الخميس، 24 يونيو، 2010

هل هذا إسلوب؟

السلام عليكم ..


حبيت أنزللكم إيميل وصلني، و عطوني رايكم فيه، أنا الصراحة إنصدمت هاي مب حركة حلوة، و بأي حق يسون هالشي، صح البنت خـالفت لكن مب هالطريقة، و خلونا نشووف رايكم في الموضوع، هل إلهم حق في هالشي أو لا ؟؟



حركه جديده يقوم بها الشباب في عبايات البنات!!!!تقول احدى الفتيات :ذهبت الى السوق مع زوجي و هناك رأيت أربع بنات لابسين عبايات

فاضحه ، يـبان حجم اليد والصدر والخصر ومن تحت فضفاض واثنان

من
الشباب يمشون ورائهم وشوي إلا واحد من الشباب طلع من جيبه

أبره ورش
عبايات البنات .جلسنا نمشي خلف البنات ، وشوي تغيرت لون عبايتهم طلع لها لون

غريب يضحك / واضح إن منكب عليهم كلوركس !!
وبعدها جلست أدور في عبايتي عسى مارشوني أنا بعد !>>>
تقول سبحان الله بعد ماشريت لي ملابس رحنا الملاهي نلعب الاولاد

التى داخل السوق ولقينا نفس
الشباب وقلت لزوجي شوفهم هناك ورى

البناتوراح لهم زوجي وبعد خمس دقايق رجع يضحك قلت له هاه وش

السالفه ؟؟قال وهو يضحك :الإبرة اللي شفناها معهم هذي أنبوبات بدون أبره

وفيها كلوركس يقولون اللي عجزت عنهم الهيئة تكافحهم إحنا

نكافحهم !!
تكافحهم إحنا نكافحهم !!يقول الشاب لزوجي : نجي بدري لأي سوق يسمحون لنا ندخله و نلبس

بنطلون أبيض أو ثوب ونحط في الجيب الواحد 10 أنبوبات فيها

كلوركس ونرش
عبايات البنات المخصرة والفاتنة ويحلف بالله اللي

محتشمة ما نرشها نرش بس العبايات المخصرة والفاضحة !!

شو رايكم نسميهم شباب الكلوركس للتبيض... !

شو رايكم في الموضوع، هل هذا إسلوب في النصيحة؟ و أنا شو ظمني إنه هذا يالس يسوي هالشي لوجه الله و عن الفتن، أصلا هاي بكبرها فتنه و الله يعلم وين يرش و كيف يبحلق؟؟

و الراي رايكم الحين


هناك 25 تعليقًا:

  1. مدونه جميلة و متنوعه و ساحرص ان شالله على متابعتها.
    بالنسبة للموضوع السابق لي الكثير من التحفظات على اسم يوسف البدر لانه شخص مدعي.
    و بالنسبه لموضوع الدعوه.. للاسف بدأنا نشاهد الكثير من التخبط و التخلف في اساليب الدعوه
    الي درجة اني بدأت اشك ان هناك حملة تشويه لصورة الدعوه و الاسلام عندنا

    الكلام يطول و لنا وقفات اخرى ان شالله
    تحياتي

    اخوك
    ريماس

    ردحذف
  2. جزء مني مع وجزء مني ضد

    مع..لإنه في ناس تستاهل ويبيلها تتأدب وبتلاقين بعد فترة البنات بيصطلبن ويلبسون عبي محترمة

    لكن
    مليون خط لكن ..مثل ما قلتي الدين نصيحة
    اذكر قصة وصلتني عالايميل
    واحد شاب يا حق بنت في السوق وكانت لابسة عبا فاضحة وفل ميكب وقالها الله يعذبج مثل ما تعذبيني
    البنت انصدمت ..وقالت له شو سويت لك ..قال تلبسين هاللاشيا وتجبرينا نحن الشباب نسوي الحرام وبعدها البنت تابت ..ها جذي اذكر القصة ماعرف التفاصيل

    الله كريم
    تحيتي~ 

    ردحذف
  3. ماكان اللين في شيء إلا زانه .. وما نزع من شيء إلا شانه

    اللهيهديهم

    ياحلوج يابنيه مادريت انج متزوجه .. شكلج بنوته :)

    ردحذف
  4. مبدأهم صح!
    لكن طريقتهم خطأ!

