلسل ..؟؟
لو عينوووني جان راوويتهم كيف إنلف الشيلة .. خخخخخ
و أنا ما برمس عن سالفة ميساء يوم سارت لندن هي و أمها و عقوا الشيل في ناس يعقون و هم قلييليين، بس في تناقض مره لابسه شيلة و مره لا لووول وين تبا .. بنخلي هالموضووع يولي شويه.. و ما بتكلم عن الشرب لأنه ساعات يستوي بعد ..
لكن اللي إستغربت منه و عمري ما شفت هالشي و حتى في المسلسلات المصرية ..
يوم ميساء خطبها حمد و أمها يت بيتهم و كانت واقفة تستقبلهم؟؟ شو مب مصدقه لول ..
نحنا ماتستوي هالأشياء عنا .. حتى اللي ويها لووح تستحي تيلس و يا أهل خطيبها و هم بعدهم ما خطبووها ..
لاااااااااا و بعد تقول حق إخت حمد إنتي متزوجة .. يعني أشكره أنا كنت أكلم حمد و أعرفه من قبل و لا أمها قالت شي و لا أمه، قلنا فرييي لكن مب لهالدرجة نحنا رخـــاص و كل شي عـــادي ؟؟
و المشكلة في إماراتيات في المسلسل ما إنتبهوا لهالنقطة و المشكلة الأكبر ميساء عايشة في الإمارات و عارفه هالشي شو هالقواااه .. يعني صلحوا بعض الأمووور .. و اللي إستغربت منه إنه أم حمد عقت العباه من دخلت.؟؟؟ لوول شو السالفة ؟؟ نحنا مب جي إنتم بعبيييينا يوم نسير عند ناس غرب تعودنا على هالشي ما نعقب عبينا ..؟؟ حتى ساعات ربعنا يوم نسير بيوتهم ما نعق من ندخل ..
أوكي بنقووول هم فري وااايد و عادي ... لووول لكن مب لهالدرجة عادي ميساء إتسير بيت خطيبها و أول ما تدخل عقت الشيلة و يلست و الشعر مفتوح ياااااااااااا سلااااااااااااام سلم .. و الأمهات مستانساااااااااات هههههههههه .. و النعم و الله هههههههه ... و من متى البنت تسير بيت خطيبها، و المشكلة إنها بعدها ما ردت عليها يا سلام سلم ..
و ثاني شي شو هالقصـــور اللي مصورييييينها واااايد كــــبــــــــــــار قلنا تجـــار لكن مب كل التجـــار جي بيووتهم قصـــــــــــــور و الحوي هالكبر ماشاء الله ... شوي غيرو حطوا قصر و بيت عوووووووود .. !!
نخلي هالشي.. المفروض من عقب مسلسل نجمة الخليج يتغير الموضوع نجمة الخليج، لا صور حياتنا و لا شي و اللي صدمني إنه الكاتبه وداد الكواري.. و المخرج كان من دولة خليجية .. و الغريب إنه الممثلين الإماراتيين كانوا يصوروون عادي كأنه حياتنا جذي ..
هذا المسلسل رد نفس السيناريوا مؤلف إردني، و مخرج أردني و المشكلة اللي يغني بعد من بلاد الشام على الأقل الجسمي شوي يغني .. و الإنتاج فقط إماراتي
و عن راشد و هالسورية نسيت إسمها، و كيف ميته على راشد و تباه و تقوله أحبك و تسيرله المستشفى، ما أدري ليش مب مشتهيتنها في المسلسل تنرفزني ...
المهم أنا ما أعرف الناس ليش مسويييل بلبله عليه و لين الحين يطالبوون بإنه يتوقف، لكن صح عليه وايد سلبيات لكن فيه إجابيات بعد شوي يرمسوون عدل لو شوي ينقعوون لا مب شوي وااايد ههههه بس أحسن بوايد .. و التصوير زين، لكن أحس كأنه دعايا لبوظبي ما أعرف ليش ..
لكن هالمسلسل ناقل اعتقد المجتمع الأردني أكثر من هو الإماراتي .. عشان جي يا " أورق الحب " من أبوظبي لين الفجيرة محتجين عليك .. فكيف 7 إمارات متحدين يحتجون إلا جي أكيد كلهم حاسين إنهم ما يمثلهم .. صح أو لا ؟؟
صدقووني هالمؤلف يبا يسوي مسلسل تركي نسخة خليجية، إلا قصص حب هو و أخوه ..

