الجمعة، 7 مايو 2010

مشــروع قيد الإنشــاء .. !!




بعد مضي أربع سنوات إلتقيت البارحة بصديقتين سعوديات، و لم ألتقي بهن طول هذه المدة، البارحة خرجت معهن إلى دبي مول على الغداء، و عندما شاهدوني إنصدموا من شكلي لأني تغيرت كثيرا عن قبل و جسمي تغير 180% ..


و نقاشنا طول المدة عن الأكل و كيف كان نظامي و ماذا كنت أفعل، " و أعوذ بالله من كلمة أنا "


لكن كنت أنا محور الحديث و قلب الحديث و المتحدث الرسمي عن الرشاقة و أصولها و فنونها، إندهشوا من نظامي و طريقتي في التعامل مع الأكل، و إستغربوا من كيفية تعاملي مع الأكل، حيث أنني لا أحرم نفسي من الأكل، و أخرج مع صديقاتي للأكل في المطاعم طبعا بنظام، و حتى إسلوبي مع الفاست فود لي نظام معين.. " و طبعا أنا كنت مبتعدة عن الفاست فود، لكن يوم كنت أشتهي آكله "





فقالوا لي: لماذا لا تؤلفين كتابا يتحدث عنك، أو تكتبين كتاب للذين يحاولون مع الرجيم و لكن دون فائدة، أو كتاب عن كيف تتعامل مع المنيو في المطاعم بدون خوف أو تأنيب الضمير..








إستبعدت هذه الفكرة كليا، لأن أسلوبي في الكتابة يختلف كليا عن أسلوبي في الحديث مع الناس، لأن أسلوبي في الحديث " على قولتهم أحلى " من الكتابة، و هذا ما أره أنا أيضا، ولكن ألحوا علي، ما المانع من ذلك حاولي و هنالك من سيرشدك في التغييرات المطلوبة في الكتاب..


لكن أعلنت إستسلامي في النهاية، لأن المحاماة قيدتني بإسلوبها، و بمصطلحاتها، و أنا من خلال مدونتي أحاول أن أتحرر من الفكر القانوني قليلا، لأني لا أريد أن تكون حياتي كلها قانون في قانون بالرغم من حبي للقانون..


لكن عندما رجعت إلى البيت، فكرت في الموضوع، و بقيت فكرة الكتاب معلقة في فكري، و أينما أذهب أرى هذا الكتاب معلق أمامي، و فكري كله شارد لهذه الفكرة.. و لما لا؟


لا أعرف لماذا أعلنت إستسلامي دون أن أفكر و لغاية الآن و أنا أفكر في الموضوع، و اليوم و بالرغم من إسلوبي في الكتابة، فلما لا أكتب، صحيح أن الله منح كل شخص إسلوب فمنهم من حصل على إسلوب الحديث و منهم الكتابة ..الخ لكن ما المانع إذا مارست حتى تتحسن كتابتي ..


لأني و عذرا للعرب إلا أن أغلب الكتب العربية للتخفيف و التنحيف لم تدخل مزاجي، على عكس الكتب الأجنبية و المجلات الأجنبية التي تلهمك و تأثر فيك كثيرا..



و مــازلت أفكر في هذا المشروع .. !!




هناك 19 تعليقًا:

  1. يابختكم رحتوا دبي مول :q

    انا شخصيا ما تشدني هالكتب ومن بديت اسوي رجيم ولا مره فكرت اشتري كتاب لاني لما اقراهم احس انه حجي فاضي لان هالشي يكون اراده ومن داخلج ايي

    ولما تكون عندج الاراده انتي بنفسج تتحكمين بنوعية اكلج ومع الوقت راح توخرين عن الاكل الي ما منه فايده خاصه الفاست فود (الحين بيصير لي اكثر من 7 اشهر مو ماكله منهم) واروح كل المطاعم واختار الاكل الي فيه دهون اقل او الاكل المشوي

    بس والله تصدقين خوووووش فكره تدرين ليش؟!