    ردحذف
  5. قصدهم صحيح و شريف و على العين والراس

    بس ما ادري احس فيه شي غلط

    الطريقه هذه بتخلي البنات تعاند اكثر و من داخلها بتكون تدور الفضيحه و سوالف يمكن اكبر من هالعبايه

    بس احنا محتاجين لناس تنصح مثل ما قالوا الاخوان الدين نصيحه

    ردحذف
  6. هذا الله يسلمك توارث للهمجيه والتخلف في المجتمع

    وهذي الحركات والتصرفات كانت موجوده ومن زمان يعني مو جديده

    ذكرتيني بكلام امي اول ماتزوجت ابوي وجت للسعوديه
    يمكن قبل اكثر من 26 سنه
    وامي انا اردنيه
    ومسكينه مو متعوده على العبايه
    اصلا ولاتعرفها
    يعني توها جايه من الاردن طازجه وجديده بقراطيسها
    ومن اول ماجت على طووول لبسوها العبايه
    تقول انها ماكانت تعرف تلبسها وتحس انها ضايعه فيها
    ومره تطيح ومره ترفعها حوووووسه
    ومره كانت طالعه من البيت وماشيه بالشارع بطريقها
    وكانت رافعه عبايتها عشان ماتطيح وبعد العبايه طايحه على كتوفها وزياده على كذا لابسه غطاء لوجهها شفاف
    لانها تقول مابعد تعودت على الغطاء والنقاب
    وفجأه الا يطلعون لها مجموعة شباب ويرشون على عبايتها بويه لون اخضر
    بويه=صبغه بالسعودي^^

    وياليت بس كذا تقول قعدوا يسبوني ويشتموني بالفاظ بعضها اصلا مافهمتها!!
    ورجعت للبيت وقعدت تصيح عند ابوي ولانها ماتدري وش السالفه
    قالها ابوي هذولا شباب من الهيئه
    يمشون بالاسواق والشوارع واي وحده يشوفونها مو لابسه عباتها عدل والا عبايتها مايله او رافعه عباتها
    يرشون على عباتها بويه اللوان عشان تعقل مره ثانيه ولاتكررها وتلبس عباتها مظبوط!!


    وبذيك الايام تقول امي انه انتشرت عند البنات حركه بالعبايه يلفنها ويرفعنها فوق لما يبان كل شي
    وطبعا همج الهيئه اللي يتدخلون بكل شي حتى خصوصيات الناس
    اخترعوا الطريقه الهمجيه اللااخلاقيه صراحه وصاروا يصبغون عبايات البنات اللي رافعات عباياتهن او منزلاتها على الكتف!!

    وحتى ان ابوي قال لامي احمدي ربك بعد ماضربوك لان بعضهم ماسكين خيزرانات واي حرمه يشوفونها رافعه عبايتها يضربونها بالخيزران

    وتقول امي انها مره ثانيه طلعت من البيت وبالفعل شافت بنات ينضربن بالخيزران
    وعلى مناطق "مخجل ذكرها"

    يعني لاادب ولا اخلاق ولاتعامل
    من جد همج وتخلف لابعد الحدود

    وطبعا على حسب كلامك ان الشباب اللي يرشون عبايات البنات بهذا الزمان مو من الهيئه

    لكن الاختراع هذا موجديد هذا اختراع الهيئه المتخلفه !
    وهذي حركاتهم
    يعني مافيه شي جديد
    كل شي تطور بس العقول ماتطورت لحد الحين متوقفه عند 1400 سنه مضت!!
    لحد الحين النظره للمرأه على انها عووره وعلى انها فتنه
    وعلى انها "حرمه" وعار لازم تدثر بخمار!!
    تخلف

    وبعدين الهمج هذولا زياده على كونهم همج وبعد ضعاف شخصيه

    لانو اصلا مين اللي يستقوي على بنت بالطريقه هذي غير ضعيف الشخصيه؟
    يعني لو فيهم خير ليش ماياخذون سلاحهم الفتاك هذا ويروحون للشباب اللي مسوين بنفوسهم غرائب وعجائب تقليعات غريبه وبناطيل نص عوراتهم طالعه
    وبعضهم حتى مكياج متمكيجين!!

    يعني ليش مايروحون يستقوون على الشباب مثلهم
    والا لانهم عارفين انهم راح يتصفقون لما يعضون الارض
    ولانهم عارفين ان البنت مابيدها شي ولاتقدر تضربهم ولاتسوي لهم شي
    عشان كذا مستقوين على البنات بس

    والناس السنعه العدله تشتغل وتشغل وقت فراغها بقرأه تثقف العقل بأشياء ترتفع بالنفس وتسمو بالذوق

    اما هذولا مشغلين نفوسهم بالوسوسه بالمرأه
    وعباتها وحجابها ونقابها وفتنتها وعورتها وحيضها ونفاسها وطلاقها ورجعتها وعدتها!!!