هناك 35 تعليقًا:

  1. LOOOOOOOOOOOL بالمد الطويل
    المسلسل مسوي ضجة حيل حيل حيل كبيرة وهذا بروحة نجاح بالنسبة للقناة وشهرة للممثلين والمنتجين
    بصراحة أنا ماشفت بدايته لكن...كانت شايفته وحبته فجأة وتعلق فيها وتكلموا وحبّو بعض...وتالي يوقف بويه أهله عشانها لأن يحبها...شنو هالحب؟ أي حب؟
    بعدين 30 حلقة عشان أثنين بيتزوجون, طيب أنا مالي؟ عنتر وعبله؟ قيس وليلى؟ من يكونون عشان أهتم؟ اممم...
    بس عجبني التصوير والاخراج! :)

    ردحذف
  2. هي التصوير و الإخراج كــان حلو بعد .. وحتى اللحن اللي في المسلسل حلو كان راكب ..

    بس شوي القصة فيها خلل.. و إلا ما إستوت ضجه، و الله أنا راسي عورني مسجات من غير في الجرايد في المنتديات شو السالفة بلاه هالمسلسل يبون يوقفوون شو القصة ما أعرف قلت خلني أشوووفه .. لكن من وجهة نظري أشوف هالمسلسل شوي طلع لهجتنا أكثر من المسلسلات الإماراتية إلا إنه في نفس الوقت و نفس ما قلت الكاتب ناقل مجتمعه أكثر من المجتمع الإماراتي

    ردحذف
  3. السلام عليكم ورحمة الله وبركاته ..

    الحمد لله بعيد عن شاشة التلفاز إلا قليل ..
    لا تهتمون شاهدوا في صمت ..
    الناس تدوري أي شي صغير حتى تنتقد ..
    حتى المسلسلات التركية محد تكلم عنها ليش تنعرض في قنوات الامارات ..

    الله يبعدني عن شر شاشات التلفاز :)

    ردحذف
  4. يوميات مضيف فى الطيران29 مايو 2010 12:18 م

    بصراحة عايز اقول حاجة ......فيه كلام كتير مكتوب ما فهمتوش لانه بلهجة اهل الامارات وده يمكن عمل عائق فى فهم الموضوع بالاضافة الى اننى لم اشاهد المسلسل اساسا
    المهم .....الموضوع اللى فات عن المياه مهم جدا وياريت نتعلم ازاى نحافظ عليها ......عندنا فى مصر النيل يجرى منذ الاف السنين ولم نعرف قيمته الا الان عندما بدات المشاكل مع الجيران الافارقة وبناء السدود ولم نتعلم بعد كيف نحافظ على نقطة الماء
    الماء كالبترول او اشد .......تحياتى

    ردحذف
  5. يبتيها على العوق الصراحة أنا أبدا مو بالعة هالمسلسل ..أحسه يحث على الخراب ..
    أمس أشوف حلقة منه ..
    وحده تكلم واحد غريب عنها (اللي هم مهره وحمد)
    وثاني شي وحده تشرد مع واحد كبر ابوها وتزوج من ورا اهلها
    وثالث شي سالفة الزواج من غير مواطنات

    والرمسة روحها صوب ..قلنا قالوا خالتيه وعمتيه مو مشكلة عاد(قلبي ناغزنيه )هذي ماصارت؟!! ..

    أنا بعد أشوف أنه المسلسل ماله هدف ولايسمن ولا يغني من جوع ..ويوقفونه ولا لا ...ماتفرق عندي

    الله المستعان ~

    ردحذف
  6. عبيد الكعبي..
    بالعكس المسلسلات التركية إستوت عليها ضجة بعد أو ما طلعت، بس الحين سكتوا النـــاس ... و الله مفتك الصراحة ماتشووف إلا شوي أحسلك ... بس انا بسبب اللي سمعته أقول بلاهم العالم قايمين على المسلسل أبا أعرف ..
    و شكرا على مرورك المدونة ..

    ======================================

    يوميات مضيف في الطيران ..

    شرفت المدونة، هنالك بعض المواضيع التي أقوم بطرحها باللغة العربية،و أعلم أنك لن تفهم اللهجة الإماراتية، موضوعي هو حول مسلسل يدعى أوراق الحب، الشارع الإماراتي إحتج عليه، و يريدوون إيقافه بأسرع وقت لأنه لا ينقل الصوورة الصحيحة للإماراتيين، و إنما كان تركيزهم على اللهجة فقط و الزي و المظاهر أكثر من القصة فلذلك .. فأنا لم أعرف ما سبب هذه الضجة و قمت بمتابعة المسلسل و هذا ما لاحظته هي قصة جميلة لكن لا اعتقد أنها تصلح لمجتمع الإمارات يمكن للمجتمع الأردني أكثر، لأنه هنالك بعض الأشياء لا تنطبق علينا كمجمع ..

