الاثنين، 14 فبراير 2011

لكل من يريد أن يكون نملة " حوار مع نملة "




السلام عليكم، شحالكم ؟؟


 إن شاء الله كلكم بخير .. 


اليوم برمسكم عن كــتاب غريب عجيب، حرام إنه ما يتم تدريسه في المناهج الدراسية بهالصورة و هالطريقة خلاص ملينا من الإسلوب التقليدي، و الله الطلبة بيحبون الدراسة لو إتبعوا هالمنهج .. 


 أنا بعدني ما خلصت الكتــاب لكن صدق أحس أحين أبا أستوي نملة، و أبا أغير إسمي إلى نموولة، بس أخاف أخرب على نموول ههههه ..

أنا حاليا أقرأ كتاب " حوار مع نملة مؤمنة "





وأنا لو أقولكم عمري ما سمعت للأستاذ الدكتور صبري الدمرداش بس كنت أسمع عنه، مع  العوضي و أسمع إنه هالبرنامج كان من البرامج القوية، لكن ما كنت أعرف إنه عنده كتب..


 إلا مرة عرفت عن طريق  خاتون كانت كاتبة لستة الكتب اللي كانت قارتنها في مشروع مقروءاتي .. و إستغربت إنه عنده كتب .. و كل يوم بسير و بشوف و أنسى و هاك اليوم كنت في المكتبة .. و إذكرت و سألتهم عن كتبه فكانن أربع كتب اللثي موجودات بس أنا تنقيت إثنين قلت خلني أجرب ما أبا أجازف و أفر الكتاب .. الكتاب الأول كان حلو و إسلوبه أجمل من رائع ما شاء الله التعبير و البلاغة عنده مب طبيعيه ما شاء الله .. 


و هالكــتاب شدني شد إلى عالم السماسيم و كيف يعيشن هالسماسيم ..  
والسمسوم لغير الناطقية بالإماراتية هو النملة و جمعها سماسيم 


و الأجمل إنه حوار مع النملة مب إسلوب نظري تحس إنه هنالك حديث و جدل بين النملة و الدكتور .. 


عشان ما تملون بقلكم من الأشياء اللي عجبتني و إستغربت منها في عالم النمل .. 


تدروون إنه النمل مخلوق قبل الإنسان ب 150 مليون سنة ..


النملة تقدر تحمل بنفس و زنها أو أكثر على عكس الإنسان لا يستطيع ذلك، و إذا بغت تشل الحديد بتشله بالتعاون مع النمل .. 






تدرون إن النمل ما يعرف شي إسمه إكتئاب، و طول الوقت فرحان و سعيد..


 و الشي الغريب إنه النمل يزرعون و عندهم زريبه هههه ظحت من هالشي ما توقعت و صبروا شوفوا شو يزرعوون منوا قدهم النمل، يرعون فطر و هالفطر إسمه " عش الغراب "








 ويقولكم هالفطر يعتبر أشهى و أحلى أكله عند معشر النمل ههه .. و الله عالم حلو ما توقعته جي ..  و الصراحة النمل شاطرين في الزراعة و متعاونين  يقولكم جماعة تحرث الأرض و جماعة تزيل العشب و جماعة تزرع الأرز و الرابعة تحرس النباتات من هجوم الديدان ههههه ياووويلي على النمل ههههه لا و يقولكم عاده عقب ما يستوي وينبت، يسيرن الشغالات عند الزراعة و مهمتهن  يقطفون الزراعة  و بسرعة يودونه المخزن، حتى النمل عندهم بشكــارات .. 


شوفوا هالنقطة اللي إستغربت منها يا سبحان الله مهما إختلفت أحجامنا لكن كلنا نمارس نفس الأشياء .. 


الكاتب بتحدى النملة ويقولها: و نحن معشر البشر نحلب مواشينا..






قالتله النملة حتى نحنا ههه أنا هني ظحكت، قلت في خاطري إنتي بروحج نقطة وين بتحلبين هههه .. سبحان الله شوفوا شو طلع عند السماسيم، يقولكم عندهم مواش، شو مواش قطعان عندهم و يربونهن ويحلبونهن حالهم من حال البشر، عاده تبون تعرفون كيف إقروا الكتاب و بتعرفوون ..


وبخبركم النمل كيف عايشين الحين و الله طلعوا عيال تجار هالنمل ههههه يعيشون في قصور شوفوا النملة كيف خاطبة الدكتور من خلال النقاش " إننا نقوم ببناء بيوتنا تحت الأرض و فوق الأرض، نبنيها في مدن هائلة و كاملة، فيها جسور مرفوعةـ و طرق موضوعة، و أنفاق مشقوقة، و سراديب مسبوقة مزودة بكل ماتحتاج من وسائل تهوية، به صالات و حجرات وفيه دهاليز و أنفاق.. "












و بقولكم شي تدرون إنه مثل ما نحنا عنا أعياد النمل عندهم بعد و معشر النمل شعوبا و قبائل يجتمعون في هاليوم، و بعد يلعبون؟؟ يا سبحان الله .. 