    مثل ماقالت دكتورتنا "خربوا البلد"
    والله ان دكتورتنا مرات تنطق ذهب بس محد معبرها يحسبونها مجنونه!

    وهم المجانين يعني مو لاقين شغله ولا شي يضيعون وقتهم فيه
    غير يلاحقون البنات ويصبغون عباياتهم؟
    شوفي الطموح الى وين وصلهم؟
    عقليات اكل عليها الزمن وشرب
    من جد مقرفه عقلياتهم

    لووول
    طولت^^
    شكلي بفتح لي بوست داخل مدونتك^^

    بس تدرين البنات بعد ضعيفات شخصيه
    لو انا ويصبغون لي عباتي بذا الشكل
    ويتوقعون مني راح اتوب يعني ولا راح البسها مره ثانيه

    اقولهم تحلمون برجع البسها مره ثانيه وثالثه ورابعه
    عناااااد فيهم

    اما اني انطوي على ذاتي واخاف منهم ومره ثانيه اروح اتغمغم بخيمه على مزاجهم
    لاياحبيبتي هذا يقويهم ويخليهم مره ثانيه يتدخلون بخصوصيات اخص واخص من اللبس والشكل العام


    اوووكي سلاااام ياقمر اسماء^^
    لوول
    اخترعت لك اسم اسماء
    وش رايك فيه؟
    ^^

    ردحذف
  7. مااعجبني الاسلوب لانه مثل ماقلتي الدين نصيحه والنصيحه لها ادابها ..

    وهم وين غض البصر :\ يمشون وراهم ع ابو يرشونهم ويفصلونهم بالخز :\

    وهالشي مو رادع للبنات ..

    ومشكوره..

    ردحذف
  8. خيبه! < شرايج بالاماراتي ؟
    جد مو حلوه الحركه يعني مو من حقهم البنات
    أولاً ربهم يحاسبهم. ثانياً اهلهم شافوهم اهما شكو؟
    و ثالثاً من أدب النصيحه انها تكون بالسر مو جذي!!

    تسلميين عالبوست يالغلاآآ

    ردحذف
  9. فعلاً اسلوب غريب !!

    بصراحة مادري بس أنا أعتقد في وسائل ثانية تقدم فيها النصيحة مو بهالاسلوب؟

    وبعدين اذا اهي ما احترمت نفسها ولا خافت الله ولا حفظت نفسها عن عين اللي يسوى واللي ما يسوى اهم بيسنعونها يعني؟؟

    وبعدين ليش داشين بس السوق علشان يشوفون البنات ويرشونهم؟؟ يعني تصرفهم بالأساس غلط واذا مو عاجبته هالمناظر ما كان له داعي يروحون هالأماكن أصلاً وهم مالهم حاجه فيها!

    مادري انا اشوف تصرفهم غلط ومو حل للمشكلة كلش

    ردحذف
  10. السلام عليكم ،،

    على افتراض إن السالفه صحيحه
    و موب إثارة منتديات كالعاده !!

    نقرأ القصه من أول ،،

    شباب عندهم وقت فراغ كثير ،،
    لدرجة إنهم يترددون ع الأسواق ،،
    بدون ما يكون لهم حاجه يبونها فيها ،،
    شغلتهم إنهم يقعدون يتلفتون
    يدورون البنات اللي عباياتهن غير شرعيه ،،
    بدون تكليف رسمي من الدوله
    أو هيئة الأمر بالمعروف و النهي عن المنكر ،،
    و يمشون وراهن !!
    و يتلفون العبايه بكلوركس !!

    على فكره شرعيا ً اللي أتلف العباة
    ملزم بتعويضها عنها شرعا ً ،،

    و يقولون اللي ما قدرت
    تسويه الهيئه حنا نسويه !!

    يا ساتر كم خطأ ورد في الجمل أعلاه ؟؟؟
    على افتراض حصول هالشي فعلا ً،،

    إذا كان منسوبي الهيئه أنفسهم اللي
    مكلفين بهالشي و مرجعهم وزارة الداخليه
    أقصى ما يسوي إذا صادفته وحده
    من هالأشكال إنه يقول لها :
    تستري الله يهديك .. اتقي الله .. تـحـجـبـي ،،
    و هذا اللي يحصل دائما ف الأسواق
    و قدام عيوننا و ف الأماكن العامه ،،

    الله سبحانه نفسه يقول ...

