الثلاثاء، 8 يونيو، 2010

عكس التيار و مرة أخرى " مسلسل أوراق الحب "

اليوم الله يسلمكم وصلني كم من برودكاست و كان بعد عن مسلسل أوراق الحب.. و أكيد بتقولوون هاي بلاها ما عندها شغله إلا هالمسلسل، لكن أنا الحين في بالي أقول شي لازم أقوله و لازم أرد على هالمسج .. !!
شوفو شو يا في المسج ..


( اليوم أوعدكم إنه هذا بيكون البرودكاست الأخير بخصوص مسلسل أوراق الجرجير.. أقصد أوراق التنين .. أقصد أوراق الحـــــب ..
" مال قناة بوذبي لاه "

بعد عناء مشاهدة 30 حلقة من التفاهة و الرمسة المحتاسة المنقعة من مجموعة من المتأمرتين يعني اللي يبون يستون إماراتيين بالقوة الجبرية..
إستنتجت المعادلة التالية لما نمزج المكونات التالية:-

1. مخرج زلموكة قرعته و لا قرعة هتشكوك..
2. كاتب زلموكة كاتب قصة و يتحرى كاتب قصة تايتانك.
3. 90% من ممثلين و ستاف المسلسل زلموكة على حنابلص على مغربيات.
4. بطلة مغربية مركبة مطبات أم القيوين بدال شفايفها.
5. ميزانية مفتوحة من تلفزيون المملكة الأردنية الهاشمية، أقصد تلفزيون أبوظبي.
6. مشرف إماراتي حطوه يشرف على المسلسل و كل اللي سواه أنه ظاف حروف " ياه " بعد كل كلمة في الحوار عسب ينقال أنه مسلسل إماراتي " ياه " يستخدم الهجة الظبيانية.

ينتج مسلسل عيب يبنقال عنه مسلسل، أصلا بس مجموعة لقطات سياحية أبوظبي و لندن على قصص جب عبيطة مالها هدف و لا مغزى على قائمة طويلة من تنقيعات الممثلين على نهاية عبيطة و سطحية أكبر من المسطح المائي اللي على قرعة المخرج الخزوز الله يلوع بجبده على لوعة الجبد اللي سببها لنا..

ما أقول غير جسبي الله على يوم اللي خلينا قوم " زعطر و زطون و ليش هاظ يازلمة " ينتجون هالتفاهة على إنها إماراتية..

و نعلن نحن الإماراتيين بأننا براء من هذا العبط الي إنقال مسلسل إماراتي.. )







طبعا أنا من قبل منزله بوست عن " مسلسل أوراق الحب شو سالفته " و ما كنت أعرف شو الموضوع و قلت خلني أتابعه و تابعته و حطيت رايي بكل حريه في هذاك البوست ..

لكن أنا بعد ما شفت 30 حلقة إستنتجت الآتي و هالبوست إهداء للي كاتب هالمسج و نشراه، طبعا من حق كل واحد يعبر عن رايه بالشكل اللي يشوفه.. لكن في هالمسلسل شي إيجابي بعد و أنا بتكلم عن الإيجابيات ..


1. القصة كانت حلوة الصــراحة و من زمان ما شفنا مسلسلات من هالنوعية، الصراحة تعبنا من الضرب، و الصياح المؤرف و الخيانة و النهايات التعيسة اللي تلوع الجبد، هذا صح إنه ماله هدف لكن رد قصص الحب القديمة.. قصة يديده من زمان ما شفنا نفسها، يمكن مبالغ فيه لكن أنا أعلق على القصة كقصة كانت حلوة..


2. يمكن هالكلمة تكون قويه لكن هذا الواقع هالمسلسل أقوى دراما إماراتيه من وجهة نظري، أنا ما أتكلم عن مستوى الإمارات أنا أتكلم عن مستوى الخليج، كان قوي وااايد، و لاحظت واايدين يسألوني عن بعض الكلمات الإماراتية، و الكلمات الغير واضحة..