    لان في ناس وايد عندهم الرجيم بس اكل بيت وحرمان هذا الي يخليهم ما يكملون وتقل ارادتهم

    وبكتابج تقدرين تكتبين عن هالنقطه وشلون الناس تطلع وتروح كل مكان وتستانس وتستمتع برشاقتها وكل خطوه يمشونها مهمه واااااايد بحياتهم

    توكلي على الله

    والله يوفقج :)

    ردحذف
  2. شاي الضحى يالله تعـــالي، و بنحووط وياج دبي موول بكبره و سوق البحار بعد و بتشوفين النوافير اللي ترقص ..


    هي صح شاي الضحي، شوفي يمكن إنتي خذتيلج إسلوب و مشيتي عليه وأنا نفس الشي، لكن غيرنا مثل ما قلتي يحرمون عمارهم من كل شي و يتحملون شهر و عقب الشهر تشووفينهم مخبل على الأكل ..

    شوفي انا الكتاب اللي أبغيه يكون صور أكثر من كتابه، ولو تلاحظين كتب العرب احس صعبه كتابه وااايد، و مثل مايقولوون نحن شعب ما نقرا، فليش لا ما يكون مثل الكتاب الصغير مثلا نحط ماكدونالدز تبغي تاكل منه كل هل وجبه بدون جبن و مايونيز، بتسير جابنجو كل هل وجبه وضيف كذا و شل كذا .. و يكون فيه نصايح، يعني مثلا ما يقوولوون كتاب ممكن تجلبينه أكثر من مره ..

    و الله ستين ألف فكره في رااااااسسسسسسي هههههههههه .. يبالي أقرر قبل و عقب أبدا ..

    ردحذف
  3. ماشاءالله زميلتنا بالمهنه:)

    مالومج حتى انا وصديقتي كريزي
    محررين نفسنا من الفكر القانوني بالمدونه


    ليش تستسلمين حاولي وبإذن الله راح تنجحين

    وموفقه ياااااااارب

    ردحذف
  4. هي زميلتكم .. بس باقلي 6 شهور عاد أنا عشان أكون محاميه رسميه بعدني محاميه متدربه .. و ماشاء الله حتى كريزي قانون زين زين زدنا ماشاء الله ههههههه ..

    ترا هاللي قاعده أسويه الحين بشووف و إذا خلاص هالفكرة إسرتني بحاول ليش لا ..

    ردحذف
  5. السلام عليكم ورحمه الله
    شعرت بالحماس من خلال قراتي لحروفك التي تعطي الاخرين دافعا لمواصله عمليه الرجيم فانا قبل فتره دخلت عالم الرجيم من خلال باب نيتروشن واستفدت حيث خسرت من وزني 30 كيلو وكنت حارم نفسي الاكل ولكن بعد فترها توقفت عن الرجيم وعاد جسمي كما كان وها انا مواصل لعمل الرياضه وتراك بعض الاكل وارغب في افادتنا في طريقتك العبقريه في عمل الرجيم حتى نستفيد منك محاميتنا العزيزه..
    اما بخصوص طرح كتاب مع تجاربك الخاصه فانا شخصيا ادعمك معنويا وسنكون حولك حتى يخرج هذا الكتاب ويرى النور .
    قبل هذا وذاك كل كتاب بحاجه الى دراسه وفكر وسوال اهل الخبره حتى ينجح لان الكتبت كثيره في الاسواق ولكن نحن بحاجه الى الجيد منها

    تمنياتي لك بالتوفيق دائما...

    للحديث بقيه.!

    ردحذف
  6. فكرة حلوة
    إلا ما نجحتي ما خسرتي
    :)

    ردحذف
  7. بالنسبه لي ما اتحمس لمثل هالكتب
    أفضل الدي في ديز .. او المقالات البسيطه ..
    لأن غالبا الكتب الي من هالنوع تكون ملياانه حشوو وكلام كثير ما افهمه او ما يفهمه الا المتخصص .. وهالكتاب كله من الممكن ان الواحد يختصره في مقاله او مقالتين ..