    ( ادع إلى سبيل ربك
    بالحكمة و الموعظة الحسنة
    و جادلهم بالتي هي أحسن )

    أتفق مع الأخ الكريم ريماس ..
    في نقطة إن فيه أحد متفرغ بس عشان يسيء
    للدعوه و للهيئة و للإسلام و للسعوديه ،،

    ع فكره فيه موقع رسمي للهيئه ف النت ،،
    و لهم صفحه ع الفيس بوك ،،
    للي يبي ياخذ الحقيقه من مصدرها ،،
    بدون ما يسلم عقله للصحافه الصفراء
    و قصص ألف ليله و ليله ،،

    أعجبني تعليق أم حروبي ،،
    أحسه طالع من قلب ،،

    و أثرت فيني الأخت اللي قالت ..

    اذا اهي ما احترمت نفسها ولا خافت الله ولا حفظت نفسها عن عين اللي يسوى واللي ما يسوى !!

    الحمدلله .. هذا دليل إن الدنيا لازالت بخير ،،


    تقبلي مروري و دمتي بخير ،،

    إهداء بسيط للوالده ..

    http://www.youtube.com/watch?v=QPZJhy_ODAc


    و طبعا ً .. لأ .. هذا موب أسلوب ،،
    و لا راح يجيب نتيجه ،،

    أخوك ،،
    يـزيــد ،،

    ردحذف
  11. والله ياصديقتى مش عارف عموما انا اشعر انك انسانه مثقفة وتتقبلين الأراء انا ارى ان كل واحد حر يلبس اللى يلبسه صحيح يجب ان لايكون خادشا او مثيرا بس ليس من حقى ان افعل مافعله الشباب

    ردحذف
  12. Reemas

    أهلا و سهلا ..

    و ياليتك لو بينت في الموضوع هنالك عن يوسف البدر، عشان نقدر نتناقش ..

    صحيح كلامك الصراحة، بس إنشاء الله هالحملات تكون زينة، بس في حملة يحطونها في الدعاية دووم في السعودية نسيت شو إسمها واايد حلوة هي حملة دعويه ..

    و شكرا أخويه و أتريا كلامك على الدكتور يوسف البدر..
    =====================

    أم حروبي

    هي اعرف هالقصة، بس عاده ماشي غير عن هالإسلوب يرشها بالكلوركس عشان ما ترد تلبس، اغلب البنات يعاندوون الحين المشكلة، و حتى لو ما لبست في هالمركز بتلبس في مركز ثاني.. حلاته الشي يوم يكون صادر من الإنسان بروحه مب بهالطريقة اللي تجبرهم على إنه يعاندون أو يلبسون هالأشياء في مكان ثاني..
    إنتي ما لاحظتي هالشي و أكيد شفتيه في الجامعة، من يدخلون الجامعة فصخت كل شي، كأنها تبا تتحرر من شي إسمه غشوة أو شيلة؟؟
    هذا نفس الشي أحس ..
    و نفس ما قلتي في ناس يستاهلوون بس لازم يكون في إسلوب أو حتى المركز لازم ينزل قوانين ما يلبسون هالعبي..

    ========================

    الوتين

    آميــــن ..

    لحظة أنا متزوجة منو قال؟؟ لوول شو هالإشاعة لا بعدني بنووته يا حبيبتي هههههههه

    ======================

    seema*

    أحلى شي يعيبني فيج، كل إختصاراتج في الصميم، كلمين يعبرن و خلاص.. خاطري أشوفج تتفلسفين يوم لول ..

    أكيج المبدأ صح، لكن التطبيق أشوفه أكبر غلط..

    =====================
    فيلسوف

    هلا و الله ..

    إحساسك في محله يا أخويه، التطبيق وايد غلط، بالذات بهالطريقة الغريبة .. و أحس كل ما يرشون أكيد يظحكون على اللي يستوي و ما أشووف هالشي نصيحة، و ثاني شي أتخيل رشوا وحده و هي ما تدري أو على بالها راشينها بماي و الناس كلها إطالع عباتها و تظحك، معناته هم لفتوا الإنتباه أكثر ..

    أنا أحس لازم يكون هناك دور للمراكز و ما يكفي بس الأمر بالمعروف، ممكن المركز ينزل قانون لكن ما يمشي و يمكن يتفعل القانون و المركز يقدر يمنعهم .

