السبت، 16 أبريل 2011

سوالف



تولهت على هالمكان، من سويت البلوق الثاني و أنا لاهيه وياه، و مسويه طاف حق هالبلوق المسكين .. !! والله صدق مب عارفه أوفق بين ثنين صدق يوم قالوا صاحب بالين جذاب، الله يعينهم اللي ياخذون أكثر من حرمة ههههههه .. حسيت فيهم الحين .. !! حتى عفان الله إستويت ما أرد على حد بس أقرا .. 


المهم شحالكم و شخباركم .. علوومكم ..؟؟ 




بخبركم شي إستوالي الإسبوع اللي طاف و إستغربت منه .. 


الإسبوع اللي طاف ما شاء الله دبي كانت كلها سعودييين ما شاء الله، عشان إجازتهم، و طبعا لا يقدرون يسافرون مصر و لا سوريا و لا البحرين ف الحل الوحيد دبي المنقذ ههههه .. و الله غمضوني بس، الفنادق لعبوا لعبتهم، و يعرفون إنه الأوضاع الأمنيه في الدول الثانية مأساه ف إستغلوا الفرصة و رفعوا الأسعار .. قاهريني ..  !! 


و الشي اللي كنت مستغربه منه، كنت سايرة النادي، و هالنادي اللي أسيرله عبارة عن نادي و في نفس الوقت في مكان للفنون و سبا و الحلو فيه يطل على البحر و مسكر و للنساء فقط المهم كنت أمشي ويا وحده أعرفها من زمان شفتها صدفه في النادي و كلاسي يبدأ 5:30 و كلاسها هي نفس الوقت ف قلنا خل نتمشى على البحر .. لين ما يبدأ الكلاس .. 


سرنا نمشي، و ما شاء الله السعوديين كانوا في النادي و إستغربت كيف عرفوه لأنه أنا من سنين آي هالنادي و من دول الخليج ما شفت حد إيييه إلا العايشين في دبي .. 
ف المهم سرنا نمشر، ف يتنا أم سعودية، وااايد حبيتها، تعرفت علينا و سألتنا إذا نحنا من البلاد، قلنالها هي .. !! 


و هذا أول سؤال دايما اللي يبغي يكلمنا ما أعرف ليش يقولوولنا إنتوا من أهل البلاد؟؟ ههههه أحس لأنه محد يشوفنا فيتأكدوون قبل أو أشكال الإماراتيات صعب ينعرف هههه .. 


المهم تمت ترمسنا، و إنها مستانسه في هالمكان، و حليلها كانت يايبه وياها دلالها ويالسه ويا عيالها، و هم يتسبحون، فاللي إستغربنا منه أنا و ربيعتي، يوم قالت إنتو وين بتسيرون عقب النادي، قلنالها البيت، قالت ليش إنتو ما تطلعون، قلنالها نطلع، قالت شو يوديكم البيت أنا ظحكت، قلتلها شو نبابها الحواطة بسنا يايين إنطلع طاقتنا في النادي و مروحين، المهم تمت تسولف و ردت نفس الموضوع و قالت ما تطلعون الفليل تتعشون برع ههههههه و الله ظحكت وحليلها كيووت كانت، قالتلها ربيعتي إنها تطلع تتعشى برع في الويكند لكن أيام الإسبوع ما يناسبها، من الدوام للنادي للبيت ..  و ما أعرف ليش شكلها حاطة في بالها إنه يعني نحنا اللي في دبي، 24 ساعة برع ..
بس وحليلها واايد زينه و طيبة،  تنحب بس ماأعرف من وين من السعودية هي بالضبط نسيت أسألها هالسؤال ؟؟ 


بس هذا هو انا اللي لاحظته بالذات إذا حد يعرف إني من دبي يتحسبون أهيت برع البيت طول اليووم هههههههههه، ما أدري ليش مع إنه السياح اللي إيوون دبي يعرفون الأماكن أكثر عن أهل دبي .. هههههه يعني أنا ربعي ساعات الكويتيات ماشاء الله عليهم يحبون يستكشفون هذا أحلى شي فيهم، ساعات هو يقولووولي عن أشياء انا ما أدري عنها هههههههه .. 


يعني أنا أطلع لكن مب طول الوقت أنا في السوووق و مراكز .. !! 


يالله ما تعرفون شقى متولهه على هالمكان، أبا أكتب شي يسوي ظرابة في البلوق ههههه .. و الله إستوى ميت هالمكان .. كئيب أستغفر الله 

هناك 18 تعليقًا:

  1. لانه دبي مو مااال تقعدين بيتكم خخخ ..

    ماشاءالله..

    وعجبتني فكرة االنادي..

    وحتى انا متنحه هالايام :\

    ردحذف
  2. اي طلعي ليش لأ ;PP
    حتى احنا ولهنا عليج :")
    شخبارج بعد؟ ; )

    ردحذف
  3. رورو الشخبوطة

    هههههههههه حلوة هاي عيبتني مب مال تقعدين في بيتكم ..