    وفيه كثير غيرك اذا بيقرون كتب من هالنوع رح يقرون الكتب الأجنبيه .. لانه صارلهم بهالمجال من سنيين ..

    ما احاول احطمك .. بالعكس حلوو الطمووح رائع راائع ..

    عشان كذا انا بقولك النصيحه الي ابي سمعها ..

    جربي اول شي من خلال مدونتك .. اذا لاحظتي اقبال
    على مثل هالموااد توكلي على الله واكتبي كتابك

    ولا تنسين تخلينه شوي بيرسونال عشان تتفاعل معك الناس اكثر ..

    اما بعد مرحلة كتابة الكتاب .. ما احب استعجل الامور .. بس ان شاء الله ينجح نجاح باهر .. بس اذا ما نجح او نجح نجااح بسيط .. فان شرف التجربة والمحاوله يكفيك ..

    والله يوفقك صديقتي

    ردحذف
  8. و للحديث بقية ..
    و عليكم السلام، الصراحة أنا نيوترشن أبدا ما أحبه أغلب اللي تعاملوا معاه، ظعفوا بسرعه و ردوا متنوا أكثر عن قبل .. !! بس أهم شي إنك مواصل على الرياضة و هذا أهم شي ..

    و أنا ترا لو ثبتت الفكرة في بالي، بحاول قد ما أقدر شي يديد، مب نفس اللي نشوفه الحين .. أنا أحس انه الناس ملت سو جي و لا تسوي جي بفكر في قصص و أفكار و صور ..

    و مشكووور على زيارتك لصفحتي، و شكرا جزيلا على دعمك المعنوي .. كلامك حمسني ..


    ===================================

    seema*

    أحب إختصاراتج، و كل إختصاراتج لهن معنى، تخليج تفكرين في الجملة .. و شكرا ..

    ========================================

    aziz-junior

    بالعكس إنته ما حطمتني، و هالمفروض ينقال، و صح اللي يهتم بهالأمور نفس ما قلت بيلجأ للكتب الأجنبية و مجلاتها بسبب الخبرة، و هالشي اللي أنا أبغيه ما أبغي حشو كلام، و جارب عمليه، و لو تلاحظ كتب الأجانب أغلبها تجارب عملية و قصص أكثر ما هي أشياء نظريه و بحوثات.. فعشان جي نفس ما قلت و للحديث بقية، ما بيكون حشو كلام و هالخربطان، بخليه صور و قصص و كم من فكره في بالي أبغي أطبقهن على الأقل شي يديد و مب متكرر، و أبغي شي حتى اللي ما يحبون القرايه بيقرون هالكتاب ..
    و في كتاب إسمه مذكرات سمين سابق للكاتب السعودي نسيت إسمها اللي هو مذيع على قناة العربية، كان كتاب حلو يتكلم على كيف كان لما كان متين و بعد إتباعه للرجيم، و ماشاء الله و الحين ما أعرف أي طبعه موصل .. !! يعني لا حظت من هالكتاب حتى اللي ما يحب يقرا قرااه ..
    بس أنا بحاول و نفس ما قلت عيبتني الفكرة بجرب هني .. و لو فشلت مرة و مرتين بحاول لأنه الغلطة تعلم الشطار .. وشكرا يا عزيز ..





    ==================================

    ردحذف
  9. حاولي يمكن اسلوبج وطريقتج غير :)

    موفقه يا رب :>

    ردحذف
  10. بحاول إنشاء الله .. و شكرا

    ردحذف
  11. والله مشروع رائع وفكرة ممتازة وياريت لو تفكرين فيها بصورة جدية خصوصاً إذا عندج أفكار غير تفليدية ومؤثرة ..