    =============================

    Crazy in freedom

    لو خليتج تكتبين هالموضوع أحسن هههههه، لا بالعكس والله أحب اللي يتفلسفوون كتبي و عبري و طلعي كل اللي في خاطرج ..

    أول شي عن أمج وحليلها و الله غمضتني واااايد، و على فكرة عيبتني كلمة بويه ما كنت أعرف إنها الصبغ ..
    و بعد سبوها مسكينة و هي حليلها لا تعرف و لا شي ..
    بنقول هالشي من 26 سنة قبل غير كانوا لكن الحين ليش بعدهم مستمرين بهالشي، بالعكس أنا مب ضد هالهيئة لكن مب كلهم ملتزمين بالمبادئ و أنا شايفه بعيني في العمرة، و كانوا يحتجوون على عباة الكتف لو إنهن وساع ..

    بس حليلها أمج و الله ..

    و صــح كلامج أنا موول ما إفتكرت في هالشي ليش الحين ما يرابعوون ورا الرياااايييل، الحين أغلب الشباب بالبناطلين المرصصه شوي و بينطر و حتى القمصان، يعني جسمهم بكبره ملفت، حبكت علينا إستوينا فتنه و هم لا و الله أنا أشووفهم هم فته الحين من اللي يلبسوونه و حتى طريقة شعوورهم شقى يسوونها ..

    و المشكلة يا سارة نفس ما قلتي يهتمون بأنه المرأة عورة و كيف لابسه الشيلة و العباية يعني ما في إهتمام من الداخل بس يشووفوون الشكل، أنا أعرف وحده عندها أهم شي الشكل، و كله تقول مستحيل وحده تتغطى بالكامل و تخالف الدين .. و هم أكيد عندهم هالإعتقاد ..

    لول ليكون هالدكتورة راعية " الإغتراب الإجتماعي " شكلها أحسبج وايد متأثره فيها لوول .. ماسمعتي عن هالمثل ما بين الجنون و العبقرية شعره، ما أدري إذا صح أو غلط ..

    حتى العناد مافيه فايده يا سارة، أنا أحس لازم ينزل قانون و خلاص، و الهيئة تمشي عليها و لا تتعداه، الهيئة تتعدا لأنه يمكن ما في قانون يخالفها على شي ..

    بغيت أسألج هل هالهيئة تابعه للشرطة، و يعني في حالة قيام الهيئة بضرب شخص، و طلع برئ هل يتحول رجل الهيئة للشرطة، وين يتم الحبس في مركز الهيئة أو الشرطة ؟؟؟

    ========================

    رورو الشخبوطة

    يبتيها صح وين غض البصر، أوكي حتى لو غض البصر و كان يحس إنها ملفته على الآخر لكن ما يرشها ترا هو إن رشها كل حد بيتم يطالع و هو بيلقى الإثم على هذا كله .. الله يهديهم بس ..

    ==================

    ردحذف
  13. princess Sara

    لوول كلمة عجيبة ههههه .. يبتيها صح ههههههه ..

    أنا وياج في أولا، لكن ثانيا ما نقدر نعتمد عليها دايما لأنه في أهل نصهم ما يدروون شو يلبسوون بناتهم، أو يشووفوونهم بعدهم صغار مب عارفين، يعني لو بنتهم لابسه لبس ماينلبس حق مراكز ساعات الأهل ما ينتبهون عيونهم تتعود و خلاص بالتعود يحس الإنسان هالشي عادي .. فعشان جي لو كان شي برع هيئة أو حتى في المراكز قوانين تمنع لازم تكون بإسلوب حلو و راقي .. مب بهالطريقة ..

    و ثالثا بعد أنا وياج ..
    و أشكرج على " الخيبة " ههههههه

    =========================

    Engineer A

    من ناحية الإسلوب فهو غريب، و أصلن اغلب البنات يعاندون الحين، يعني صعب تتخذ هالطريقة ..

    داشين السوق، لأنهم عارفين إنهم بيلقون قطيع من البنات، ف حرام يردون البيت و الكلوركس مترووس، لازم يخلصوونه تراهم شارينه لوول.. و التصرف غلط لأنه ما أعتقد يردع ..

    =========================

    Yazeed

    على فكره شرعيا ً اللي أتلف العباة
    ملزم بتعويضها عنها شرعا ً ،،

    هذا المفروض، و كل إضرار بالغير يلزم فاعله و لو غير مميز بضمان الضرر ..

