الأحد، 21 نوفمبر، 2010

رمستنا الغاوية .. !!!


هههههههه و الله ما أعرف ليش إخترت العنوان، عفان الله دوووم فاشلة في العنوانين، وبقلكم ليش إخترت هالعنوان ..
على فكرة أخس شي عندي إني أكتب العنوان .. واايد أعاني و أنا أفكر، بكتب مواضيع عادي عندي ، لكن قولولي تعالي و حطي عنوان هني أتوهق هههههه ..

أول شي السلاااااااااااااااام عليكم .. شحـــــــــالكم ؟؟ إن شاء الله كلكم بخير ياااااارب ..

ليش إخترت " رمستنا الغاوية " ههههههه ما أدري ليش العنوان يضحك أحسبه شوي هههههه، لأنه بكل إختـــصــار يتني طلبات على رمستنا يبوووون مواضيع أو بوست عن لهجتنا الإماراتية، لكن في بوست واحد صعب إني أنزل لهجتنا و كم مرة فكرت إني أنزل، لكـــن ما قدرت لأني ما أعرف شو أنزل، و ثاني شي أنا مب عايبني نظام المصطلحات اللي بهالنظام..

الرمسة: الكلام.
الغاوية: الحلوة.

ليش ما أحب المصطلحات، و يمكن تكون هاي معلومة يديدة عن اللي مايعرفون إماراتيين، نحن في الإمارات نفس اللهجة، لكن في إختلفات في النطق، و طريقة نطقها، و بعض المفردات، يعني مثلا الحين أنا لو تيني وحده من الشارجة ما يحتاي أسألها من أي إمارة بعرفها من رمستها إنها من الشارجة و نفس الشي الإمارات الثانية، للتوضيح يعني مثلا الشارجة يمدووون في الرمسة أكثر يعني مثلا أنا من دبي يوم أزقر الوالد أقوله " أبويه " ، على عكس أهل الشارجة اللي يقولون " أبووييييييييه " بكسر الياء نحنا نكسر بس مخفف هم على مد و أثجل شوي هههههه..

ثاني شي حتى المصطلحات في إختلافات من إمارة لإمارة .. و على فكرة في مصطلحات حتى في دبي بين ديرة و بردبي في كم من مصطلح غير، يعني أنا من رمستيه في كم من مصطلح إذا قلته وايدين بيعرفون منطقتي و هل ديرة نفس الشي ..

يعني بعطيكم مصطلح ..

المصاص اللوليبوب هل ديرة يقولون مصاص أعتقد، لكن نحنا نقول مصيصاو ههههههه أدري بتظحكوون و الله يقطعوووني دوم على هالكلمة أستانس يوم ربعي مال بردبي يكونون ويااايه ندافع عن بلادنا " بردبي " هههههههههه ..

المهم فعشـــان جي ماحبيت أسوي مصطلحات و من هالســوالف المتعبة، و هالمصطلحات ممكن تلقونها على النت،

ملاحظة

Successful pilot،أم حروبي، سمو الأميرة، lil.D

هذيل الإماراتيين اللي أتابعهم و يتابعووني، طبعا أنا إذا قــارنت و غلطت صــلحوا مافيها شي، على الأقل تصلح الشي، و ثاني شي طبعا منكم إلي في العين و الفجيرة والشارجة و مناطق ثانية، أباكم في هالموضوع إطلعوون هذيج الرمسة الغاوية ، هههههههههههه .. طلعوا كل شي كل معاناتكم هههههههه و حتى قارنوا رمستكم بين الإمارات الثانية مافيها شي .. و الله أخاف ينجلب هالمووضووع آخر شي حرب أهليه .. هههههه

و أرحب بأي إماراتي و إمارتية يدخلون و يضيفولنا معلومة يديدة لمشاهدينا الخليجيييين و العرب ههههههه ..

ها شورايكم لين الحين برمستنا الغاوية ههههههههه؟؟ هي أدري فنااااانه رمستنا ..

على طاري كلمة " فنانة " تذكرت أيام ما كنت في الجامعة، كنت وايد أقوول كم من كلمة بس لأني رابعت كويتيات فعقدوووني ههههههههههههه من بعض المصطلحات و منها كلمة فنانة، هالكلمة نحنا نقولها متى ممممممم صبروا بعصر مخي، مثلا أنا عيبتني شخصية وحدة فأنا أذكر وحدة من ربعنا الكوتيات كانت تسألني عن وحدة فقلتلها بالعــكس هاي فنـــانة، محد شراتها ..

