الثلاثاء، 26 يوليو 2011

جزيرة صير بني ياس " الجزء الثالث و الأخير " wadi walk





هلا و الله 

سوري على التأخــــير 

رحلة وادي ووك .. 

قبل لا أبدأ بذكر الرحلة، في هالفندق عندهم ميزة حلوة، ممكن تختار جنس المرشد اللي بيوديك الرحلة، تختار ريال أو حرمة، و الحلو بعد انه الرحلة لازم يكون عدد الأشخاص في السيارة ما يزيد عن 6 أشخاص بس و ممكن تشرطون إنه الرحلة ما يكون معاكم ريال أو بالنسبة للرياييل بعد ممكن يشرطون هالشي .. 

و نحنا كنا نتحسب إنه هالرحلة بتكون نفس السفاري لو كنت شخص واحد بيكون معاك مرشد مخصص لك، أنا و أختي إستغربنا إنه نظهر مع جرووب و زين إنهم طلعوا بنات فرنسيات أو روسيات شي جي .. و كنا بالضبط 5 أشخاص و كنا ماخدين ولد عمتي الصغير ويانا .. 

وهذي الرحلة كلفتنا للشخص 60 درهم 
وهني طلعنا بسيارة السفاري لموقع المشي .. 

و هذا النوع من المشي، تحسون إنه إستكشافي يكون في الوديان و بين اليباب " الجبال "

و صح لازم تكونوون لابسي جواتي، ولابسين نظارات بسبب الشمس، لأنه بتطلعون الساعة 5 بالضبط و الجو حار ورطوبة، و لازم ماي وياكم، و هم في الرحلة يزودونكم بالماي و البيبسي و يفضل تشلون شنطة تحطون فيها أغراظكم، و تلبسون كابات أو قحافي عن الشمس .. 






و هني وصلنا لموقع الرحلة .. أنا يوم شفت الوادي قلت كيـــف بننزل ؟؟





الحين هني في الوادي نمشي، و كانت تشرح عن هالضخرة كيف تكونت، و أنا لأول مرة في حياتي أحب الطبيعة الجافة القاحلة اللي مافيها شير و مافيها شي... رووعة هدوء مب طبيعي، تحس براحة غريبة عجيبة، ما أعرف تحسون بشي غير كأنك أستكشف عالم يديد .. ما أعرف شعوور غريـــــب ..










غزال ماكلنه الشيتا مادري الضبع ..بس أهم شي إني تصورت عداله ههههههه




هني بدينا شوي شوي نصعد لفوق



روعة و الله المنظر روعة على الطبيعة، يمكن إنتوا ماتحسوون باللي أقوووله بس عمري ما حسيت و لا شعرت بجمال الطبيعة إلا في هاللحظة، حسيت إني أبا أتم هني وايد ما أبا أرد، و لو تلاحظون الفندق يبين هني .. 





الرطوووبة عالية في هالجزيرة فترة العصـــر، ويووهكم تقاطر من الرطووبة، أكثر عن رطوبة دبي .. 
ويا حلاة الماي البرد على هالجو، و الله صدق حســــيت بطعم الماي هني غييير هههه والله جنكم في فلم ..





المرشدة كانت تشرح شي هني، لكن ما كان عندي وقت أسمع ما أعرف أصور ولا أطالع ولا أسمع .. هالرحلة ما تكفي مرة أحلى أكثر عن مرة تسيرولها مرة حق تصويير و مرة تتمشى ..








الحين بدينا ننزل .. 



و ننزل 



و نزلنا وصلنا السبخة، و لو تلاحظون آثار أقدام الشيتا، إختي زاغت يوم سمعت تتحسب بيينا، قالتلها لا ما بيي ..لأنه في مكان بعيد .. 




و الحين بدينا نصعد 



ولد عمتي ما كانوا بيركبونه بسبت النعال، لين ما نحنا قلنالهم تراه مريح و حق الرحلات زين 


ماكنت أبا أبروووح و أسير عن هالمكـــــــــــــان ممتع روووعة ..  أحلى عن السفاري بواايد ..


العودة إلى الفندق 





هذا اليوم الثاني العودة إلى دبي .. 

تاخذ باص يوديك للعبارة .. 

و على فكرة خدمة الباص و العبارة هاي ما تدفعون عليها شي من الفندق ..







محطة المغادررون



و الحلو إنه في الباص و المركب كنا رواحنا محد ويانا ..

تقييميي للرحلة .. 
1. الرحلة كانت حلوة و أحس لازم ما تزييد عن يوميين، لأنه مافيها سوق مافيها شي ممكن تسوونه بعد الرحلة، إلا إذا إنتو كنتم مسوين جدول و ثاني شي الجو حار ما يساعد ساعات تيلس برع من بعد الساعة 11 .. بس ممكن تيلس على البلكونة لأنه لو حر مب نفس حر دبي تنصلخ و ماتروم تطلع، تحس حرهم تقدر تطلع و تسير و ترد .. 