    و صح يوم قالوا اللي ما قدرت عليه هالهيئة نحنا نسويه، يعني كأنهم يتعدون على وزارة الداخلية .. يمارسوون أمور و ما عندهم صلاحية بأي شي ..

    و عن الإساءة أكيييد في ناس كثير يسيئون للدعوة واايد و بالذات عندكم ..

    و مبدأ الأمر بالمعروووف وايد حلو وزين، لكن البعض ما يطبقه صح في تشويه .. و لا هو رائع..

    عندي سؤال سألته لكريزي .. بعد بسألك إياه بما إنكم من السعودية ..

    كنت أسأل هل هيئة الأمر بالمعروف تابعة للشرطة و لا منفصلة، حتى من ناحية الحبس هل لهم حبس منعزل عن الشرطة أو لا و إذا في شخص من الأمر بالمعروف إعتدى على رجل و طلع بريء هل يتحول رجل الأمر بالمعروف للتحقيق أو لا ؟؟؟

    ردحذف
  14. Hesham

    شكلك لم تفهم قصدي في الموضوع..أو كانت عليك اللهجة صعبه..
    ما كنت أقصده في الموضوع، أنا ما قام به الشباب ليس بإسلوب صحيح، بأن يقوموا برش البنات بالمبيض؟ فمن حقي أن أعترض على هذا الموضوع ..لأنه ليس بإسلوب نصيحة ..

    ردحذف
  15. كده فهمت وان كان برضه لم نختلف جوهريا نعم من حقنا الإعتراض ولكن باسلوب متحضر

    ردحذف
  16. صحيح كلامك.. و شكرا لك يا هشام على مرورك

    ردحذف

  17. السلام عليكم ،،

    تحياتي أختي ،،

    أسلوبك في النقاش راقي و محترم ،،

    لكن مابه حيله ،،
    لازم عرق المحاماة يطلع (:

    بنظري أنت ما تحتاجين أحد يكون
    وسيط بينك و بين الحقائق المجرده ،،
    و عقلك ماشاء الله عليك ..
    ما يحتاج يكون تحت و صاية أي كان ،،

    لذا أرجو إنك متى ما كان عندك وقت
    تحاولين تتواصلين بنفسك مع الأخوان ،،

    في صفحتهم بالفيس بوك ...

    http://www.facebook.com/pages/alswdyt/sfynt-alnjah-hyyt-alamr-balmrwf-walnhy-n-almnkr/112114562154762?v=wall

    أو على موقعهم الرسمي ...

    ‎http://www.pv.gov.sa/Pages/default.aspx

    و ياليت يكون معك فرصه تطلعين على
    الإصدار الإعلامي الدوري لهم
    بعنوان ( الحسبه )
    و أتوقع الأعداد موجوده في الموقع ..

    و أكتفي إني أطمئن المحاميه القلقه اللي داخلك

    بأن الهيئه دائره حكوميه ..
    تعمل بالتعاون و التكامل مع
    أمارات المناطق و المحافظات و المراكز الإداريه
    و الشرطه والأمن العام و قوات المهام الخاصه
    و التحقيق و الإدعاء العام و المحاكم الشرعيه
    بل و ‎هيئة حقوق الإنسان أيضا ً
    وقد نجحت معهم مؤخرا ً
    في إنقاذ امرأة عربية ..
    تم بيعها و شراءها كالعبيد للقواده عليها ..
    و سلمت للهيئه النسائيه لحقوق الإنسان
    و وضعت تحت إشراف صحي و نفسي حتى يتم حل قضيتها

    و هذا كله تحت مظلة وزارة الداخليه

    و نعم سبق و حصل منهم أخطاء ،،
    لأنهم بالنهايه بشر .. هم ليسوا ملائكه ،،
    يخطئون مثل ما غيرهم يخطيء !!
    و يقدم المخطيء للمحكمه الشرعيه ،،
    كأي قضيه تدرس أمام الشرع ،،
    و يصدر فيها حكم القاضي ،،
    و يعاقب المخطيء ..

    بالعربي مثلهم مثل غيرهم ،،
    في أي قطاع حكومي آخر ..
    ما لهم أي حصانه ..

    و لأ .. مقراتهم مكاتب عاديه ..
    تحقيق و جمع معلومات و استقبال قضايا ..
    و انهاء الأمور البسيطه ..
    كالمعاكسات و الإزعاجات ..
    و كتابة تعهدات بعدم تكرار الخطأ ،،
    بحضور الأب أو من يقوم مقامه ..