و كلمة فنانة تستخدم بعد إذا كان متمرس في الشي يعني هو يحب يصور وايد و شاطر في التصوير، أقول هو فنان في التصوير، و بعد تنقال في حالة الجمال يعني إذا حلوة نقوول فنانة ما شاء الله ..

.. فأذكر يوم قلت فنانة بطلعت عينها ههههههه و قالت فنااانة؟؟ و هي تتحسب إنها ممثلة أو شي، و طبعا علقوا عليه الكويتييين ياحبهم على التطنيييييييز هههههههههههههههــ ، أحين شوي بفج حرتيه على الكويتييييات هههههههه بس و الله أحبكم بس إنتوا ماتسووو واحد ثنين سيييدة تطنزوووون هههههه و هالشي يظحكني فيكم ما تتريووون..

كنا أنا ووحده من ربعي الحين ويايه وايد .. من الشعب الكويتي الشقيق هههههه ، سايرين الكلاس و كنت لابس بنطلون كان طوويل، فيلست أعدله " أجسفه " ف " شهد تقولي شو تسووين يالله الكلاس بدا، جان أقووولها أجسف البنطلون .. جان تقوولي شنو ؟؟ قلتلها أجسفه صبري عليه شوي، إلا أشوووفها ناقعة من الظحك، أنا الصراحة شكيت في عمري إني نقعت في الكلمة قلت شي .. جان تقوولي أجفس موو أجسف هههههههههه.. هني حسيت إني ودي أصفعها خخخخخخخ قلتلها إنتو تقوولووون أجفس أنا شلي فيكم هههههههه .. والله يوم أذكر الحين أظحك على السوالف أحس بوووستي كله " ههههههههههه " يمكن إنتوا مايظحكم، بس أنا مجرد ما إني أذكر أنقع من الظحك " ..

و على فكرة حتى ونحنا و الإمارات الثانية و بالذات دبي و الشارجة دووم نتمصخر على بعض في الرمسة هههههه لأنهم يمدون في رمستهم ..

و أذكر مرة وحده من ربعي قبل لا نستوي وااايد ربع، و هي من إمارة الشارجة، كانت تباني أرااويها صور أنا مصوورتنها، جان أقوولها "تقصدين الصور مالييليي " جان تضحك و قالت أكيد إنتي مال دبي و كملت ظحكتها، هههههههه أنا هني جي إستوا ويهي *_* في خاطري "شو قلت الأدب هاي" أشكره تتمصخر و تضحك جدامي ههههههه..
.. عقب جان أقلها كيف عرفتي ما شاء الله إني من دبي جان تقوول من مالييليي ..

ترا أهل دبي الأغلب منهم يوم ينسبون الشي إلهم بالجمع يقوولوون مالييليي من مالي، يعني مثلا هالشنط ماليلي مب ماليليج، و الشارجة ما يقوولوون ماليلي في حالة المفرد و الجمع يقوولوون مالي ..

أنا ماكنت أعرف بهالأشياء إلى يوم دخلت الجامعة إستويت أعرف أفرق عدل لأنه في الجامعة تشووفيين من الإمارات كلها، من الدول الخليجية والعربية، فتستوي مواقف وياهم بسبب اللهجة . أعتقد أم حرووبي عانيتي من هالنقطة أول السنة ههههه .. لأنه أنا و هي من نفس الجامعة ..

صح صبـــروا عندي بعد شي ثاني و يا الكويتياااااااااااات بعد هههههههههههه أنا عانيت وياهم سنتين هههههههههه و هم يظحكوون على الرمسة ... و آخر شي يبونا نعلمهم كلمات و يبون يرمسوون شراتنا ههههههه عشان يوم يسيرون الكويت يرمسوون جدام هلهم ههههه ..

أذكر كنا في الكفتيريا و هنتين من ربعنا الكويتيات يو يلسو ويانا على الطاولة كنا نتغدى و الجوو كان وااايد حلوو..
ف جان أنش، طبعا عقب ما ترست بطني ههههه..
قلتلهم يالله منو بيطلع " برع " جان يطالعوني "س" و " ف " جان يقووولووولي ليش حرف العين، ليش إتعبون لسانكم حلاتها براااا هههههه ..
فقلت عشان أتفادى الطنازة بستخدم كلمة بديله على وزن برع ههههههه جان أقوولهم بتطلعوون "خاري" ولا شووو ؟؟
و أنا كنت عارفه إنهم ما بيعرفوون شو معنى خاري، بس كنت أبا أطلع برع قلت هم ما بينتبهون للكلمة، إلا أشووف الويوووه إستوت جي *_* و أول سؤال ياني هههههه "" شنو خــاري " ؟؟

ههههههههههه عقدوووووني هههههههه .. خاري، مشتقة من كلمة خارج، و نحن ما شاء الله علينا نحب نحول حرف الجيم إلى ياء .. ههههه .. نفس الجدار يدار، جارة يارة، جميلة يميلة ..

