الثلاثاء، 11 مايو، 2010

مــقهورة..

اليوم الله يسلمكم كنت سايرة لمكتبة دبي للتوزيع أبا أدور كتاب قريته في مدونة " و غدا يوم جديد " لكن مادري شو تلخبطت في شارع الشيخ زايد و مالقيت المكتبه مع اني دوم أسير مب أول مرة.. و إستوت الساعة 6:35 قلت خلني أرد البيت و بيأذن المغرب ماشي وقت ...


و أنا راده البيت، بنت خالوه تتصل فيني و تلفوني في الشنطة على السايلانت، و شوي ويرن تلفون الدريوليه (السواقة)، جان تعطيني التلفون تقولي إنه إختي المتصلة ..

جان تقولي إنتي وين الحين، زغت الصراحة قلتلها راده البيت شو بلاج، جان تقولي نحنا على البحر، و في يخت صغير فيه أربع أجانب إنجليز و موقفينه على السيفه ويالسين يشربون خمر و معلين على الأغاني سكرانين.. " حسيت فجأه إني أشتغل في التحريات و أنا ما أدري " خخخخخخ .. جان أقوولها أنا الحين يايه..

جان أقول حق الدريوليه سيري البحر بسرعة، و بيتنا قريب للبحر، وسرت و نزلتني، و تشووفووني أربع أدور هاليخت اللي يقوولوون عنه، جان يقوولوولي هكو هناك..

قلتلهم بنبلغ الشرطة لكن أنا ما أقدر أبلغ لين ما أشووف بعيني و هم يحلفوون إنهم شافوا جان أقوولهم بس أنا ما أقدر أبلغ إذا ما شفت بعيني سرت صوبهم و أشوف الريال يرقص و الحرمة مب متوازنه لكن ما اعرف هل هي ترقص ولا شو الموضووع، جان أقوولهم ما أشووفهم يشربوون، كنت أبا أبلغ لكن ما أبا أقول للشرطة هي شفت و آخر شي يطلع عصير و أنا أتمشكل آخر شي و يالشرطة.. !!

إختي قالت أنا شفت بعيني و حتى بنت خالوه قالت نفس الرمسة جان أقوولهم إذا إنتو شفتوا إتصلوا،
و على طوول يتصلوون في الشرطة و إختي تقوولهم بسرعه تعالوا لأنهم تحركوا و كانوا سايرين صوب أتلانتس ..

و شفنا يهال على السيفه جان أقولهم إنتو شفتووهم، و كانو صغار صف رابع و ثالث، قالو هي كانوا سكرانين، و حتى وحده نزلت عدالهم ترقص سكرانه و سارت سيارتها.. و قالو شي إنصدمنا منه هو ماصخ بس اليهال يشووفوونه يضحك..

سمعونا و نحنا نتصل جان يقوولوولنا لو تشتكون السالفة بطيح عليكم لأنه عندهم تصريح يشربوون " أنا الصراحة إستغربت من رمسة اليهال، هذيلا يهال أكيد أهاليهم قالولهم مالكم خص فيهم، بس بعد غلط، لأنه يوم بيكبر بيقوول مايخصني، مايستوي جذي يا ناااس ... جان أقوولهم اللي عنده ترخيص يقدر يشرب في بيته بس مب برع على البحر و إذا شفتوا شي غلط إتصلو بالشرطة .. كنت وياااااااهم حاااار بحااااااااااار ههههههههه


و مايواحيلهم دقيقتيييين و وصلوا خفر السواحل و قالوولنا وينهم قلنالهم وييين إتجهوا و قالولنا أذوكم أو إنتوا إذيتوهم قلناااله لا الحمدالله.. و على طووول إتجهوا لليخت.. و نحنا مستاانسين كان أكشن الصراحة .. !! حققنا إنجاز هههههه


لكن أنا كتب هالسالفة مب عشان شي، لكن عشان شي واحد نحنا عنا قواانين و لله الحمد لكن في قوانين تتنفذ و قوانين ما تتنفذ ...
إلا إذا بلغت... لو مر الشرطي ما يقوول شي، نفس اللي على البحر إمفاااصيخ، و الله أنا أستحي أمشي، و سوري على هالكلمة "ريال بهاف مايوه يمشي على البحر " و الله تلوع جبدي و بعد الحريم نفس الكلام .. إحترموا قواانينا ياااناااااس.. منوو قال إنه أهل دبي فرييييييييي عادي كل شي عندهم بعدنا متمسكين بعاداتنا و تقاليدنا و فوق هذا كله فيه دين يحكمنا ..

و حتى الموولات لو هناك قوانين إنه ممنوع لبس اللبس الفاضح أو ريال و حرمته يتلاوون أو يسووون أشياء ما بعد اللويات هههههه بس بعد مافي إحتراااااااام موووليه للقانون .. !! تعرفوون ليش .. ؟؟؟

" لأنه نحنا الشعب ساكتين عنهم، لو كل واحد منا بلغ و هلكنا شوي الشرطة، من البلاغات الأمووور بتتغير "

و الصراحة الشرطة ما يقصرووون، و الله اليوم في دقيقتين وصلوا ماشاء الله..

