الاثنين، 4 أبريل، 2011

بدأ التشجيع على الزواج من الثانية يا سلام سلم هههه




شوفوا عشان يعدلون نسبة المواطنين في الدولة، اليوم في الجريدة عن نسبتنا كأنه شي يديد بس يبين إنه تمهيد لهالشي، و من قبل نسمع هالشي لكن بدوا شوي شوي يصــرحوون، اليوم الرياااييل ا ما بيرقدووووون ههههههههه .. 

نقلا عن جريدة الإمارات اليوم .

الزوجة الثانية
أكد مدير عام هيئة تنمية المجتمع في دبي خالد الكمدة، ضرورة العمل على تشجيع الزواج من ثانية بين المواطنين من خلال منح الزوجة الثانية امتيازات تشجيعية منها أن يحصل الزوج على منحة صندوق الزواج ومنزل حكومي على أن يسجل باسم الزوجة الثانية لضمان حقوقها، كما يجب حرمان الزوج من جميع الامتيازات عند زواجه من أجنبية، مطالباً المواطنات بتقبل فكرة الزوجة الثانية كأحد الحلول الجذرية لمشكلة العنوسة والتركيبة السكانية.
وذكر أن الهيئة أوجدت حلولاً جذرية لمشكلة تأخر سن الزواج، منها طرح خدمة توافق الزواج أو ما يعرف بـ«الخاطبة الحكومية»، التي تتولى توفير فرص زواج للمواطنين، بهدف تشجيع الزواج بين المواطنين، خصوصاً المواطنات اللاتي تأخرن في سن الزواج، وستعمل مراكز توافق الزواج عمل «الخاطبة» في التوفيق بين المواطنين الراغبين في الزواج، وفق شروط تضعها الهيئة منها تقليل تكاليف الزواج وتحقيق التناسب بين الزوجين.


------------

تأخر سن الزواج و يحطون بديل خطابة إلكترونية شي حلو و غريب، لكن إنه يشجعون الرياييل يعرسون من ثانية و الثانية تلقى بيت من الحكومة بإسمها و صندوق الزواج يعطيه بعد المهر، و الزوجة الأولى الله يعلم إذا هي ساكنة في شقة أو في بيت أهله في حجرة .. يعني في ظلم بعد ..

ثاني شي الواحد قبل لا يتكلم، لازم يعرف يوازن، يعني يقول مثلا حتى الحرمة الأولى اللي ما عندها بيت بنعطيها بيت صح أو لا، ليش إن شاء الله الحرمة الأولى شو ذبها ..  يعني بما إنك تشجع على الثانية شجع الأولى بعد و طيب خاطرها، على الأقل قولها بنزللها راتب شهري أو أي شي، مب تكون من العدم، الحين بيعرسون بيطلبون الزواج من واحد معرس بكل بساطة بييها بيت من الحكومة .. 
و عشان يعدلون التركيبة السكانية المفروض يشجعون الأمهات على الإنجاب و يشجعونهم برفع الرواتب و على كل ولد مبلغ معين .. 

ثالث شي كل الرياايل بيعرسون من الله يبونها، كل شي جاهز بيت و مهر، و طبعا اللي بيخطبها ما بترفض بيت حكومي بإسمها يضمن لها حقها، و باجر لو طلقها عندها بيتها و الزوجة الأولى وحليلها ..

براويكم المسجات اللي وصلتني اليوم و الله ضحكت عليهن .. 

كلام الحريم بعد الخبر عن زواج الثانية 
ريلي أحبك,,
ريلي تولهت عليك,,,
ريلي ما أٌقدر على بعدك,,,
ريلي إنت أحسن واحد في العالم,,,
ريلي لو شو تسوي فيني بتم أحبك و برضى أعيش وياك حتى في جهنم الحمرا..
ريلي ما أبا سيارة يديدة و لا أبا تسفرني مكان و لاتوديني السوق و لا سينما ..
يكفيني وجودك أناظرك و تناظرني هههههههههه..

عزيزتي الزوجة الأولى  تطلقي من ريلج اللي مسكننج فحجرة  فبيت أبوه وتزجي  واحد متزوج وكوني الحرمة الثانية تحصلي ريل يدي و بيت يديد خخخخخخخ ..

بس ما أروم أكتب زيادة واايد مسجات مساكين و الله هههههه

هناك 15 تعليقًا:

  1. السلام عليكم ورحمة الله وبركاته

    لابد من العدل بين الزوجتين في كل شي فكلاهما لها الحق في الحصول على مسكن مستقل باسمها..وعلى الرجل أن يتعهد بالعدل في المعاملة والنفقة وكل شيء.
    بارك الله مساعيكم الخيرة ووفقكم لكل ما يحب ويرضى.

    ردحذف
  2. السلام عليكم ورحمة الله وبركاته ورضوانه

    نستطيع ألقاء الضوء على الموضوع من زاوية أخرى..