شو رايكم بهالدروووس الخصوووصية الفنااانة .. ههههههههه أحلى من المصطلحات، أنا شو قلت بدال ما أحطلهم مصطلحات بيييبلهم سوااااااالف إستوتلي في الجامعة و برع الجامعة أحلى و أحسن ..

فإذا حسيت في تفاعل في الموضوووع إن شاء الله بسوووويلك جزء ثاني أحلى و يضحك مادري شو بلايه على ال " هههههه " .. و الله ما تدروون كتابة هالموضوووع موتني من الضحك لأني أذكر عمري كيف كنت هههههههه ..
ما أدري لييش أحس و إذا ما خاب ظني إنها هالبوس بيحتل المركز الأول من بين بوستاااتي كلها هههههه ..

إذا حسيت إنه عيبكم و ما مليـــــــتوا .. بحطلك شي يديد و يا الشعب السعووووودي الشقيق ههههههههه .. و باقي دول الخليج و العربية إن شاء الله ..


ملاحظة صغيرونة"-
إذا مافهمتوا بعض الكلمات ترا بنترجملكم إياهن هههههه و ما يقصرووون ربعنا اللي حطينا أساميهم فوووق، ترجموا و شرحوو و خذو راحتكم ، البوست مالكم ..
و مثل ما يقول بوعمر " بنســـير شويه، بس لا تخوزووون" هههههههه وايد عايشه الدووور ..

هناك 31 تعليقًا:

  1. أويييييييه نسيت أنزل، سالفة بعد ويا الكويتياااااات هههههههههههه إظحك .. مب مشكلة كمينج سووووون إن شاء الله

    ردحذف
  2. ههههههههه برع^^

    من جد وش حقه حرف العين قولوا برا وفكوا عمركم

    صدق انكم شقاء ياالامارات^^

    خاري هههههههههههه


    لالا من جد احمدي ربك انك قدام كويتيات يمكن لو قدام سعوديات كان عقدوك اكثر ونحشوك من الجامعه

    اجل خاري^^ !!
    خاري= خارج ههههههه

    ردحذف
  3. لدي أصدقاء أغبطهم (بدل أحسدهم) لأنهم يجيدون تقليد لهجات أهلنا في الخليج ، من حيث أقف عاجزاً عن ذلك ، من ناحية ثانية المفردة العامية بعضها إن لم يكن أكثرها له أصل في اللغة ومع مرور الزمن تغير نطقها ، أيضاً تغير استخدامها من مكان إلى آخر حتى داخل البلد الواحد ، ولهذا كنت آمل أن ترفقي مع الكلمات التي ترينها صعبه معناها باللهجة البيضاء التي نشترك فيها جميعاً ... تحياتي لك ، وبالتوفيق .

    ردحذف
  4. هههه
    لا بس صراحة, انتِ فنانة! ; )

    ردحذف
  5. هيه والله رمستكم غاويه ..

    استانس ع هجتكم وايد عرفت بنات امارتيات من النت يونس حجيهم ..

    انا عرفت منج هالكلمه (هنتين ) انا اول ماقريتها برد لج حسبالي بدليه عقب لما رددتيها اكثر من مره باكثر من مكان عرفت انها صح ومعناها 2 صح ؟؟

    ردحذف
  6. لووووووووولز والله ضحكني البووست

    عاد يا شانيل

    انا من الفجيرة ... او الـ ( فييرة ) ع قولة أخويه ،، ودايما اللي من الامارات الثانية يتحرون لهجتنا كلها ( ش) مالش وينش إلخ..لووول
    مع إنه هآي لهجة إخوانا الشعب العماني ... واحنا ما نرمس جي ...
    امممم تدرين انا متعودة اجلب الجيم ياء
    وعندنا بنوتة في العايلة اسمها جواهر ... وأنا أناديها يواهر .. الكل يتطنز عليّ ...
    حتى الشيّرة( الشجرة ) واليمل ( النوق = الجمل )
    ما أحب انطق الجيم إلا في حالة جلبت القاف لجيم .. شرا الشارقة .. نلفظها شآرجه ..
    وأحس الحين خاصةً في زمنا .. مع سهولة التواصل و الكونتاكت << أوني عااد
    مع أهالي الامارات الثانية
    لهجتنا استوت مكس ، خليط ،بين لهجات الامارات كلها
    يعني مثلاٌ أنا .. عاد أيّمع لج لهجات الإمارات السبع كلها في رمستي ...
    شكلي بظهر لهجة يديدة
    لوول