    أما عن موضوع الماء، غريبه لم ترد هنالك و لكن سأقوم بالرد عليك هنا .. يا أخي هذا حال معظم العرب، لا يعرفون قيمة الشي إلا بعد فوات الأوان .. و هذه السدود ستسبب مشاكل مستقبلا، و مصر ماشاء الله شعب كبير يحتاج أن يستغل هذا النهر بأي طريقة كانت .. و كان الله في عونكم ... شكرا ..

    =========================================

    أم حروبي

    لول قلبي ناغزنيه لازم شوي النكهات الحلوة ههههههههه ... لا بعد يوم يقوولوون شوبلاج أو بلاك لوول غير ينطقوونها أظحك .. !! بس زين منهم و الله خخخخخ ..

    أنا بعد عشان جي أقلج هالسورية قاهرتني .. !!

    و أنا شراتج والله ما يفرق عندي يوقفونه أو لا .. ما يهمني .. بس أبا أعرف كيف بيسووون العرس لووول ما أعرف ليش فضووول اذا الخطوبه جي العرس كيف؟؟

    ردحذف
  7. حلوه قصته بس ياليتهم ممثلين اماراتيين مب خليج
    تابعته مرتين واحس صج صج مزودين و امباآلغيين
    قطعته فالمره لأنى احب الدلع الزايد
    احنا بنات اماراتييات مسترات الحمدالله
    هالمسلسل فصخ نص الحيآ الى فييه
    شوهوا سمعت الأماراتيات صج
    ربيعاتي الكويتيات والسعوديات والباجيين
    والله يسألونى انتوا جييه تكونوا .. يعني شرات المسلسلات
    اقعد سنه لين اوضح لهم .. وبالزور يفهمون
    امم الله يهديهم
    المهم سوري هآ رااأااي .. ما اقدر اكمل اكثر من جييه
    مشكورين

    ردحذف
  8. ههههههه
    والله أنا ما اتباع التلفزيون وايد بس شفت شويه منه واللي عجبني تصويره!,انتوا يا أهل الامارات أخبر بكلامكم وعاداتكم .. صحيح مبالغ فيه من ناحية البيوت وكأن الكل من الطبقة المخمليه, وفعلا كأنه واحد من مسلسلات الأتراك حتى في حركه سووها مثل لما يابو سياكل وداروا ورا الشخص في سيارته
    هذه الحركة بالضبط صارت في لميس ويحيا,,
    اكرر التصوير كان رائع!

    ردحذف
  9. وااااااااااااو

    قريت موضوعك بالكامل

    ماعندي تعليق لاني اصلا مااعرف المسلسل

    بس لهجتك تججججججنن
    ولو اني كثير جمل مافهمتها

    هههههههههههههه

    انا اصلا حبيت اللهجه الاماراتيه من بعد مسلسل ابله نوره^^
    جنااان لهجتكم
    مدري شلون ترمسون^^
    والا اذا تبون تقولون ايوه

    تقولون هيه^^

    عاجبتني صراحه^^

    ردحذف
  10. الحمدلله لا اهتم لهذا الجانب البته وكل شغلي الشاغل في البحر والغوص ولهذا السبب قليل المتابعه .
    ولا اختلف مع من يقول ان هذه المسلسلات هادمه اكثر ماتكون بنائه .

    ردحذف
  11. كرماله، ترا هذا هو اللي مايعرفنا بيتحسبنا جذي و حياتنا جي..

    و هم مزودينها واااايد، و وااايد أشياء مبينينها عــادي .. !!
    وشكرا ..

    =======================================

    مي

    التصوير لا إعتراض عليه بالعكس حلو، و حسيت كأنه حتى دعايا لإمارة أبوظبي من التصوير وااايد حلو هو بس القصة فيها شوي ها ..

    و شكرا ..

    ====================================

    كريييزي إن فريدم

    أبلة نورة لا تعليق عليه لأنه نفس الشي الكاتبه و المخرج من دولة خليجية، و نحنا مب جي في المدارس كنا نظحك شوي على القصة .. بس عادي كان، و أنا إستغربت من دور حياة الفهد ...