    الضبط و التوقيف في مراكز الشرطه ،،
    و القضايا تنظر في المحاكم ..
    و تنفيذ العقوبات في سجون الدوله ،،

    قولي للمحاميه تطمئن ،،

    تحياتي لك ،،

    و لموضوعيتك في النقاش ،،

    تذكرت ،،

    الهيئه تؤدي أدوارها مع الجميع ،،
    رجال و نساء
    كبار و صغار
    شباب و بنات
    و حتى اللي ما ينعرف هم إيش بالضبط !!
    مواطنين و مقيمين
    باختصار مع الجميع بدون استثناء ..
    و ليست موجهه للنساء فقط ،،
    هذا غير صحيح أبدا ً ،،
    وفيه قصص و نماذج ممكن تطلعين عليهم بنفسك ،،

    بانتظار مواضيعك القادمه ،،

    شكرا ً لك ،،

    أخوك ،،
    يـزيـــد ،،

    ردحذف
  18. بس أخويه يزيد انا لاحظت النساء أكثر شي تتم ملاحقتهم و هذا اللي لاحظته و الشباب اللي لاحظته في حالة المعاكسات.. هذا يمكن اللي لاحظته في زيارتي للعمره..

    أما عن أفعالهم، فأنا بقلك بصراحة ما أعرف عدل لكن أنا أكثر شي اللي أقراه و موجود في الجرايد و المنتديات أو على اليوتيوب، طبعا أنا ما أغفل عن أي شي إيجابي قامت به الهيئة، و أكيد إلهم إيجابيات .. و أنا أعرف شايفه كذا فيديو الهيئة ضابطين خمور و مخدرات .. !! بالعكس ها شي حلو .. لكن بعد عندهم سلبيات .. و على فكرة الموضوع ما أدري كيف صار و دخلتوا سالفة الأمر بالمعرووف لوول مع إنه الموضوع عن شباب يتحسبون نفسهم أحسن من الأمر بالمعروف.. ههههههه

    لكن إنته يمكن ما فهمت وجهت نظري في هالأسئلة و ليش أسأل عن العلاقة بين الشرطة و الأمر بالمعروف، و بالذات في المسائل الجنائيه و الشرطي عارف في القانون على عكس الهيئة .. مب عشان شي.. بس بغيت أعرف من ناحية قانونية وتثقيفية بعد .. لأنه تقريبا اللي تسويه الهيئة عمل مكمل للشرطة مثلا الهيئة تقدر تضبط شقه فيها خمور .. مع إنه الأصل عمل الشرطة أو يكون عمل الإثنين وياهم مع الشرطة ..

    أنا بشووف المواقع اللي عطيتني إياها عشان أريح فضوولي .. شكلي إذا تميت أسأل و أسأل ما بخلص ..

    وشكرا أخويه يزيد على الرد ..

    ردحذف
  19. أتمنى يكون هالشي صج أنه قصدهم التطهير لكن هذا مو قصدهم و لو كان من البداية لكن مع الوقت يصير ولع و لعبة و تفريغ طاقة غضبية و بعدين هالحركة لا موجودة لا بشرع و لا بدين و بعدين النظرة الأولى بس مو محسوبة لكن بهالطريقة النظرة مستديمة و لا لمنو للبنات اللي قصدهم الفتنة
    عسى الله يهديهم أخطاو بالطريقة و لو كانت نيتهم زينه لكن هاذي خطوة من خطوات الشيطان الشيطان ما يقول أزني لكن يقول طالع شلابسين أستغفر الله ثم نظرة ثم ثم ثم ثم
    الله يهدي شبابنا و بناتنا و يحفظهم من الفواحش ما ظهر منها و ما بطن
    و تسلمين على الطرح الواعي و الغيرة و موضوع فعلا خطير و مهم .
    موفقه

    ردحذف
  20. عايزين الولايات المتحدة الإسلامية تقوم لازم نودود لبعضنا عشان تقوم ..

    ودود يا ودود .. وَدوِد .. ودوادا .. وَد (بفتح الواو).. وِد .. (بكسر الواو)

    لازم تتودوادو بها (اشتغلوا وسبحوا بها .. صبح وليل .. ليل وصبح .. داخله خارجه .. خارجه داخله) وانشروها.

    ردحذف
  21. :) الغاية تبرر الوسيله

    ردحذف
  22. تحياتي أختي ،،

    بالعكس أسئلتك جدا ً مشروعه ،،
    أصلا ً الأسئله عموما ً في أي موضوع أمر مشروع
    شلون تزيد حصيلتنا الثقافيه أجل !!