    وسااانك يو ع ع البووست الغآآوي

    و حآآظرين للترجمة
    بس جم بتدفعوا لي بالأأول ؟؟

    ردحذف
  7. crazy in freedom
    ههههههه ياينج دوور السعووديات، صبري شوي على الجزء الثاني .. شو انسوي إنزين إذا كنا نحب إندلع الكلمة برع ههههه .. صدق إنكم جنة هالكلمة من صوبنا ولا شمن صوبكم؟؟ خخخخ
    =======================

    تركي الغامدي
    شو تقصد بالبيضاء اللغة العربية؟ و هو صح أغلب اللهجة أصلا مستوحاه من اللغة العربية لكن مرور الزمن خرب .. مثل كلمة " سايرة " من سار و خاري من خارج ..
    وشكرا
    =======================

    سيما

    هههههههه عاشت الرمسة الصح، و الله إنتي الفنانة ..
    =======================

    رووروو الشخبوطة

    هي شفتي مغوات رمستنا، تنفع لغة يديدة هههههههه،
    هي هنتين يعني 2 .. كأني اقولج الساعة هنتين و نص .. والله زين يوم فهمتيها ولا جان فهمتي غلط ..
    شكـــرا ياارووروو
    ============================

    سمو الأميرة
    تصدقين موول ماتقوعت إنج من الفجيرة على فولة أخووج فييرة ههههههههه ...
    حتى أنا اللي أعرفه إنه اللي في الفجيرة يدخلون حرف الشين في آخر الكلمة، أنا أعرف وحده ويانا كانت في الجامعة مال الفجيرة ما إدخل شش حتى كنت مستغربه، بس إنتو تستخدموون ما أكثر من مب صح ولا؟

    هي حتى نحنا شيرة ما أتخيل أقووول شجرة احس جني في درس لغة عربية هههه ..

    سمو الأميرة و الله تسوينها و إطلعييييلج لهجة برووحج هههههههههههههه ..
    أنا بالعكس ما أدخل لكن بسبت الجامعة بديت أدخل مب إماراتي إلا خليجي هههههه من طلعت من الجامعة إعتدل لساني خخخخخ ..
    بس تدرين إكتشفت إنه لهجة الشارجة مأثرة فيه، والله الربع يأثرووون، أحس بديت أمد في الرمسة وااايد ..

    لالالا يا سمو الأميرة تراج أميرة، و تطلبين بيزاااات وين إستوت ههههه .. عزات تكسر البرستيج خخخخخخ

    ردحذف
  8. ماكملت ردي ولد اخوي دودهني ..

    صاجه العنوان اصعب شي كنت اعاني من هالسالفه ايام الجامعه بالميداني اصيغ الخبر واتوهق بالعنوان وهالشي هم بالمقال او التحقيق او المقابله :\

    وهم احنا وايد حجي نقلب الجيم ياء << الحضر وخصوصا الكبار..

    تاجر= تاير
    خديجة= خديية..
    جابر= يابر ..

    وغيرهم ..

    وتونس سوالفج عاد امس احوس بسايت جامعتكم يقولون فيها ماستر :\

    وناطرين باجي البوستات ..

    مشكوره..

    ردحذف
  9. من هالبوست احس اني اخذت كورس في اللهجه الاماراتيه
    اغلب الكلمات اللي قلتيها اعرفها من المسلسلات الاماراتيه

    بس في كلمه ما عرفتها اللي هي"هنتين "ترجميها

    ننتظر بوستك مع الشعب السعودي
    ترى حتى عندنا بالسعوديه اللهجات تختلف اختلاف كلي من منطقه لمنطقه اهل الرياض غير عن القصيم غير عن جده غير عن ابها غير عن الشرقيه غير عن تبوك

    ردحذف
  10. رورو الشخبووطة

    هي والله تحسين العنوان لازم يكون جاذب، ساعات الموضوع حلو و فيه سوالف لكن العنوان يالله تعالي و إختاري ...

    عاده تاجر إلى تاير لااا هههههه، كيف جي ماسووها جدام الكوويتيات هههه عشان أطنز شوي ..

    هي في ماستر، و بيفتحون دكتوراه اللي أعرف في القانون بس عن الكليات الثانية مااعرف ..