و النملة تراها ذكية، صدق يوم تتعمقون فيها تحسون نحنا وهم نفس الشي و هم أفضل عنا..
 هم ما عندهم جدل  وظرايب عايشين على التعاون ..


و عشان تصدقون إنه النملة ذكية شوفوا طريقة التخزين عندهم، ترا النمل يخزنون تحت الأرض و النمل دايما يجمعون حب القمح و العدس و الشعير، و النملة تخاف تخزن حبة القمح لأنه إذا خزنتها بتنبت الحبة و بتخرب مستعمراتها و الحل هو إنها تموت خلايا الإنبات، بأنهم يكسرونها إلى قسمين، أما الشعير و العدس يقشروونه عشان ما ينبت هههه ما أعرف ليش ظحكت حسيت صدق أذكياء..شوفوا سبحان الله حبوب الكزبرة عشان ما تنبت يكسرونها إلى 4 كسر لأنه إذا كسروها كسرتين تنبت .. سبحان من أبدع و خلق ..






إصبروا بعد بييكم شي ثاني .. يقوولكم النمل يسوون " SHOPPING " ههه .. و عندهم سوق و طاعوا متى أوقات السوق عندهم اللي نواي يتسوق وياهم هههه، يوم الأحد و الثلاثاء والجمعة، بس الفرق بينا و بينهم إنهم عن طريق المقايضة و نحا عن طريق العملات .. 


بقلكم شي هني و ما بطول أكثر بعد مافيه يقوولوولي عقب حقوق الطبع محفوظة .. 


بس صدق عالم النمل الريال مسكين هههه ماله حظ اول شي بعطيكم هالمعلومة و بعدين بتعرفون ليش يغمض الريال عندهم أقصد الذكر ههه .. 


عالم النمل يتكون من الملكة اللي هي أضخم فرد في المستعمرة  و تعمر ماشاء الله حوالي 20 سنة، و الذكور ما تعيش وايد تولد في الصيف و تموت في الربيع و بعدين بتعرفون ليش و لا أقولكم إقروا أحس بتنصدمون لو تعرفون ليش لو يدري الذكر بس هههه ..
 لا لا خلاص بخبركم بس خلني اكمل .. 


و النمل عندهم الشغالات بعد و يعيشن من شهر ل ثمان شهور .. 




الحين هالشي اللي بخبركم إياه و من هني بتعرفون ليش ما يعيشون الذكور وايد .. 


 يقولكم الملكة يوم بتعرس تراها مب زد عن المعرسات بعد عندها زفة يزفوونها هههه ...
 إنزين كيف يزفونها؟  والزفة  يسمونها في عالم النمل طيرة الملكة، في فصل الربيع الملكة إطير و يلحقوون الذكور وراها وكل واحد يباها تكون زوجته و يكون الأمير شو يبا أكثر من جي، لكن بمجرد أن يصل أو الذكور إلى الملكة و تتم عملية التزاوج  يدفع الثمن الذكر ويموت فورا ..


و عجبني تعليق الكاتب يوم قال " نادتني فاستجبت، و استدرجتني إلى الجو فصعدت، و ازينت لي فصدقت، و لو إني اعلم خاتمتي ما كنت بدأت " غمضني الذكر ..




أنا أول مرة أكتب بهالإسلوب تعليق على كتــاب لكن سبحان من خلق، من كثر مب عيبني الكــتاب و أحس حرام هالكتاب ما يدرس، هذا الكتاب يعلمكم تعيشون الحياة هالمخلوق عايش أحسن عنا .. سبحان الله .. 

هناك 20 تعليقًا:

  1. سبحان الله

    النمله مخلوق عجيب

    وين نمووول عن هالكتاب؟

    ردحذف
  2. مادري عنه هههه و أنا أقول ليش إختار هالإسم ..

    ردحذف
  3. AM لازم تشوفين الـ Bee Movie أتوقع بتحبينه
    سبحان الله :)

    ردحذف
  4. حبيت الكتاب حسيته ممتع..

    2 كتاب تشوقيني عليه ..

    هذ غير المكتبه :)

    ومشكوره..

    ردحذف
  5. wo0ow
    معلوماآت روؤعة ،
    شوقتيني أقراآ الكتاآب :)
    يعطيج العاآفية
    ;)

    ردحذف
  6. مسائك خير ..

    :)

    إستمتعت جداً جداً وأنا أقرأ تعليقك غلى الكتاب

    أسلوبك ممتع ومشوق ؛)

    شوقتيني أقراه بصراحة ..

    سبحان الله الذي خلق وأبدع ..

    شكراً لكِ ..

    ردحذف
  7. ههههههههههه
    مو هين و الله !!

    شوقتيني عالكتآب AM ;*
    يباااله اقرااه

    نشوفج يالغاليه

    ردحذف
  8. سيما

    يبالي أشوفه، لأني الحين مجرد ما أشوف النملة أسرح وياها ههههه.. وشكرا

    -----------------------

    رووروو الشبخوطة
    وايد حلو الكتاب ..