أنا هالمرة ما برد على الحكوومة و الشرطة، بس لاعت جبدي كل ما إستوى شي قالوا الحكومة راضية ولا الوزارة مادري شوبلاها، و الله الخلل منا نحنا كله ساكتين..
أوكي إنتوا ما عندكم لسااان تكلموا قووولوو شي، ملينا كله نرد على غيرنا و نحنا ساكتين، أكييييييييد هم بيتمادووون لو شافوونا جذي ساكتين شي طبيعي يعني، الشعب ســـاكت، لكن من عقب اللي شفته اليوم قررت أنا و اللي ويايه أي شي نشوووفه على البحر غلط ما عنا غير


" 999 "
الشرطة
طبعا مب بس البحر، في كل مكان و كل مكان له إسلوبه يعني في المول أكيد ما ببلغ الشرطة ببلغ إدارة المول .. شكلي بسوي حمله هههههههه ..

و أتمنى من كل إماراتي و مقيم و زائر إذا شاف الغلط يغير بأي طريقه من الطرق السلمية

و شكرا

هناك 11 تعليقًا:

  1. الله وناسه, صدق اكشن. هع
    بس المشكله فاتج نص الفلم. هع
    المهم والله زين انكم بلغتوا ولو انا مكانج بتفرج وما علي منهم. ينباعون بالعزى! هع.
    نتريا يديدج. ومن متابعينج =)

    ردحذف
  2. بصراحه زين سويتوا
    يزاكم الله خير ،،،،، الله يهديهم بس :)
    ملعوزينا ونحن مثل ما قلتي ساكتين!

    ردحذف
  3. زين سويتي!
    والله صراحة الواحد قام يخاف...مثل ما قالوا اليهال آخر السالفة تطيح على راسج فـ كل واحد يقول بالله نفسي أنا شعلي من الناس دام ما وصلني شي منهم.

    ردحذف
  4. مي الرميثي

    إلا مب أكشن، و هو فاتني نص الفلم لكن المهم كنت في الأكشن ههههه .. بس و الله خل يتأدبوون لوعوولنا بجبوودنا، و ودي أعرف شو سووبهم .. والله مي إن شافتي شي بلغي خل شوي يتأدبوون و لا يركبوون رووسنا ..

    أسعدني مروورج

    ========================================

    lil.D

    ترا هذا هو ساكتين من جي كل واحد نافش ريشه علينا، لو شوي كسرنا شوجتهم بيتأدبوون ..

    أسعدني مروورج ..
    ==========================

    Seema*

    هي أنا إستغربت يوم قالوا جي السالفة بطيح عليكم، بس لو تمينا جي شو بنستفيد، الواحد بيشووف الغلط جدامه و يسكت و مع الأيام أصلن بنشووف هالشي عادي، واحد يمشي و يسكر لو تمينا جي ساكتييين ..

    و شكرا و أسعدني مروورج

    ردحذف
  5. بنت أبوووووووووووووووووج والله انتاي :*

    زين تسوين فيهم .. دمج حار نفسي هيهيهي .. بس قضبتي عمرج ولا جان آنا ناطه معاهم باليخت اتهاوش لول .. وبعدين وناسه طلع رقم الشرطه عندكم نفسنا 999

    تعالي ليش تشرينهم " أساطير شعبيه؟ يبه بسوي مدونة وبسميها أساطير شعبية كل أسبوع انزل لكم قصة .. شرايج؟

    ملاحظة: فعلا العالم ماخذين عن دبي انها متحررة .. لكن اللي يروح راح يشوف ان هالتحرر بأماكن معينة فقط ومو اهل الديرة .. الاجانب بس

    بارك الله فيج يالحلوة ..

    ردحذف
  6. كل ما اروح دبي والله احس اني بدوله اوروبيه من كثر المفاصيخ

    بامارات مول كنت داشه احد المحلات وعند الكاشير وحده اجنبيه واقفه جدامي لابسه بس بلوزه واندر وير !!!!

    والمشكله ان بكل مكان حاطين اعلانات عن اللبس وممنوع الحفر والقصر وممنوع تبادل القبل وهالسوالف

    بس والله ما يحترمون القانون

    يقولون الاجانب يحترمون الصارحه بدبي ما يحترمون كلششششششششششششش

    ومره بدبي مول مره وريال لامين بعض ويبوسون بعض جدام الناس وبنص المول !!!

    ولا احد كلمهههههم !!!

    انا مابي اتدخل بسياسة دبي لانه هالشي مايخصني ولا جان تكلمت وقلت كل الي عندي

    عفيه عليج والله :)

    ردحذف
  7. تحيه طيبه وبعد:.