    إنطري ياييينج شوي بفج حرتي في الكويتيات هني هههههههههه ..
    =======================

    مبدعة

    يا سلااااااام أهم شي إنج أخذت الكورس بييج صبري شوي في أعداد يااايه، بس بقلج شوي في المسلسلات النطق غير، و ساعات أحس قد مايقدروون يخففون من اللهجة و منهم يدخلون كلمات مشتركة في الخليج، و اللي يقهرني إذا حد من دول الخليج من الكل طبعا الأغلب ما يرمسوون نفسنا، و إذا رمسوا تحسين إنهم يردوون يرمسوون لهجتنا و المخرج ممكن يلزمهم بضبط اللهجة لو شوي ماضبطوا .. يعني نفس مسلسل أوراق الحب كل الخليجييين كانوا ضابطيين لو إنه رمستهم شوي كانت إظحك، و على فكرة شفتي كيف الرمسة كانت في أوراق الحب، هم كانوا يحاولوون يرمسوون رمسة هل بوظبي، لأنها تقريبا نفس رمستهم ..

    و " هنتين " يعني ثنتين .. بعطيج أمثلة الساعة الحين هنتين و نص .. كم بنت شفتي برع؟ هنتين ..
    يعني هنتين رمز رقم 2 ..

    غريبة هاي الكلمة محد يعرفها ..

    ياااينج مع السعوديات هههههه بعد هم إطنزواا خخخخ .. هي إنتو بعد لاحظت هالشي يعني الشرقية وااايد غير أهل جدة، و القصيم غير و الرياااض شوي يدلعون الكلمــــــة ههههه ..

    يالله عاااااد نبا نسمع هذيج الرمسة الغاوية يوم بترديييين هههه شكلي بخرب رمستكم آخر شي ههههه ..

    ردحذف
  11. مداام رووروو تعالي صح، محلاتج في أول رد رمســتج فنااانة، أشوووفج جلبتي كوييييتيي في ردج الثاني ههههههه

    ردحذف
  12. خخخ مدموزيل لو سمحتي..

    العرج يحن ..

    وجان زين في ماستر اعلام ..

    ومثال ع تاير..

    لما يدلعون وحده اسمها منيره يقولون مناير خزنة التاير شي جذي..

    بس مثل ماقالت لج هذي حجوة الكبار مو احنا ..


    ان شاءالله مانام بهالبوست خخخخ..

    ردحذف
  13. خوووش زمسه ...كثري نها

    كنا طالعين بحر ...زايرنا واحد اماراتي .. طبينا البحر ...واحد من الربع بيدا بطل ماي...الاماراتي طلب من رفيجي .." عطيني دبتك " ..حاولنا نستوعب الكلمه ..الدبه عندنا اهيا غطاء السياره الخلفي ..و عندكم على كلامه قنينة الماء ... بس الحمدالله تداركنا الوضع ..ما صار سوء فهم :)

    ردحذف
  14. خوووش زمسه ...كثري نها

    كنا طالعين بحر ...زايرنا واحد اماراتي .. طبينا البحر ...واحد من الربع بيدا بطل ماي...الاماراتي طلب من رفيجي .." عطيني دبتك " ..حاولنا نستوعب الكلمه ..الدبه عندنا اهيا غطاء السياره الخلفي ..و عندكم على كلامه قنينة الماء ... بس الحمدالله تداركنا الوضع ..ما صار سوء فهم :)

    ردحذف
  15. رووروو الشخبوطة

    هههههههه هي لازم، بس هني طنشي العرج خخخخ ..

    هي شي ماستر إعلام، أكيد كل جامعة فيها

    هههههههه حلوة مناير خزنة التاير

    و في شي بعد تقووله على إسم ريم ..
    نحنا عنا مدح إنتوا العكس نحنا دوم نقول " ريم شيخة الحريم " إنتو شي ثاني بس نسيت شو ؟؟

    خذي راحتج رقدي، و خذي قيلووولة اللي تبينه هههه
    ====================

    سامي ..

    شفت كيق خوش رمستنا هههههه، إن شاء الله بنكثر

    هي صح نحنا إنسميها دبة ماي أو غرشة بس دوم نقوول دبة ماي، و نحنا نقول بعد لدبة السيارة دبة، و على فكرة ما أذكر السعوديات أو الكويتيات اللي مصخرووني على كلمة " دبة ماي " هههههههههههههه تفاجأوو
    و شكرا سامي ..