    عايبتنج هيه هههههههههه ...

    حلفي بس جمل وايده مافهمتيها هههههههه شو هن بترجملج الحين نفس أخونا المصري " يوميات مضيف طيران " مافهم شي هههههههه

    ردحذف
  12. وللحديث بقيه

    أحسلك، أنا شفته بس، من الضجة اللي إستوت قلت خلني أشووف شو مستوي .. بس مفتك والله و عيش في عالم الغوص أحلى ..

    أكيد هالمسلسل مب بناء، وايد أموور عاديه تستوي عنا نحنا عيب .. مادري شو موضوعهم ..

    ردحذف
  13. آي ام ...

    جااا الدور عليكم .. بعد ما طلعوا أرواحنا في المسلسلات السعوديه المليئة بالأخطااء .. صار دوركم الحين ...

    انا من كثر الأخطااء الي اشوفها بالمسلسلات سواء بالعادات او بطريقة الكلااام .. كرهت نفسي وبطلت اتفرج على المسلسلااات .. شي مضحك صرااحه ..

    لما تجي الممثله وتكلم ممثله ثانيه تقولها مرره كيفج ومرره اشلونك ومره اشلونج ومره كيفك ... طيب حددوا يا كاف او جيم او شين .. عاادي يعني مو شرط تظبطون اللهجه تماما .. بس لا تسوون ميكس عجيب ..

    المهم .. انا بعيد كل البعد عن المسلسلات الخليجيه والتلفزيون بشكل عاام .. حاجه مريحه اكثر

    ردحذف
  14. اسواء شي انك تاتي بممثلين من غير اهل البلد من اجل ان يمثلوا ويظهروا انهم اهل البلد بتشوفي العجب من اللهجه وطريقة اللبس مثل ايام زمان لما كانوا المصريين يمثلوا انهم سعوديين صعب جداً تخونهم اللهجه كثير غير عن الشكل سبحان الله ..
    وانتم الاماراتيه لهجتكم صعبه كثير جلست فتره طويله حتى تعلمتها وفهمتها ولي اصدقاء كثر اماراتيين اعتز بصداقتهم .
    مااعرف المسلسل ولااحب اشوف مسلسلات اشعر انها تمرضني لتفاهت مافيها ولانها طويله ..
    وبما ان ناس كثير اشتكوا منه يعني مايصلح يكون يمثلكم كاماراتيه
    اتعلمت منك الان بعض العادات الاماراتيه ماكنت اعرفها .
    طيب ليه ماتنزلوا العبايه اذا رحتوا لناس اول مره ..
    اجل ايش الفايده من اللبس والكشخه :)

    باضيفك الى بقية اصدقائي الاماراتيه ..سرني معرفتك

    ردحذف
  15. مرحبااا حبيبتي

    كيف الحال

    http://wa7eeda-00.blogspot.com/2010/05/blog-post_29.html

    مري هني

    ولي عودة لقراءة موضووعج >>>ترى اركض عسب ارقد ^^والسمووحة

    ردحذف
  16. لوووووووولز

    عيبني البووست

    انا أتابع المسلسل .. امممم تقدرين تقولين المسلسل حلو
    بس في أشيا كثيرة ما تمثل مجتمعنا
    يمكن هالشي يقهر فينا ...
    وصدق في تناقض
    أحيانا أحس أم مهرة محافظة ومتمسكه بالعادات و أحيانا تخورها مره وحده
    والرمسه صدق يخبقوون بها ...
    أما إنها دعاية لأبوظبي
    حسيت جي ... حتى دوم يصورون وكالة نيسان وأنا أتحرى الحين بيراونا حد فيها ... بس جي رازين اللقطة في المسلسل ..وفي كل حلقة ...لووول
    -----

    طولت فالرمسه شكلي لووولز

    يسلمونيشن ع البووست الغاوي

    (;

    ردحذف
  17. أنا مره 2 ..

    بس بغيت أخبرج لما نعلق ع مدونتج يظهر لنا كود التحقق
    في رأيي لو تخوزينه يكون أحسن
    عسب يسهل ع المعلقين التعليق
    (;

    ردحذف
  18. ممممم والله ماادري اول مره اسمع عنه

    خل اشوف حلقاته باليوتيوب

    ثانكس:)

    ردحذف
  19. عزيز جونيور ..