3. و المسج يتمصخر على رمستهم، زين منهم و الله قدروا يرمسوون، رمستنا مب سهلة، صعبه و نحنا على بالنا دول الخليج يفهمون كل كلامنا لا ما يفهموون في وايد كلمات غريبة عليهم و منهم يضحك عليك يوم ترمس لأنه مب فاهمين أو كلمات غريبه عليهم..

و هذا المسلسل الوحيد اللي فيه الممثلين حاولوا قد ما يقدرون يرمسوون اللهجة الإماراتية، و زين منهم و الله، إنهم تكلموا لهجتنا، و ترا لهجتنا صعبة عليهم.. مب هينه .. و يمكن هم خذوا أبطال من دول الخليج على القصة مب إلا جي و ياخذون و لا تنسوون مب كل الممثلين بيوافقون على القصة، أو يمكن حتى ياخذ شهره هالمسلسل، نفس حياة الفهد تراها مثلت أبلة نورة بس ما كانت ترمس شراتنا و ترمس كويتي، بس إشتهر لأنها في المسلسل .. !! و على الأقل هذا أحسن من نجمة الخليج اللي ما يمثلنا مووووووووووول ..

و الصراحة ما عرفنالكم، يوم يمثلوون خليجيين مسلسلاتنا و ما يرمسوون شراتنا قلتوا ليش ما يرمسوون، و إذا حاولو قلتوا ينقعوون في الرمسة ..

أنا أشجع يدخلون من دول الخليج و بالذات الكويت حتى تقوى المسلسلات الإماراتية.. مافيها شي و مب عيب دامنهم بيرمسوون نفسنا و بيحطوولهم واحد يضبط رمستهم ..

4. و الكل محتج على ميساء مغربي و أنا كنت منهم، لكن بعد ما وصلت 25 حلقة، قلت المخرج عرف يختار أحس دوورها راكب و دورت منو ممكن يركب لدورها لكن ما لقيـــــت .. هي تنفع ..

5. التصـــــــوير كان روووووووووعة الصراحة وايد معدل المسلسل، و صح كان دعاية لبوظبي بس أنا ما أشووفه شي غريب، بالعكس أحسبه شي حلو الناس بتغير بتسير تشوف بوظبي مب كله بس دبي .. و أنا شفت بوظبي حلوة وااايد من هالمسلسل و تبقى حلوة العاصمة ..

6. كقصة و مسلسل نـــاجح، و أبغي أشوفه مره ثانية ..

السلبيات:-

بعض العادات اللي يسوونها لا تتصل بالإماراتيين أبدا، و سوالف يسوونها مالنا خص فيها، القصة غير صالحة للمجتمع الإماراتي كثيرا و هي أنسب للمجتمع الأردني .. و حتى وضع بعض الجمل في غير مكانها.. و البذخ الزايد ..

أعرف إني عكس التيار و أعتقد 98% من الإماراتيين معارضيني .. لكن هذا هو الواقع، صح المسلسل تغلبه السلبيات لكن فيه إيجابيات بعد.. أحين بتشووفون المسلسلات الإماراتية كيف بتتغير هاي مجرد قرصه إلهم، و بتشوفون الدراما الإماراتية بسبت هالمسلسل إذا ما تغيرت ..

هناك 9 تعليقات:

  1. السلام عليكم ..

    كثرت المسلسلات التي من نوعية مسلسل أرواق بلا ورق وهذه أفضل تسمية للتكرار ومحاولة الخروج عن عادات ومتقاليد المجتمع الخاصة وبلورتها وقولبتها بقوالب مفبركة ومستورة .. وأنا كمان أحب أن أكون عكس التيار .. وسأكتب تدوينة بهذا العنوان لو سمحتي.