    ردحذف
  16. لوووول يا حلوكم ويا حلو رمستكم :)
    واااايد عجبني البوست

    بس اشفيج على الكويتيات :p
    تراني منهم :)

    يالله ناطره سوالفج مع السعوديات

    ردحذف
  17. يجنن البوست وتجنن رمستنا لا خليت منها

    عاده انا مشكلتي مشكله ما اعرف شقايل ابسط لهجتي خاصه يوم اكتب في المنتديات الخليجيه احسهم متخادين ومب عارفين عن اشوه ارمس وانا ماخذه على عمري مواضيع وردود

    ذكرتيني يوم قلتي خديجه = خدييه ،،، يدي ما يعرف يزقرني (اسمي يديد وغلج عليه) فدوم يزقرني خديه (بالشده مب خديه لا تقرونها خديه) وكل وحده اسمها يديده يزقرها خديه ما ادريبه وايد معجب بالاسم قلب اسامينا كلنا

    ردحذف
  18. هلكت ضحك من الموضوع! والكومنتس بعد ،، صدق ضحكتيني ،،، اوه لو ترمسين عيل على فرق اللهجات! بين المناصير والعوامر ،،،

    شراتج انتي ،، تقولين مالتيه < لول ،،، انا ما اقول جيه بس ربيعاتي فالعين: كمبيوتريه .. سيارتيه .. وهكذا ....

    انا من الاشياء اللي يقولون لي اترجمها كلمة (أونه) ،، عاد هاي الشعره التي قصمت ظهر البعير! شقايل بعد بترجم آونه؟؟؟؟؟ ،،، لوووول ... صعبة صعبة :) ... اوووونها عاد ما تعرف <<<<

    وكلمة (خلاف) ،،،، يعني بخبرج هالسالفه خلاف ... بنرمس خلاااف ... يعني بعدين -ـ- ... بس تعالي ترجمي لول ...

    وكلمه (امبونه / امبوني) .... امبونها Channel راعيه سوالف ^ـــ* بس كيف بنترجم :)


    حبيت الموضووووووع ونتريا الجزء الثاني ..

    ردحذف
  19. Amwaj

    هههههه أدريبجـ أطلع شوي حريتي منهم ههههه، عندي واايد قصص ويا الكويتيات صبري شوي ههههه ..
    ======================

    غير معرووف

    هي شفتي كيف رمستنا فنااانة ههههههه،
    تصدقين أنا بعد نفسج، ساعات لو تبسطين تطلع كلمة ماااايفهموونها ههههههه تتوهقين و تعالي شرحي ..
    ههههههههههه يا خديه و حليله يدج يجنن الأسامي اليديدة يسميها خديه و الله فنااااان يدج هههههههه ..

    ========================

    lil D

    أخاف إلا من " ههههههههه " كل ما أكتب شي حطيت ههههههههه أنا برووحي أذكر و أظحك ..

    المناصير بعد إلهم رمسه غير احيد الشحووح و العوامر، أذكر مره وحده ويانا أمها شحيه رمست جدامنا شحي مافهمت شي ..
    هي عن أونه أنا بعد كم مرة قالوولي ترجميها بس أحس ما تترجم هي و " عنبوه " تحسين مالها معنى ..

    أنتو عاده هالعين قوم " أرييييد " و مش هههههه ..

    بس كلمة أونه و امبوونها يبالنا نطلعلهم الترجمة الصح هههههه ..

    إمبونها أحس على وزن من إستوت ؟؟ ولا لوول

    ردحذف
  20. السلام عليكم
    أي احنا الكويتين ياحبنا للتحرش و التطنز
    ترى اول ما نبدي نبدي بنفسنا هههههههههههه
    والله ضحكتيني ...ويا حلو رمستكم الغاوية فديتكم
    نبا بعد كمن رمسة وقصة فنانة شرات اللي قلتيهم
    ولا عليج أمر>>>شرايج فيني ضبطت اللهجة ههههه
    ياحلوكم وياحلو طيبتكم وتواضعكم

    أحنا الحضر عندنا يقلبون الجيم>>> ياء
    لكن أخف منكم شوي ..So أنا حضرية فوياج عالخط
    والحضر دووم كلامهم أسرع من سكان البادية عشان جي أنتم أسرع لأنه دبي أغلبها حضر

    موفقة وبانتظار المزيد ومالج شغل بالكويتيات لهجتكم فنانة وغاوية ^_^

    ردحذف
  21. خــــاتوون

    ههههههه لا بالعكس، ترا هالسوالف هي اللي خلتنا نعرف الفرووقات، و إنتو بعد عندكم كلمة نسيت شو هي بحطها في البوست اليديد .. و نفس الشي السعوديين عندهم كلمة مدح و نحن ذم ههههه ..