    مافهمت شو اللي غير المكتبة ؟؟
    ------------------------

    غمازة

    إقريه حلو و ممتع و مفيد ..
    ------------------

    pen seldom

    إقريه و خبرينا رايج فيه وايد حلو الصراحة ..

    ------------------------
    princessa Sara

    شفتي عاد كيف النملة طلعت حالها من حالنا و أهم شي انها تتسوق هههههه ..

    و إن شاء الله تقرينه و تعطينا رايج ..

    ردحذف
  9. السلام عليكم...
    الدكتور صبري الدمرداش هو دكتوري في الجامعة خذيت عنده مقرر الكورس اللي فات هذا
    وطبعا ترى محاضراته بعد أكثر متعة الجميل فيه أنه ترى حافظ كتاب النملة وسمعنا منه مقاطع كثيرة عن ظهر غيب ماشاء الله وعمرج ماراح تملين منه اذا بخاطرج تحضريله وكنتي حاضرة الكويت في وقت جامعة
    بس خبريني وبسير وياج ترى أنا طالبته
    النجيبه ولي حضوة عنده فبيتوصى فيج ههههه
    وحتى لو تبين توقيعه على الكتاب ما يقصر :)

    ردحذف
  10. سبحان الله ..

    يعطيج العافية على السرد والمعلومات ..

    حبيت البوست :)

    ردحذف
  11. خاتون

    ماشاء الله مدرسنج، يا حظج و يا بختج عندج هالدكتور الكبير.. و الله الصراحة خاطري بتوقيعه أتمناه إيي دبي يلقي محاضرة أبا أسيرله .. يبالي أحظر عندكم في الكويت محاضراته وياج هههههه ..
    حمستيني عليه ..
    خاتون عندج كنز و الله إستغليه هالدكتوور هههه
    -----------------------------

    Engineer A

    شكـــرا حبيبتي و العفو ما تقصرين ..

    ردحذف
  12. حبيت هالكتاب وايد
    وبدوره صراحه شوفتيني اقراه
    واللي حببني فيه اكثر اسلوبج ولهجتج الاماراتيه الحلوه وايد
    وثاكيو وايد

    ردحذف
  13. سبحان الله احلى شي معلومة المواشي كككك

    الله يعطيج العافيه بصراحه من زمان كنت احب النمل والحين حبيتهم بزياده لكن اعصب يوم ياكلون اكلي

    ردحذف
  14. وووووايد مشكووووورة على هذا التلخيص الاكثر من رائع للكتاب ماشاء الله عليج استمتعت جدا واستانست
    الله يوفقج ويسعدج يالغالية

    ردحذف
  15. candy cotton

    ههههههههه، شكلي بترجملج إياه إماراتي شو رايج ههههه ...

    العفو حبيبتي ..

    --------------------

    Hind

    ههههههههه هي شفتي عاد كيف هند شي غريب و الله، المواشي و العزب، أخاف إلا شي نمل بدو بعد ههههههههه ..

    عاد ياكلوون أكلج ههههه لاتخلينه مكشوووف بيلحقوونج وين ما تسيرين ..
    -------------------------
    غير معروف

    العفو غير معروووف .. و الصراحة الكتــاب روعة واااايد .. ودك/ج ما تخلص منه ..

    ردحذف
  16. شوقتيني اقرأ هذا الكتاب

    بحطه في قائمة للقراءة

    دمتي بود

    ردحذف
  17. وايد حلو، لازم تقريييينه و إن شاء الله يعجبج ..

    ردحذف
  18. من كلامك كانك أعماني أو إماراتي
    لكن أنا أحاول احمل الكتاب وأتحمل
    لكنك بامانه شوقتني

    ردحذف
  19. مكافحة حشرات بمكة
    مكافحة الحشرات من اختصاصنا, فنحن شركة مكافحة حشرات بمكة ومكافحة حشرات بالطائف حيث نقوم برش مبيدات بمكة مستوردة لا تسبب الروائح الكريهة ولا تؤثر على صحة الانسان ابداً ونخلصك من النمل الابيض, بق الفراش, الصراصير, العته....والكثير من انواع الحشرات الاخري
    نقدم خدمات مكافحة الحشرات ورش المبيدات بمكة والطائف باقل الاسعار
    شركة مكافحة حشرات بمكة
    اتصل بنا على 0500941566
    http://www.elbshayr.com/3/Pest-control

    ردحذف
  20. مكافحة حشرات بمكة
    مكافحة الحشرات من اختصاصنا, فنحن شركة مكافحة حشرات بمكة ومكافحة حشرات بالطائف حيث نقوم برش مبيدات بمكة مستوردة لا تسبب الروائح الكريهة ولا تؤثر على صحة الانسان ابداً ونخلصك من النمل الابيض, بق الفراش, الصراصير, العته....والكثير من انواع الحشرات الاخري
    نقدم خدمات مكافحة الحشرات ورش المبيدات بمكة والطائف باقل الاسعار
    شركة مكافحة حشرات بمكة
    اتصل بنا على 0500941566
    http://www.elbshayr.com/3/Pest-control

    ردحذف