    لكن عندي رجااااء ...

    لا تسمحين لأحد يوجه تفكيرك لأي وجهة كانت ،،
    ابحثي بنفسك عن الحقائق ،،
    و كوِّني رأيك الخاص فيك ،،
    المبني ع قناعاتك الشخصيه ..
    و أنت أكيد عارفه هالشي بحكم كونك محاميه (-:

    وهذي آخر قضية للهيئه ..
    أنقذ رجال الحسبة بمكة المكرمة ..
    سيدة سعودية متزوجة (35 عاما)
    من الوقوع في الخطيئة مع بائع جوالات برماوي الجنسية (29عاما) استغل ظروفها المادية، وعرض عليها جهاز جوال جديد هدية في سبيل تكوين علاقة محرمة بينهما.
    وجاء تدخل رجال هيئة الأمر بالمعروف والنهي عن المنكر (فرع شارع الحج)أثناء عملهم الميداني الاعتيادي في مخطط المحيسني بالعسيلة شاهدوا سيارة مظللة الزجاج تدور بالمخطط وتدخل في شوارع داخلية مغلقة بحثا عن مكان بعيد عن الأنظار.
    ... وحتى لا أطيل عليك
    .... بقية القصه في صفحة الفيسبوك

    وهذا خاص بالشباب ..
    وفرت هيئة الأمر بالمعروف والنهي عن المنكر
    - إدارة العلاقات العامة و الإعلام
    عدداً من المصليات المتنقلة في شارع التحلية !! بالعاصمة الرياض لجذب الشباب المتابع
    لمباريات كأس العالم عبر الشاشات الضخمه
    والتي تتزامن أوقاتها مع أوقات بعض الصلوات ..

    دمت ِ موفقه ،،

    أخوك ،،
    يـزيـــد ،،

    ردحذف
  23. تحياتي أختي ،،

    شكلي طولتها جدا ً معاك << يمون بقوه !!
    أقترح تاخذين علي أجار << بس موب بأسعار دبي!!

    بعد إذن صاحبة المدونه طبعا ً ..
    اللي حاب يعرف بقية القصه ..
    عندي استعداد للنقل << ليته مو في إجازه!!

    وهذي قضيه طااازجه .. للأسف الشديد ..

    تمكنت هيئة الأمر بالمعروف والنهي عن المنكر
    في أحد أحياء غربي الرياض مساء أمس
    من ضبط مقيم باكستاني يعمل بمهنة سائق خاص
    جالس في المقعد الخلفي للسيارة في وضع مـخـل
    جوار زوجة كفيله داخل أحد المخططات المجاورة
    لأحد المولات الكبرى.وكان أعضاء الهيئة قد اشتبهوا
    أثناء جولاتهم الميدانيه في السيارة المتوقفة
    في المخطط وعند الاتجاه للسيارة لوحظت تحركات مريبة
    في المقعد الخلفي قبل أن يخرج منها السائق مرتبكاً .
    وقد جرى إعداد محضر بالواقعة واتخاذ باقي الإجراءات ومنها توقيف المقيم لحين إكمال اللازم.

    شرايك يا محاميتنا ؟!

    بس تكفين لا تقولين لي هذي حريه شخصيه !!

    دمت ِ موفقه ،،

    أخوك ،،

    ردحذف
  24. خاتون

    اللهم أمين .. اللهم أمين يارب .. الله يهديهم كل هم ..

    ================

    Tazmania

    شكرا لك ..

    ===============

    يزيد

    لا أكيد .. صح أنا من النوع اللي يتأثر بسرعه، لكن بعد الحق حق حرام الظلم ..

    و بكمل القصة على الفيس بوك إنشاء الله ..

    و عن القصة اللي ذكرتها الثانية .. لا طبعا هاي مب حرية شخصية .. !! يعني العقل ما يرضاها، و المشكلة إنها زوجة كفيله مصــــــيبة عووده .. هي كيف رضت .. أستغفر الله ..

    و صح عن الإيجار مافهمت شو تقصد ممكن توضح ؟؟

    و بالعكس حتى لو كنت لزقه على المدونة عادي هههههههه

    " على فكرة " أنا حاولت أدخل مدونتك لكن مايستوي ..

    ردحذف
  25. تدرين هذيل شفيهم ؟؟

    ماعندهم شغل وقالو نحط حرتنا بهالبنات

    ردحذف