    مافهمت سكان البادية تقصدين القرى يعني ؟

    ردحذف
  22. أي تقريبا
    أهل القرى =البدو=أو اللي ما زالو متمسكين بالقبيلة

    ردحذف
  23. أي تقريبا
    أهل القرى =البدو=أو اللي ما زالو متمسكين بالقبيلة



    كلام يدل على جهل اجتماعي عميق

    لاتتكلم عن امر اذا كنت تجهله
    :(

    ردحذف
  24. اوختي =/ مب الكل يقول مش ... لول بس هاي قوم اريد شنو؟

    ههههه يوم اقرا ردودج وانتي تكتبين تخليني اضحك
    تذكريني في ربيعتي :)

    ردحذف
  25. هههههههههه تراها كلمتكم هاي " أريد " ولا إنتي تقوولين أبا .. ههههههههه ..

    ردحذف
  26. هههههه من جد عليكم مصطلحآت
    جد وش سوينا حرفنا اللغه العربيه الاصيله هع

    حتى حنا بالسعوديه يييييييييييه
    لهجآت الدنيا
    عندنا كويتي اماراتي عماني سعودي اصلي شامي مصري
    من كل شيء
    سبحآن الله يعني الشمال شوي ع شامي
    الجنوب ع اماراتي عماني
    الشرق ع كويتي بحريني
    الغرب ع مصري

    بس اللهجه السعوديه الاصليه تلقينها ب الوسط ب الرياض و ماحولها


    و عندنا با السعوديه بالحساء قريبه اللهجه من البحرينين و الكويتين
    ف مستلمينهم باقي المناطق طنازه


    ع قولة وحده معي ب الجامعه كلن يتحجى بأصله ! ع2

    ردحذف
  27. كله واحد

    ههههههههه و الله ظحكتيني .. المكس كله عندكم، ما شاء الله إنتو بلد كبير ولازم الحدود تأثر، بس أنا تعجبني رمسة هل الرياض و الشرقية واااايد تعيبني، رمسة هل جده مب واايد .. على الشامي يتكلمون شوي .. !!

    ردحذف
  28. ههههـ ..
    حلو موضوعج ..
    احنا في راس الخيمه وااايد عدنا لهجات لانه اتعرفين احنا الاماره الوحيده اللي فيها كل البيئات ..عدنا الحظر و البدو و اهل القرى و اهل اليبال و اللي يجمعون بين اهل الزراعه و البحر و هل الجزر ( قوم طنب و هاييل ) و العيم و هل فارس و البلوش و هل ابخه و اللي اصولهم امن الامارات الثانيه .. القريه العالميه ترانا مسووين هههـ ..
    صح انها اصقر من بوظبي و دبي و الشارجه لكنها ما شاء الله لهجات الامارات كلها عدنا ..

    بس عاد انا بقولج عن لهجةالحظر لاني منهم و هي اللهجه اللي اكثر شي مستخدمه ، و بعدين لو تميت اقولج عن باجي اللهجات اللي في راس الخيمه ما بنخلص ..

    جوفي ( او ممكن نستخدم شوفي )..
    لهجتنا نفس لهجه هل الشارجه .. يعني اجرب اماره للهجتنا الشارجه ..
    وفعلا كله يعيبون علينا احنا مال راس الخيمه انه اونه انمد الحجي وايد ..
    بس بالعكس احس المد اخف امن الهاء آخر شي مب اثجل هههـ ..

    و بعد عن سالفة اسماء الاشاره .. احنا كله انقول ها ، هاي ، هاك ، هاييج ، هاييلاك .. ما نستخدم الذال وايد جي اخف في النطق ههههـ ..

    و يوم نسأل انقول شو اسمج او امنو اسمج << فناتك مال راس الخيمه ..

    و ما انقول مثلكم مال دبي .. انتو اتقولون "امايه" احنا انقول "امي" .. و اتقولون "ابويه" و احنا انقول "ابوييييييييي"<< لازم انمد الحجي ( يمكن بعظكم بيستقرب اني اقول حجي بس عادي نستخدمها احنا يعني مب قريبة)

    و بعد من فناتك هل راس الخيمه انه احنا الوحيدين اللي في الامارات اللي نجلب الغين قاف .. يعني ما انقول (غزال) انقول
    (قزال) .. و ما انقول(غوري) انقول (قوري) ..

    و تبعا لهاي القاعده بيكون عنوانج : رمستنا القاويه.

    و بعد انتو في دبي اتقولون "اشعنه" احنا ما نستخدمها احنا انقول "جيه"
    بمعنى اشحقه أو ليش تقريبا ..