    هي النادي لازم تزورينه المرة الياية و تسوين رياضة فيه حلو يطل على البحر و تستخدمين البحر بتحبينه ..

    ويه رورو شو بلانا عين ما صلت على النبي هههههه
    -------------

    سيما*

    هالنجمة وهقتنا لازم نحطها على إسمج شباصة و أنا ما أدري ههههههه
    هي بطلع، عاد مب 24 ساعة ههههه، أنا بعد و الله تولهت عليج و على الكل ..

    و الله أنا بخير الحمد الله في هالدنيا إنتي أخبارج ؟

    ردحذف
  4. من زمان وانا قايله مجلس حاريم^_^

    ردحذف
  5. "، أبا أكتب شي يسوي ظرابة في البلوق ههههه .. '"
    ههههههههههههههه ضحكتيني والله
    الحال من بعضو انا بعد احس بلوقي ميت ومغبر مال اول ..جذي ادخل اسمع صوت غرااااب وشوي الا اشوف شبك عنكبوت على صورة البنت <<شو السالفة ههه جني تخيلت الوضع زيادة عن اللزوم

    بالبركة عليج البلوق اليديد ..اسمحيلي عاد بكتفي بهالبلوق بس لاني مو ناقصه فراره مخ خخخ
    يمكن اخطف عالسريع يعني بس عشان انور مدونتج لووول
    <<خقاقه لوول

    انتي ييتي جامعتنا صح !
    في معرض الجنائيات اللي كان صوب بالمكتبة ؟

    ردحذف
  6. مو بس عليكم حتى علينا احنا

    لان السعوديات وضعهم غير في ديرتهم

    في بعضهم عبالهم احنا ٢٤ هايتين من مكان لي مكان ما ورانه اهل

    ردحذف
  7. مرحبا
    هالاجازة جت وراحت بغمضة عين لانها بس اسبوع واحد

    وعاد صديقاتي رايحين لدبي بهالاجازة

    واليوم قاعدين يوروني صورهم واهم هناك

    ردحذف
  8. حليلها الله الحرمه على نياتها ...وفعلا يختي ماكذبتي ها اللي ف بالنا انه ها الدبي ماييلسون ف البيت ابد كل وقتهم برع

    ردحذف
  9. ما الومها يوم تنشد اذا انتي من هل البلاد يوم نحن ما نشوف حد من هل بلادنا نطلع بالدس ،نرد بالدس عن الزحمه من الوافدين انا دبي ما اسيرلها من الزحمه والحين بوظبي استوت زحمه اكثر عن دبي

    ردحذف
  10. مساء الخير والإحساس والطيبه
    مساء مايليق الا ببنت دبي ^_^

    شخبارك ياعسل ؟
    ونعم والله بااهل الامارات

    بصراحه سوالفك مره حلوه وعسل

    أعجبتني والله مدونتك
    الله يحفظك ويوفقك

    تقبلي ودي وردي

    ردحذف
  11. يتراوالي بنسوي ضرابة من غير ما تكتبين شي

    إحنا بعد ولهنا عليج

    أما السعوديين اعتقد هم عندهم أفكار خاصه فيهم

    يمكن لأن السعودية كبيرة فدايما اتلاقين افكارهم غريبه عن

    باجي دون الخليج :) عادي

    ولكم باك

    ردحذف
  12. السلام عليكم...

    أهي قالت لج جذي يمكن من كثر
    ما أهي حابة الامارات وتشوف
    الموضوع من وجهة نظرها


    واي أنا ما أحد الطلعات وايد
    أحب أسوي سهرة منزلية مع
    الأهل أو الصبايا والأصدقاء

    وعالعموم ما أقدر أطلع وايد مدفونة
    بين الكتب بس من هالصيف بإن الله
    بيبتدي التحرر
    والكويتيات عبثيات ومنهم خواتي ههههه

    موفقة حبيبتي ^_^

    ردحذف
  13. مرحبا ،،
    أساس السالفة إنها هي في إجازة ،،
    و تبغى تعرف كل الأماكن اللي ممكن تزورها في دبي
    و من ناس دبي و أهل دبي
    عشان المعلومة تصير مضبوطة و موثوقة
    في المقابل أنتم في فترة دوامات و تدورون البيت
    و الراحة ،،
    المسألة خاااااارج نطاق سعوديات و خليجيات
    وسعوا الدائرة ..
    فكروا خارج الصندوق ،،