    مايحدث من قبلهم ماهي الا حلقات لمسلسل عنوانه قله الادب برغم القوانيين التي تعرضها وتفرضها الدوله عليهم الا انهم احيانا يضربوا بها عرض الحائط.!
    وانا اتفق معك ان يجب ان يكون دورنا ايجابي بحت عند رؤيتنا الى الى شي يمس الامن او الاخلاق لانتردد بتاتا في الاتصال الى الشرطه حتى نبرئ ذمتنا امام الله اولا ثم نساهم في خدمه بوطتنا بكل الطرق المتاحه...
    ثانيا الطرق في دبي دائما متغيره وهذا ان دل فانما يدل على ان الجهات الرسميه تقوم بتقدم الفضل لمستخدمي الطرق وسبحان الله اليوم انا كنت في مكتبه دبي للتوزيع فانا متعود بزيارتها بين حين واخر..
    وماقلتي لي جان خذت لك الكتاب.:)

    دمتم بصحه وعافيه...
    للحديث بقيه.!

    ردحذف
  8. كفو والله زين سويتي:)

    الواحد لازم يغار على ديرته
    مايصير كل واحد يقول مالي شغل

    وعندي سؤال تخربطت بسبب إختلاف اللهجه!!

    احنا نقول دريول حق السايق الريال

    إنتوا تقولون الدريوليه!!
    يعني قصدج السايق المره؟؟

    ردحذف
  9. الوتين ..

    لا الله يخليج مافيــج تنزلين كل يوم جزء من القصة أخاف ىخر شي يرفعوون عليج قضية هههههه ما فيج .. و حلاتها القراية يوم تشمين ريحة الكتاااب، ما أحب أقرى على النت ما أركز مثل الكتاب، لانه الكتاب احب اخطط و أسوي اللي أباه ..

    لا بويه مافيه أنط و أظاربهم، سكرااانيين و الله أخاااف الناس تتحسبني سكرانه بعد شراتهم مافيه، و أصلن حلاته يوم تكوونين بارده الطرف الثاني ينقهر منج و على بروودج .. ولو تلاحظين البارد لو كان غلطان نادر ما يكون الحكم ضده على عكس الحار و اللي يظارب ..

    و يالله يالوتين دامنه الأرقام نفس الشي ماعندج عذر إن شفتي شي بلغي ههههههه ...

    =============================================


    شاي الضحى..

    ترى من جي أنا الحين مقهوورة و خلاص عزمت على كل شي ببلغ، مافي إحترام بالمرة، يعني أشكره إعلان شو كبره على الباب.. وين يبوون ما أدري ..

    و أنا دووم كنت أشووف و اقوول ما يخصني لكن من الحين قلت خلاص ماشي ما يخصني، لازم أتكلم ولا المصخره بتزيد و بتكبر ..

    لا أفا عليج إنتي إنشفتي المرة اليايه بلغي الإدارة على الأقل يعرفوون حتى السياح ما يعيبهم ..

    ========================================

    وللحديث بقيه..

    ترى هذا هو، الحين يوم ترمس حد و تقولهم بلغوا سوو، يقوولووك و الله الحكومة سامحه، حتى لو الحكومة سامحه تكلم في قانون يمنع و القانون فوق الجميع .. و أنا الصراحة شفت بعيني شقى الشرطة على طوول من بلغنا يوونا و الله دقيقتين و هم يدوروونا عشان يدوروونهم، لو الحكومة سامحه الشرطة ما بتي بسرعة بتتأخر عشان الدليل يختفي .. بالعكس شفت تجاوب مع الشرطة ..

    و الطرق في دبي ماشاء الله ما عليها كلام، و كل تغيير الصراحة يستوي في دبي أنا راضية عنه لأنه صدق تحس لو يصكون شي ما يمديلهم يفتحونه و هو وسيع و محلاه .. ما قصروا ..
    و الله شووف الصدف ههههههه كيف.. بس أنا ما أدري شقى تلخبطت و ما شفت المكتبه يمكن بسبب المترو .. ما اعرف ..

    ========================================

    Q8Lawyer

    هي و الله، هالمفروووض يستوي ، بس ما تعرفين ليش نسكت ومقهوورين ...

    الدريول هو السواق..
    و الدريوليه هي السواقه هي السايق المره ..

    ردحذف
  10. هذا اللي مفروض نسويه مو كل شي على الحكومه حتى احنا علينا واجب

    والشكوى في اي دائرة حكوميه او خاصه ترى يفيد

    بس مشكلتنا نقول ما راح يفيد بشي و نسكت

    زين احد فيكم اشتكى و جرب بيقولون لا



    الله يعطيك العافيه و يكثر من امثالك

    ردحذف
  11. ترا هذا اللي مخرب علينا، إلا يالسين نقول لو إشتكينا ما بيسوون شي، و الصراحة أنا شفتهم سوو شي، يعني بسرعه يوونا الحمد الله .. و يالله الدور عليكم الحين :)

    ردحذف