    و عاد على سالفة جيه .. في عباره حلوه و سريعه انقولها و هي :
    جيه جي ؟
    يعني : لماذا هكذا ؟


    و انقول بعد ((لاه)) في اخر الجلام و هي تستخدم للتوكيد ،و ممكن تي بمعنى : أليس كذلك ؟<< فلسفه ادري

    مثل هل الشارجه بس ما نستخدمها كثرهم..هههـ

    و عاد بقولج عن سالفه .. احنا ترا وايد نستخدم في لهجات الخليج حرف ((ج)) بو ثلاث انقوط << وصف رائع !
    فاحيد يوم كانت عدنا معادلات الكيميا هاي السنه الفصل الاول ، كان يقولنا في السؤال : فكي المعادلة التالية ...........
    فاحنا بسم الله علينا امن الفصاحه ما انقول ((فكي)) بالكاف ، كله انقول ((فجي)) << اتقولين باب مب معادله..هههـ

    يعني ها اللي اذكره ..

    و على فكره..
    في تعبير شائع في كل دول الخليج و يمكن تتفاجئون يوم بتعرفونه و اللي هو :
    (( ملعون الصير )) ..

    عاد الله يسلمكم ملعون الصير ها يعني ملعون راس الخيمه ، لانه الصير ها اسم من اسماء راس الخيمه ..

    لا تفهمونها قلط و اتقولون يعني هل راس الخيمه ملعونين وحليلهم .. هههـ ..

    بس الله يسلمكم هو يقصدون فيه البرتغاليين اللي كانو في راس الخيمه ايام الاحتلال .. فيوم حد ايقول حق حد يا ملعون الصير جنه يشبهه بالبرتغالي اللي كان في راس الخيمه و طبعا اتعرفون اللي سووه البرتغاليين يوم يو .. عفسو البلاد و العباد<< حلوه البلاد و العباد هاي .. هههـ

    مشكوره ع الموظوع الحلو و الممتع :)

    ردحذف
  29. و إظافه بعد نسيت اذكرها ..
    و فقط في امارة راس الخيمه من بين امارات الدوله ..
    حرف القاف نجلبه غين في كثير من الاحيان او جيم أو جيم قاهريه (الجيم و الجيم القاهريه مشتركه امبينا و امبينكم كلنا نستخدمها بس الغين احنا نستخدمها بس ) .. يعني مثلا:
    ما انقول ((مقلمه)) انقول ((مغلمه)) ..
    أو مثلا ما انقول : ((طاقه)) انقول((طاغه)) <<متميزين شو انسوي بعد ..هههـ
    لكن ها النطق و نطق الغين قافاً منتشر بس مب وايد وايد ، قبل كانو يستخدمونه اكثر ..

    ردحذف
  30. واغشيه محلا هالرمسه بردّتي فوادي

    ماتقصرين فديتج ..

    من زمان أدور حد أعرفله ويعرفلي لوووول

    كل إلي إشوفهم رمستهم خمبقان مانعرفلهم شو من الطبش

    خويتج
    العنود

    ردحذف
  31. مساء الخير علي الجميع ، قضيت سنوات في عدة بلدان عربية أتقنت جزء من لهجة كل بلد كنت موجود فيها لكن لما جيت الأمارات لقيت أهل أبوظبي يحكون بطريقة وأهل دبي والشارجة يحكون بطريقة أخري ، بذلت مجهود إني أتعلم لكن ما أستوت الأمور عندي وأنا مدرس عربي للأجانب في الأخر المدرسة جابوا مترجمة إماراتية وقالو لي انت بتعلم الطلبة مصري .... مو إماراتي وعدلوا كل الكلام الموجود في الكتاب باللهجة الإماراتية شوية إتحسنت لكن ما زلت إلي الأن بحس إني ما قادر أتقن شي ، طول الوقت أشوف شعبيات الكرتون ، قبل شهر كان يحكي وياي واحد يقول ارمس ما فهمت فضلت شهر أسأل نفسي شو يقصد ليش يقول أرمس بعد ما قريت المكتوب في الويب سايت مالكم صرت أفهم أنه الرجال يقصد أنه يحكي ... بسمع أذاعة الشارجة بفهم جيد شو بيقولون لكن أول ما أسمع شخص أخر بيتكلم بطريقة تانية ما بفهم كل منطقة بالإمارات عندها لهجتها البعض ييتكلموا سعودي أقدر أفتهم زين لكن المشكلة بالنسبة إلي لما يبدلون اللهجة ما بستوي أفهم ولا شي

    ردحذف