    ردحذف
  14. صباحك غاردينيا..
    دام السالفة عندك سوالف انا اقولك يالغالية انا سنوياً اروح دبي وصراحة والله العظيم مو مجامله انتم اهل الامارات طيبين وناس خلوقة ..وبلدكم ماشاء الله حلوة ..ومن ناحية سؤال السعودية هل أنتم من أهل البلاد تبين الصدق لان لما نروح دبي وساعات نبي نسأل عن شي نتلفت يمين شمال نادر ما نلاقي مواطن يعني أغلبهم أجانب وفعلاً مرة لقى اخوي واحد من أصدقائه من اهل دبي وكان يسأله عن مكان معين قاله ترى حنا اهل البلاد مانعرف أغلب الاماكن عندنا وماشاء الله السياح مايقصرون سؤال السعودية مو مثل ماقالت الاخت الجودي مع احترامي لها مو لان عندنا افكار مختلفة لكن لأن السعودية في إجازة فـ طبيعي تسألك هالاسئلة..
    بعدين على فكرك مرى احب لهجتكم حلوة :)
    واتكلم فيها مع صاحبتي الامارتيه او ربيعتي
    واليوم بتشرف بمعرفتك واتمنى ماتبعدين عن مدونتك لاني بكون متابعه بإذن الله ..
    لروحك عبق الغاردينيا
    reemaas

    ردحذف
  15. و مب بس بنات دبي ما خذيت هالفكره عنهم

    و بعدين من الجنسيات الثانيه اللي يلبسون عباه و شيله و يحووطن و يتكلموون إماراتي
    احس هم مشوهين شوي الصوره

    ردحذف
  16. Crazy in freedom

    ههههههه، هي والله الحين لاحظت هالشي ..
    ---------------------

    أم حروبي

    لا عادي و الله، و على راحتج وين تبين تردين، أنا هذاك البلوق أبا أكتب كل اللي تعلمته و اللي إستفدتي منه و مذكراتي و كل شي أتعلمه .. يعني للإفادة، و في نفس الوقت بغيت أحاول أيمع كل من يأس و حاول يضعف أبا أتابع وياه ..

    ما أدري شو السالفة تغييرات الجو يمكنه هههه هي السبب إنه مانرووم نكتب .. بس ما لاحظتي السنة الحر تأخر شوي؟؟

    ---------------------

    شاي الضحى

    و الله تدرين من المسلسلات كنت أتحسبكم جي، و الأغلبيه ماخذ هالفكرة، و صدق أتحسب إنتو عادي تطلعون متى ما تبون و في أشياء عادي.. بس يوم رابعت ربعي الكويتيات وايد أشياء إستغربت منها عكس اللي كننت فاهمتنه .. فأنا أقول يمكن هو هالسبب اللي خلا الحرمة تسألني هالأسئلة يمكن تتحسب نفس الشي ..

    -----------------------------

    مبدعة

    هلا و الله فيج، هي الإجازة مرة بسعرة و الله جنها من زمااااان ما شاء الله كانوا وايد السنة
    و المهم إنه ربعج إستانسوا
    ---------------------------

    Hind

    أدري هههههه يوم ددخلت الجامعة و رابعت مال راس الخيمة و خورفكان و أم القيوين كله يتحسبوون نهيت ههههههه ..
    ------------------

    mrs.purple

    أقولج ما أدري ليش ما أقدر أدخل مدونتج هههه
    و صح و الله نحنا دوم ما نبا الزحمة و نحب نطلع وقت مافيه حشره ههههه.. يمكن عشان جي ما ننشاف ..

    --------------------
    وليف القلب

    نورت المدونة، و إن شاء الله نشووفج فيها دوم يارب، و إنتي عسل يا عسل ..
    ----------------

    الجودي

    كيف يعني؟؟

    ردحذف
  17. خاتون

    إنتي ياحليييلج، ههههه إنتي و كتبج و الحين وراج تأليف قصص وراج مجهوود هههه .. وين ترومين تطلعين ..

    ----------------

    يزيد

    هي صح بالضبط، و حليلها كانت تعيد نفس السؤال ههههه و نحنا نقولها بنرد البيت، مثل ما قلت هم في إجازة و نحنا دوامات همنا في البيت هههههه مالنا بارض إنطلع أي مكان ..
    -------------------------

    ريماس

    هلا و الله فيج ، تدرين و الله صدقه هالريال اللي تعرف عليه أخووج، حتى أنا ربيعاتي اللي إيون من دول الخليج هم يعرفوون الأماكن أكثر عنا و نحنا ما نعرف كل مكان، لأنه ياييين يستكشفوون و يدووروون أمكان و نحنا ههههههه عادي عنا .. و هو صح في المراكز يكوونون الوافدين أكثر من المواطنين و ننعد بعد هههههه ...
    و أنا تشرفت فيج و الله إن شاء الله أشوفج دوووم يارب ..

    و تشرفين دبي دوووم إن شاء الله

    ردحذف
  18. daloo3aa

    هاللي يقهر و يذبحني، ما عندي مشكله يرمسون و يلبسون بس يقوولوون نحنا من البلاد الفلانية ..

    ردحذف