    هي إنتو أحس الله يعينكم، وايد يشووهوون، و لو أنا ما عندي ربع سعوديات جان صدقت.. لكن في هالمسلسل القصة هي حلوة، لكن القالب مب خليجي حتى تحسبه أردني، يعني البنت بتفتح لأهلها سالفة الخطوبة .. من متى يعني عنا جذي؟؟ ..
    بس يالله، الله يعين .. و الحين إستوت المسلسلات كلها حزن في حزن، هذا شوي غير حب من زمان ماشفنا شي جي خخخخخخ ..

    =======================================

    بوح القلم

    أنا بالعكس ما أعارض إنه ممثلين مب من نفس الدولة يمثلون في المسلسل، إذا كان عارف إنه بيحاول يرمس و مافيها شي، لكن متعمد يطلع عن هالشي ما أحب، و حتى في الممثلين لازم يستعينون أول شي بالخليجيين بعدين بالعرب و مب أي إللي يعرف يرمس عدل هي عادي ..

    بس أنا أحيد قبل مسلسلاتكم فيها مصاروها و كلامهم يظحك وااايد ..

    و عن العباه و ليش ما نعقها، يعني أنا ما أقوولج ما أعق عباتي مووول .. لا بعقها مثلا إذا أنا كل يوم أسير عند ربيعتي هاي و في عزايم معينه ممكن أعق لكن أغلب السيرات جذي ما نعق مووول عكسكم إنتو من تدخلون تعقوون عبيكم نحنا ما نعق عااادي .. حتى نهتم ساعات بشكل العباة من برع أكثر من اللي لابسينه .. يعني تعودنا جذي .. يعني مره أذكر يتنا وحده من السعودية أول ما دخلت البيت قالت و ين العلاقة بتعلق عباتها و شيلتها إستغربنا وااايد أول ما عقت .. بس بعد ما تعرفت على السعوديات عرفت إنه إنتو أول ما تسيرون أي بيت تعقوون عبيكم عادي نحنا لا ...

    ========================================

    وحيده بلياهم

    نتريــــــاج .. إنشاء الله بمر ..

    ========================================

    سمو الأميره، بالعكس رمسي من اليوم لين باجر عااادي .. خذي راحتج لووول عيبتني سالفة وكالة النيسان هههههه ..

    و عن الكود ما كنت أدريبه و الله .. و خوزته الحين ..
    وشكرا مره ثانيه

    ============================================
    صنع في الكويت لول ..
    سوري على كيفي غيرت .. غريبه أول مره تسمعيينه أنا ما عرفته الصراحة إلا من الكويتيات .. و الضجة ما عرفت عنها إلا من الإماراتيين لوول ..

    شوووف و خبرنا ..

    ردحذف
  20. باااااااااااك


    والله ياتني ضحكة ...

    صراحة انا ماعرف عن المسلسل ولا جايفتنه ..

    تقدرين تقولين اني مودرة المسلسلات الخليجية ...
    يووووووووووووووي وطاايحة ع الافلاام الهندية

    بصراحة انا يوم اسير بيت عمي ما افصخ العبااية
    اتم 4 ساعات او اكثر


    ناايس ^_*

    اظن مال عين يقولوا خالتيه عمتيه

    تسلمين حبيبتي ع البووست الاكثر من راائع
    يوووووووووووووووي ضج ضحكت ..

    مااعليج مايعرفوون عاداتنا وتقاليدنا
    ^_*

    ردحذف
  21. وحيده بلياهم ..

    أكيد بتفصخين عباتج بيت عمج أو يدتج أو خالتج أو حد من هلج أو حد من ربعج .. بس أنا إنتي ناس غرب سايرتلهم أول مره بتعقين عباتج؟؟؟؟ و إنتي بتيلسين واايد عندهم أكيد بتعقين ..

    لا حتى دبي يقوولوون خالتيه .. بس ما نعلق عليها ..

    و إنشاء الله دووووم الظحكة ما تفارقج ياااااااااااارب ..

    ردحذف
  22. انا متابعه هالمسلسل عشان الرمسه بصراحه ماروم عليها هههههههه شرايج

    واحاول احفظ الكلمات .. بالنسبه للقصه وااايد طواله واتوقع بتكون مسلسل مكسيكي خخخخخ

    شكرا

    ردحذف
  23. Crazy girl in agood way

    هههههههه تعالي عندي أنا بحفظج، هم حليلهم يرمسوون و يحاولوون بالذات حمد المسكين، يغمضني و الله يوم يصيح من الخاطر .. و تقريبا يحاولون يرمسون شرات هل بوظبي .. !! بس المشكلة في القصة، كقصة هي حلوة و أنا عايبتني لكن ما تتناسب مع المجتمع الإماراتي ..