    صحيح توجد نسبة كبيرة من العنوسة بين الفتيات ولكن هناك في المقابل عدد من الشباب العازب الغير مستطيع على تحمل تكاليف الزواج ولديه الرغبة الحقيقية في تكوين أسرة..
    فلماذا لا ينظر لهؤلاء أيضاً ومساعدتهم لتحسين أوضاعهم وتزويجهم؟!!

    ردحذف
  3. سيما*

    لوول لا تعليق
    ------------------------

    غير معروف 1

    و عليكم السلام ورحمة الله و بركاته..

    ترا هذا هو لو بينصفون الزوجة الأولى بعد أعتقد إنه نسبة معينة بتغير رايها، على الأقل يرضونها براتب شهري أو منزل .. يعني مب الزوجة الثانية إلها إمتيازات و الأولى ولا شي ..

    آمين يارب و شكرا لك ..

    --------------------

    غير معروف 2
    في هذي النقطة بعد كلامك صح، أنا مستغربه من الزواج الثاني، المفروض يشجعون الشباب على الزواج، لأنه الراتب زين يكفيه هو و مرت و عياله .. بدال ما يزاوجوون المتزوج ..

    و الله ما عندي رد، لكن شي غريب ..

    ردحذف
  4. يا ساتر
    ما يعجبني هالحل
    اعتقد فيه حلول ثانيه .. لانه هالحل في نوع من خراب البيوت .. واقصد فيه بيت الزوجه الاولى .. شنووو ذنبهااا !

    ردحذف
  5. هالاقتراح اكيد بيلاقي ترحيب كبيـــــر من الرجاجيل هههه

    بس مساكين الحريم المتزوجات هم اللي بيقعدون بها

    ردحذف
  6. السلام عليكم


    الموضوع رائع بس أعتقد أن نشرة بهذه الطريقة غير مناااااااااااسب....

    ففيه هضم لحقوق الزوجة الاولى ....وإغراء للزوجة الثانية..... وكمان الضحية الزوج....لاحقوق ولابيت حكومي....ومسكين والله :)

    حلووووووة المسجات يبدوا حملة ألحق قبل يتزوج الثانية :


    وحلو المسج ذا :


    يكفيني وجودك أناظرك و تناظرني هههههههههه..



    وين الأهتماااااام ذا من زماااااااان




    دمت بسعادةى في الدارين

    ردحذف
  7. مسألة بسيطة !
    و معادلة سهله !

    الرجل المتزوج ،
    حصنّ نفسه و زوجته و انتهينا ( نقطة ) .
    الناتج من زواجه الثاني ؟ . . . لا يوجد !

    بل بالعكس ، تسهيل الزواج للرجل العزوبي !
    الناتج =
    1 - لا عوانس !
    2 - لا صيّع !
    3 - لا هدر مال و لا تفشخر و مفوشر !
    4 - لا مغر. . و عر. .

    خلونا مع الاشملْ . .

    ردحذف
  8. السلام عليكم...

    أي شي مو من صجهم أشكره اللي
    مسوي القرار ريال ناوي يحط ثانية ...


    عزيزتي الزوجة الأولى تطلقي من ريلج اللي مسكننج فحجرة فبيت أبوه وتزجي واحد متزوج وكوني الحرمة الثانية تحصلي ريل يدي و بيت يديد خخخخخخخ ..

    حلوة *_^

    ردحذف
  9. المواطن عنده بيت واحد ولا يدري عنه شي هالمره يفتح بيتين عزات ضاعوا العيال ههههههه اسميه المواطنين حصلولهم سالفه الحين البي بيات مشتغله على هالسالفه بس شوفي بخبرج اغلب المواطنين سالفة الزواج الثاني عندهم مرفوض او نقول غير مقبول اجتماعياً بس بالنسبه حقي طبعا من سابع المستحيلات اوافق على انه تكون فيه حرمه ثانيه في حياة ريلي لاني ما اشوف هالشي في مجتمعي يعني ما عندنا حد تزوج على مرته زوجه ثانيه بس عندي تكون مواطنه بنت هالبلاد ولا تكون وحده اقل مستوى مني صراحه على الاقل بنت البلاد شايفه الخير وبنت عز يعني بتقدر بيته الاول ومرته وحتى لو ما بتقدر ما بتكون وحده مب شايفه خير تبا تلهف اليابس والخضر وتعالي عقب على النفسيه الخايسه وشوفة النفس من عقب الفقر وغيرها

    المهم هالموضوع والمسجات وكلام اللي طرح الموضوع ناسيه اسمه ٫٫٫ اتاخذ الموضوع بسوالف وضحك يعني محد بيسير يعرس على مرته بس عشان واحد اقترح واللي يبا يعرس على مرته بيعرس بغض النظر دعمته الدوله او لا  

    ردحذف
  10. حسابات الوطن بصورة أو بأخرى تنعكس على حسابات الأسرة التي تكافح في الحياة ربما بعضها حسابات شخصية ، ولهذا يظل ماقد يواجهه الوطن من اتساع الهوة بين المواطن والمقيم هماً وطنياً ، ومع مرور الوقت سيصبح هماً أسرياً .
    ربماً لم أكن مباشراً في التعليق إلا أننا أمام واقع تعيشه دول الخليج . والحلول ينشدها الجميع .
    تحياتي لشخصك الكريم .