    وبالتوفيج يارب

    ردحذف
  12. ليش لا ...دام عندج الأفكار اكتبيها..وان شالله كتابج يشوف النور ^^

    وديّ

    ردحذف
  13. Engineer A

    لا أفكاري مب تقليديه نفس ما نسمع دايما و إذا خبصتي إخترب كل شي .. بالعكس، نحن بشر لازم بنخبص شوي و بنخرب يوم,, و هو يباله إراده إذا موجوده خلاص بتقدرين .. بس إنشاء الله يصير خير .. ومشكورة ..


    Om Harooby
    و إنشاء الله يارب.. و نورتيينا يا أم حروبي

    ردحذف
  14. بالعكس انا اشوف اسلوبج زين ماشاءالله..

    وحلوه الفكره..

    تبين رايي كتبي كل شي يخطر بالج عقب صنفيهم ع اساسا النوع مثلا يعني كتبي مجموعة مقالات عقب قسميها ع حسب موضوع بجذي بيصير عندج جم فصل ..

    عقب فرزيهم واختاري الاحسن من كل مجموعه بس هالخطوه حلاتها مع احد..

    بس قبل لا تكتبين شي كتبي الاوت لاين بحيث تجمعين افكارج وماتشتتين وخلي مساحة عشان اكيد في اكار يديده بتطري عليج..

    موفقه يارب..

    ردحذف
  15. تصدقين رووروو ما فكرت في هالشي، يعني أكتب و عقب أفرز، أنا شكلي ببدأ هني و نفس ما قال عزيز أبدأ هني و أشووف، أنا أنزل كمذكرات، بس الحين أبغي الفكرة عشان أبدا و إذا حسيت إنه مشى ببدأ .. بس سالفة الفرز هاي عيبتني أنا كب عارفه من وين أبدأ شكلي بكتب و بسوي و آخر شي بفرز و برتب ..

    مشكووورة رووروو ما تقصرين و الله .. و الله يفقج إنتي بعد

    ردحذف
  16. انا اقول لو تبدين مدونه تكتبين فيها سوالف الرشاقه مالتج اليوميه
    عشان تتشجعين وتكتبينهن عقب في كتاب :) ^ـ* مثل عايزة اتجوز
    بس بتكتبين عايزة اكون رشيكه (رشيقه)

    بالتوفيق ،،، اثرج قانون
    من جيه بلغتوا لوووول

    ردحذف
  17. ههههههههههههه عيبتني عايزه أكون رشيكه هههههه بنافسها شوي مب زد عني هههه ..


    هي شفتي من جي كانوا يبوني أنا أبلغ ههههههه، لكن ما أقدر أبلغ عن شي ما شفته عدل .. و آخر شي بلغوا

    ردحذف
  18. فكره ممتازه

    تقدرين تسجلين كل اللي في بالك وبعدها تفرغينه انتي على راحت

    او احد في الطباعه

    ترى هذا الاسلوب الكثير من الكتاب يستخدمه لانه يطلق العنان لمخيلته ولا يقيدها بكتابه

    توكلي على الله

    انتي عندك طاقه و علم ممكن يستفيد منه الكثير من البشر

    شدراك ممكن بعد ما تنشرينه يتترجم وحاطينك في نادي الكتاب لاوبرا

    :)

    عاد وقتها لا تنسينا

    الله يوفقك ان شاء الله

    وانشالله تبشرينا بأصدار الكتاب

    ردحذف
  19. ههههههههه عاد مب لهالدرجة.. بس أنا قلت إنشاء الله برتب أفكاري و ببدا إنشاء الله .. و طبيعي ما بنساكم و إنتم المشجعين الأساسيين لي ..

    و قلت بنزل على فترات مذكراتي من غير اللي أنا من قبل بديت فيه مذكرات رشيقة حاليا .. !! و طبعا انتو ما بتقصرون بتعطوني رايكم .. !!

    و شكــرا يالفيلسووف على تشجيعك

    ردحذف