    ردحذف
  24. AM.SA.CHANNEL

    هيه والله

    الى ما يعاشرنأ ما يعرفنأأ عدل

    ويعطيك العافيه

    ردحذف
  25. احلى مسلسل خليجي لشهاب جوهر وميساءمغربي وماعندكم سالفه

    ردحذف
  26. ايش فيهالهجتهم قصد كم مااتقنوها بالعكس اكثر من رائع المسلسل واصلا ماحبينا الاماراتيين الا من هذا المسلسل وحرام تقارنون مسلسل اوراق الحب بمسلسل ابلة نورة لان ابلة نورة بااااااااااايخ

    ردحذف
  27. غير معروف..

    هذا رايي و أنا حره، شو بعد ما عندكم سالفة، إرمس عدل

    إقرا الموضوع عدل و عقب علق..

    هي ما في شوي إتقان للهجة لكن الحمد الله زين منهم قدروا لأن لهجتنا مب سهلة ..

    ردحذف
  28. المسلسل وايد روعة وما عليه كلام بس الغيره تذبح الناس وبعدين ألي يسمعكم يقول ما يصير هالشي في بلادنا

    ردحذف
  29. غير معروف..

    إنته إقرا الموضوع اللي أنا كاتبتنه عدل .. أحين شو يخص الغيرة في المووضووع ..

    و أنا قلت الحين هالشي ما يستوي في البلاد قلت هالقصة لا تنطبق على المجتمع الإماراتي كقصة ..

    ردحذف
  30. بصراحة كلكم ما عندكم سالفة زعلانين عسب المسلسل مع أن شي واقعي ويصير كل يوم وإذا ع اللهجة ترا ما فيها شي مفروض تحمدون الله ع أنهم يرمسون بالأماراتي و أكثر شي يضحكني يوم تقولون بناتنا مايسيرون الخارج مثل لندن ومب لابسين عبي ولا شيل وعيل شو ألي نشوفه كل يوم خيال الله يستر عليهم

    ردحذف
  31. جوريه ممكن تقرين الكلام اللي أنا كتبته عدل ..

    إنتي تقوولين يضحكني يوم تقولون بناتنا مايسيرون الخارج و مب لا بسين عبي و شي ..

    وأنا قلو أنا ما برمس عن سالفة ميساء يوم سارت لندن هي و أمها و عقوا الشيل في ناس يعقون و هم قلييليين، بس في تناقض مره لابسه شيلة و مره..

    و الموضوع ما يباله ضرابه .. نحنا نتناقش و كل حد يشوف شي .. إنتي هاي وجهة نظرج و على العين و الراس و أنا لي وجهة راي.. و أنا ما سبيت المسلسل بالعكس حلو .. لكن ما يركب علينا ..

    يوم إنخطبت مهرة شفتيها كأنه العيد و عادي تعرفه و تعرف الإخت إنها معرسه.. نحنا عنا جي يستوي يا جوريه..

    و مخطوبه و تسير بيت ريلها عادي الحياة حلوة؟؟

    أنا كان عندي نقد معيد على بعض الأشياء ..

    إقري الموضوع عدل ..

    ردحذف
  32. أنا ما أرمس عنك بس أقول وجهة نظري في المسلسل بشكل عام

    ردحذف
  33. هي أوكي .. لأنج على طول هاجمتي و قلتي كلكم ما عندكم سالفه خخخخخ ..

    ردحذف
  34. اول شي عندي تعليق لو سمحتي اختي يعني ماكان لازم تقولييييييييين هالجمله ( شوي يحيس لسانه شرات العمانيين ) اعتقد مافيها اسلووب وماكان لها دااعي لانه اظن نحن والعمانيييين اهل ولا تبين تبينين شي ثاااني السمووحه ع المغثه

    ردحذف
  35. غير معروف

    لا بالعكس لا مغثه و لاشي، و أنا ما سبيت العمانيين بالعكس هم إخوانا و ربعنا، لكن هل تعتقد لو ممثل مثل مسلسل عماني لكن يحيسها على اللهجة الإماراتيه طبيعي بتقول يحيس الرمسة شرات العمانيين، يعني كأنه عمــاني شوي ..

    ما أعتقد إني هني سبيت أو جرحت العمانين بالعكس، هاي وجهة نظر ..

    و نحترم بعد وجهة نظرك ..

    ردحذف