2. اللي عيبني طريقتهم بوضع القنفات صوب البحر، و أحس اللي يحب السوالف و الرمسة يسير هناك بيستانسوون يودوون دلالهم و فوالتهم وييلسون هناك سواء كانوا ربع أو أهل فترة العصر إذا ما كان عندهم أي نشاط العصر .. 
3. فيه ميزة حلوة عندهم يوميا عروض أفلام على الداتا شو برع، تكون أفلام أطفال، و يكون المكان ظلاااااااام محد يشوفك  .. و نحنا آخر يوم يلسنا هناك و كنا بس نحنا و الأغلبية كانوا طالعين من الفندق لأنه السبت و كنا نحنا بس إنطالع، من حلاة الجو و الله رقدت على الكرسي حاطين كراسي ترقد، و رقدت من 9 لين 10 ماحسيت بعمري إلا إختي توعيني، و الأحلى و إنتوا إطالعون الفلم، إييكم واحد يوزع بوب كورن في صحون حق كل واحد و أنا على حظي نشيت و كنت يوعانه هههه ويابلي واحد و كلته و رديت الفندق .. 

4. الفندق و الجزيرة تحسوون المكان أمــــــــان واايد 

5. اللي عيبني في رحلاتهم، ممكن تخصصون ريال أو حرمة، و ممكن تحطون واحد يتكلم لغة عربية، و إذا مثلا بغيتي حرمة مرشدة و تتكلم عربي و مالقوا يحكون أجنبية مرشدة معاه مرشدة عربية .. 

و ممكن تزاولوون أي نشاط، لأنهم يودوونكم أماكن معزوولة محد يشووفكم فيها، و بالذات للمتحجبات، و بالأخص إذا كانوا يلبسون عبي،
 أنا الصراحة أحب أسووق سياكل " دراجة هوائية "، لكن كنت أقول ريال بيودينا ف شليت الفكرة من بالي، لكن بعد ما جربت وادي ووك و يودوونكم  أمكان محد يشووفكم فيه .. قلت المرة الياية لازم أجرب السياكل طبعا إذا لقيت حرمة و كان الجروب حريم أو حتى لو بس أنا و اللي يبا من خواتي بنجرب شوي، لأنهم يودوونكم أماكن معزوولة، و من بين اليبال و السهول و هدوء مب طبيعي تحسوون بس إنتم و الطبيعة .. 
و عندهم فعاليات غير .. بس أحس في الشتا أحلى ..


1. عيب الجزيرة، الوقت مووول مايمر بسرعة حتى كنت أكلم المرشدة الوقت ما يمر هني، قالت نحنا على الشغل اللي نشتغله، نشوف الوقت بطيء هالميزة حلوة، ممكن تسووون وايد أشياء لكن المشكلة يوم ما عندك شي تسوويه، بس تحسون لو الوقت طويل و ماعندكم شي تسووونه ما تحسوون بالملل مول .. 
2. في الجزيرة ماتعرفون متى مواقيت الصلاة.. يعني أول الأيام كنا نصلي نفس تواقيت  دبي بس نأخر شوي .. المغرب أنا كنت أصلي أول شي نفس توقيت دبي 7:20 دقيقة عقب لاحظنا المغرب يطول عندهم بدينا نأخر لين 7:30 ..

3. ماشي دكان ممكن تشتري منه الأغراض الناقصة، يعني شلوا كل شي وياكم حتى الماي شلووه، لأنه تخيلوا غرشة ماي العين لتر و نص سعرها 18 درهم مايسوا يعني شلوا مأوونتكم وياكم و إنتو سايرين هالجزيرة .. 

4. المفروض يكوون مثل سوق صغير عندهم .. 



هناك 8 تعليقات:

  1. ما شاء الله رحلة رائعة

    اهم شيء أنكم انبسطوا وغيرتوا جو واستفدتوا

    وبجد اشكركِ أختي خلتينا نشاركي هـ الرحلة الممتعة وعلى هـ الصور الحلوة.

    موفقة أختي.
    وأشكركِ على ردودكِ الرائعة في مدونتي.

    ردحذف
  2. شوقتيني عالرحلةة ...ودي اسيرها بس بالشتا :)
    احس فيها مغامره ^^

    يعطيج العافيه عالتقرير :)

    ردحذف
  3. حط رمضان الكريم برحاله في ديارنا لاحرمنا الله تعالى من نفحاته .
    داعياً الله لكم بصوم مقبول وذنب مغفور ، اللهم آمين .

    رحلة رائعة وبالتوفيق .

    ردحذف
  4. مرحبا شانيل مبروك عليج الشهر

    توني اشوف موضوع صير بني ياس ما جد سرتلها بس احسها حر ورطوبه بس الحمدالله استانستوا صراحه عيبني البوست وقرا باجي البوستات عن صير بني ياس  

    ردحذف
  5. مساء الورد

    رغم أنني لم أقرأ سوى هذا الجزء إلا

    أنني أستمتعت بكل مراحل الرحلة مع وصفك

    الإحترافي وكوني لست من الإمارات فالبتأكيد

    سأخذني الفضول لزيارتها ...

    تدعيم جميل بالصور

    تحياتي وإحترامي

    ردحذف
  6. ماشاء الله حلوين الصور كثير وباين منهم انه الرحلة كمان كانت حلوة .. ربنا يجعل كل ايامكم حلوة ..

    """"
    حبيت امر واقولك كل عام وانت بخير ، ينعاد عليك بالخير واليمن والبركات.

    ردحذف
  7. حلوه هالنوعيه من الرحلات
    متعه واكتشاف شغلات يديده

    يعطييج العافية :)

    ردحذف
  8. أشكرك على هذا التقرير الشيق جدا
    بارك الله فيك

    ردحذف