    ردحذف
  11. هم بهالاقتراح يوصلون فكرة مغلوطة للشباب ألا وهي أن لازم يتزوج لمصلحة مش للستر ...يعني اساس الزواج الستر والرجل لمن يبي يتزوج لازم تكون نيته الاولى هو انه يستر عالبنت ويكمل دينه ..لكنهم بهاي الطريقة بتخليهم يفكرون بالزواج كصفقة يحصل فيها على شيء ماقدر يحصله من الاول الا وهو البيت ...وثاني شي البنات مو سلعه يلعبون فيها على كيفهم ...عيل يقولون يا بنات وافقوا على المتزوج لانكم بتحصلون على بيت ..يعني الزواج صاير لعبه ...واللي على البي بي اونه ياللي متزوجة تطلقي وخذي واحد متزوج عشان تحصلين بيت !!

    بدل ما يفكرون شلون يبنون اسرة صحية متوازنة ويمتد الزواج لفترة اطول يدورون حلول تنهي الزواج بشكل اسرع

    بجانب نسب العنوسة وتاخر سن الزواج ترى نسبة الطلاق متزايدة بعد ...

    كالعادة احس القرار مش منطقي ولا مدروس عدل ...يمكن يكون فيه شي ايجابي لكنهم مابينوه بالشكل الصحيح ..
    الله المستعان ....

    ردحذف
  12. fisha

    إلا مب خراب يستوي، المفروض يزوجون الشباب اللي ما تزوجوا مب اللي عنده حرمة و الحرمة الثانية يعطونها حقوق اكثر عن الأولى عشان يعدلون التركيبة شي غريب ..
    -----------------------

    مبدعة

    أكيد ههههههههه قولي إلا مستااانسييييين، يا فرحتهم ..
    ----------------------
    ammmaa

    بس صدق الزوجة الأولى الحين بتهتم أكثر من قبل ..

    بس نفس ماقلت الموضوع حلو لكن طريقة العرض أصلن غلط المفروض يقول حتى الزوجة الأولى تمنح أشياء مثل ما تمنح الزوجة الثانية .. !!

    بس إن شاء الله تستوي تعديلات على هالإقتراح .. و لا تهضم حقوق الزوجة الأولى مثل ما قلت ..

    -----------------------

    تفاضيل

    هذا المفروض اللي لازم يتسوى، يفكرون في العزوبي مب اللي متزوج و مرتاح ..

    ردحذف
  13. خاتون

    شي غريب تحسين، يحتاج واايد تعديلات هالإقتراح .. ههههه عيبتج النكته
    ------------

    Mrs purple

    شحالج وينج مختفية..

    أما عن الزوجة الثانية جان فيه دعم من الدولة بيعرسون، وايدين يبون يعرسون، لكن وين بيحط الحرمة الثانية، و هو معاشه زين يكفيه، و بياخذله وحده مشتغله تصرف على عمرها .. بيت جاهز و مهر جاهز و خلاص .. و هم أصلن قالوا لو خذ مب مواطنة ماله أي حقووق .. يعني مستحيل يفكر في هالشي .. !! بس لا تفاولين على عمرج إن شاء الله ريلج ما يشوووف غيرج إنتي ..

    ------------------------

    تركي الغامدي

    أممممم تركي ممكن توضح أكثر ؟؟

    ----------------

    أم حروبي

    صح نسبة الطلاق مرتفعة وايد عنا في الإمارات، المفروض يطلعون حلول لهالشي، و العزابية يا كثرهم، خل يزوجوونهم قبل .. !!

    و نفس ما قلتي يغرون الحرمة الثانية بالبيت، والله أحس وايدين بيعرسون عشان المميزات اللي بتلقاها، و الحرمة الأولى مسكينه، هذا الغلط يوم يصدرون إقتراح بدون توضيح، و دون ذكر أسباب يعني ليش ما يعطون العزابية بيوت حق حريمهم و خلاص بدال الحرمة الثانية ..

    ردحذف
  14. والله صح هم بدوا يشجعون على الزوجه الثانيه
    لكن الأهالي ماراح يقصرون في طلباتهم من المهر و غيره و غيره من خرابيط العرس
    بيضطر الشاب انه يهون ولا انه يتزوج وحده من برا
    امممممممممم
    هو شي حلو لكن مب حلو
    يعني يمكن يخربون بيت احد و يمكن و يمكن وايد اشياء تستوي

    و هذا اللي مظهر هالفكره ما خاف من حرمته
    تلقييينها كافختنه بعد ماسمعت الخبر خخخخخخخ

    وبعدين يعني الحرمه الأولى ما عندها بيت يعني الريال يكون ساكن عند اهله و الثانيه تلقى البيت ؟؟!!
    يعني احس الموضوع ابدا مب شي
    و الفكره مب حلوه
    يعني غير شكل بعد

    ردحذف