    تحية لك وتقبلي مروري

    ردحذف
  2. أم الخلووود خذي عكس التيار .. و إنشاء الله نشوف تدوينتج عكس التيار، أترياها :)

    ردحذف
  3. بعد الثلاثين حلقة..ما لقيت قصة!
    بلى, كان في قصة لكن.. شنو استفدت أنا من متابعة المسلسل عن شخصين حبوا بعض 30 حلقة وبالأخير ما تزوجوا؟
    هل اللي كتب القصة يحاول يقول ان الواقع يختلف عن الحلم؟ واحتا ما ندري مثلاً؟ وإلا يبين ان الطلاق صار سهل بالمجتمع وكل ما وحدة طق براسها شي وماصار قالت طلقني؟ المسلسل ما أضافلي شي لكن خذا مني وقتي : )

    ردحذف
  4. Seema*

    أنا بعد ما أضافلي شي، لكن ك دراما إماراتية أنا أشووف فيه إختلاف و تغيير أغلب المسلسلات الإماراتية ما يشووفونها غير إماراتيين إلا بعض المسلسلات، على عكس المسلسلات الكويتية.. !! و مب هذا المهم الأهم إنه في تغيير شوي أنا شفته في هذا المسلسل .. أحسبه بيغير وااايد من نمط المسلسلات الإماراتية و إنشاء الله للأحسن ..

    هو صح المسلسل في أمور مب واقعيه شوي، نفس ريل سناء و إسلوبه في الطلاق، و حتى زوج مهرة و إسلوبه .. !!

    ردحذف
  5. على الرغم أني لم اتابعه جيدا لكني أرى أن كلامك 100% صحيح!
    نريد المزيد من المسلسلات الخليجية من هذا النوع المختلف الجميل :)

    ردحذف
  6. انا علقت ببلوق كوكتيل على هالمسلسل وبرد اسويله كوبي اهني

    ----

    ويع ويع والله تحسفت اني تابعته

    مسلسل تافه وسخيف واحداث معروفه

    غصب بسوونه نفس الدراما التركيه

    حبني واحبك

    شدعوه الدنيا كلها تحب!!!

    وهالسناء يعني بتقنعونه يحبها واحد غني وما ترضى ومن واحد لي واحد !!!

    واخر شي الكل يبي يتطلق!!!

    النهاية تييب المرض

    او بالاصح المسلسل كله اييب المرض

    ويقولون اروع دراما اماراتيه !!!

    والأبطال كل واحد من ديره وما يعرفون يتكلمون ايماراتي عدل

    ومصورين المجتمع الاماراتي بصوره ثانيه

    وما عندهم غير البقعه الي جبال قصر الامارات يصورون فيها

    ومسوين دعاية لأبوظبي بصوره غير مباشره

    باختصار مسلسل "فــاشــل"

    ردحذف
  7. Mai

    إذا شفتيه خبرينا رااايج .. هي و الله نحتاج التغيير تعبنا من نفس روتين المسلسلات الصياح و الحزن ..

    ============================

    شاي الضحى

    ترا أصلن شكله دعايا لبوظبي واايد يبين إنه دعايا و حتى ما يصوروون أي مكان لو لاحظتي أماكن مكرره ..

    كأروع دراما إماراتية أنا أشووفها هي كانت قويه على مستوى الخليج، نحنا ما عنا هالنوع من القصص ..

    و عن اللهجة أنا وياج، و أنا يمكن 10 حلقات و أنا أظحك على رمستهم بس لين ما تعودت، و بالذات حمد يوم يرمس مادري كان يظحكني أحسبه يحاول .. لكن في نفس الوقت أنا ما ألووومهم، لهجتنا صعبه مب سهله مب أي حد يقدر يقلدها بالضبط ..

    هي صح آخر شي كل حد إطلق و بالذات زوج سناء رفعلي ضغدي ماله معنى هالطلاق .. يعني إلا يدبسووونها براشد ..

    و صح مصوريييين صورة ثانية نفس ما قلت القصة هي ما تصلحلنا كلش .. لكن حلوة ..

    ردحذف
  8. انا طبعا مشفتش المسلسل بس اسلوبك جميل وخفيف فى التعليق

    ردحذف