حلق عبر الطـيران القطــري .. !!

السلام عليكم 

وبعد إنقطاع طـويل .. 

إسمحولي كنت سايرة العمرة، و شوفوا الصدفة شو إستوالنا هنالك، على حظنا تأخرنا عن الرحلة و ما طاعوا يدخلونا ، و كنا حاجزين على الخطوط السعودية..

و ماشاء الله كنا وايدين لو شخص واحد بيلقى حجز في نفس اليوم .. 

الطيران الإماراتي ماشي حجوزات لمدة 3 أيام و السعودية بعد ماشي حجوزات و كلنا نبا نرد دبي مانبا إنتم في جدة شو بنسوي هناك..

فقالولنا في المطار ليش ماتحجزون على الطيران القطري، تراها سايرة دبي بس من توصلون مطار الدوحة بدلوا الطيارة .. 

و أنا من النوع اللي أخاف أجرب طياير.. و يوم قالولي القطرية خفت قلت الله يعين كيف بتكون .. 

لكن الحق يقـــــــال

من أروع الطيارات، و أفضلها و متطورة وااايد  .. و أنا شفتها أفضل عن الإماراتية بعد .. 

لو شفتونا كيف نترابع " نجري " عشان ما إطير عنا القطرية نحنا في المطار كنا على الساعة  4:30 و القطرية إطير 5:30

و أبويه بسرعه يحجز و لازم نغير المطار لأنه المطار اللي كنا فيه تابع للخطوط الجوية السعودية، و أنا كنت شوي زايغه من الطيـارة .. 

لكن من ركبتها قلت ما شاء الله لا إله إلا الله، محلاها ..

و أنا كنت طايره على الدرجة السياحية ..  , و الصراحة كانت حلوة، أول ما يلست على الكـرسي، قلت هاي معقولة حق دولة الخليج؟؟ 

لأنه الإمارات لدول الخليج متعبه وايد، وأحس طياراتهم جدام لدول الخليج لكن هل على حظي مطبات هالكثر و هالكثر تختض ما اعرف، و اللي ما يعبني في طيران الإمارات إذا في مطبه قولوا، أنا يوم كنت راده من تركيا و الكويت يتمون ساكتين لدرجة تشكين إنه عطل في الطيارة مب مطبات و يوم نعدي المطبات، و تستقر الطيارة يقولون كانن مطبات هوائية و إعذرونا .. ما أعرف إذا هذا نظام الطيارات الباقية أو لا.. بس الحمدالله ما تعرضنا في سيرتنا لأية مطبات هوائية .. 

لأنه يوم كنت راده من الكويت  الأجواء كانت مستقره، إختظت فينا الطيارة خظ حسينا كأنه الطيار توه عاطينه ليسن طيران و يوم نزلها الله لا يراويييييييكم تقولوون إنفجار إستوى في الطيارة .. 

بس طيران الإمارات للدول البعيدة ممتازة لكن دول الخليج ما أنصح ههههه .. أنصحكم بالقطرية الصــراحة، حلوة و نظيفة و راقية و تكنولوجيا متطورة فيها.. لكن الحق حق موظفات الطيران القطري زينات و مؤدبات، لكن ما أعرف ليش أحي موظفات طيران الإمارات غير وايد أحسن و كله يظحكون و تعاملهم وايد أفضل..

الحلو فيها بعد شاشات الدرجة السياحة كبـــيرة، و بالرغم من إنها شغاله في دول الخليج، و كل البرامج اللي فيها يديده، و حتى تقنيتهم عاليه جدا .. ما تدروون كيف أنا معجبه فيها الحين ههههه ..

و أخيرا شكـــرا من الله، إنه طيارتنا طارت عنا هههه، و جربنا طيران يديد و إستمتعنا بالرحلة واايد ههههههه .. وصدق و عسى أن تكرهوا شيئا و هو خير لكم ..

 و على فكـرة عشان ما تقولون يمكن على حظكم الطيارة اللي ركبتوها زينه، ترا نحنا نزلنا مطار الدوحة و على طول دخلنا مطارهم بدلنا الطيارة اللي سايرة دبي. 

نفسها بالضبط، بس الفرق البسيط، إنه التلفزيون يشتغل لكن ما يعطونكم سماعات لأنه الرحلة قصيرة من قطر ل دبي 40 دقيقة، و أصلا ما وحالها طيرها يلسنا 10 دقايق قال بينزلها هههههه .. و الله أحلى رحلة .. 

 و شكــرا للطيران القطــــــــــــــري