جزيرة صير بني ياس " الجزء الثاني " سفـــاري

السلام عليكم .. 

اليوم بدينا رحلة السفاري الساعة 6 الصــبح، و الجو كان روعة ما تقوولوون صيف و ماحلاة الهواء يجن .. 

و أخليكم مع الصورة و إن شاء الله تعيبكم .. 

هذا الله يسلمكم ميلس الشيخ زايد الله يرحمه في هالجزيرة و كان يستقبل الناس في هالميلس .. 

و في السيارة أهم شي موفرين الماي، لأنه بالذات العصر رطوووبة .. و حر .. 

و هني كانوا يدوروون الشيتا يسمونة على ما أعتقد المهم هو نوع من أنواع النمووور .. لكن كـــان بعييييييد وااايد و ترييييينا يكووون قريب لكن مافي فايدة ما شفنااااه ..

الصراحة وايد صور لكن هاللي قدرت أنزله، و إن شاء الله باجر بحطلكم صور رحلة " wadi walk " 

روووووووعة وااايد و أحلى حتى عن السفـــاري .. و في نشاط ثاني كنا نبا إنسويه، اللي هو يكون على القارب وقت الغرووب .. بس القارب فيه عطل .. و جربنا أنا و أختي وولد عمتي هاي الرحلة لكن صدق إستمتعنا .. و باجر إن شاء الله أنزللكم الصور .. 

جزيرة صــير بني ياس " الجزء الأول "

السلام عليكم .. 


من زمــــــان ما دخلت البلوق، تولهت عليه و عليكم، وايد إنشغلت الفترة الأخيرة، و البركة في إتصالات مادري شو مهببين و النت ما كان يشتغل إسبوع تقريبا .. حتى ما أدخل إلا من الشغل شويه ..  و أحس صدق تعودت بدون نت واايد أشياء أسويييها  .. 


المهم بخبركم أنا وين الحينه، أنا في جزيرة صير بني ياس .. و البارحة واصلين وبنزللكم الصور الحين، و الصراحة هالجزيرة اللي يبا يسوي ريلاكس و يريح نفسيا إيييها و اللي يحب المغامرات إييها بعد، فيها رحلات جوية، و فيها سفاري إن شاء الله باجر الساعة 6 الصبح بنسير سفاري، و فيها اللي يحب السياكل على اليبال و فيها أنشطة وايدة..




أول شي موقع هالجزيرة .. 

هالجزيرة تابعة لإمارة أبوظبي،  و هي الجزيرة الكبيرة اللي في النص بين جزيرة دلما و ما أعرف شو إسم الثانية..

و الرحلة تستغرق تقريبا قبل لا نوصل المركب أو العبارة بين 3 ساعات و نص إلى 4 ساعات .. و من المركب إلى الجزيرة تستغرق تقريبا 20 إلى 30 دقيقة .. 

و الحين برااويكم الصــور ..

إلى جزيرة صير بني يــاس

من داخل المركب

و هذا المركب يتحرك كل ساعة و أعتقد يبدأ يتحرك من الساعة 12 لين 6 أو 5 .. 



و الحمد الله وصلنا الجزيرة بالسلامة .. 

أنا من شفت هالافتة قلت خلاص نحنا داخلين الفندق لكن إنصدمت إنه بعده المشوار ما خلص هههه .. و أنا ما توقعت إنه هالجزيرة كبــــــــــيرة هالقد .. توقعتها نتفه و صغيرة و طلعت كبيرة .. ما شاء الله ..

أهم شي إنه الباص كان برع يتريا، لأنه صدق موول ما كان لي بارظ أتريا أكثر بس أبا أوصل الفندق و أنسدح .. 

و أخيرا وصلنا الفندق .. 

أهم  شي سيااايير السفــــــــــــــاري 

الإستقبال، و إٍستقبالهم كان حلو، و أنا الغبية اتحسب فود حاااارة ههههه ما أدري إنه فود باردة .. أتبرد شوي عقب الحر .. 

و الأهم عصير الكركديــــــــــة لذيذ .. أنا شربت 2 ههههه .. و قلت كل ما أدخل الفندق بشربلي كوووب .. 

شوفوا خلصت واحد هاكو الثاني يالسه أشربه ههههههههه، و الله يروي عقب الحر و الرطووبة .. و الرحلة الطويلة .. 

الحجرة 

ما أدري ليش كل ما أشوف هالبنكة أتذكر سب وي 

هذا أهم جزء عندي ههههههه

لعـــشــــــــاق الحمـــامـــات ههههههه 

بـــلكوووونة الغرفة .. أحس لو حر لكن الأجواء تخليكم تيلسووون برع .. 

و ممكن تأجروون فلل، كنا هني سايرين فلة عمتيه .. 

بس ما وحالي أصور الفيلة بس حلوة، و الحلو فيها، إنه فيها حوي" حوش " و حوض سباحة .. 

و الحين بحطلكم مقتطفات من الجزيرة ..

بس تعبت و أنا أنزل الصور إن شاء الله باجر بكمل و بحطلكم صـــــــــور السفـــاري أشوفكم على خير إن شاء الله ..

الرأي و الرأي الآخر في الزبالة ..

السلام عليكم .. 

أنا مستغربه من شي ليش الحين لا يتم تقبل الرأي الآخر في الوسط الديني، و المشكلة اللي يتبع المذهب المالكي يبغي يمشي الناس كلهم على المالكي و الحنبلي يبا يمشي الناس على الحنبلي.. 

وعمري ما سمعت أنه علماء المذاهب الأربعة المالكي و الشافعي و الحنبلي و الحنفي إستوت " صارت " من بينهم ضرايب، وسب و قذف، بسبب إختلاف الآراء و الكل يقدم برأيه.

 يعني مثلا  المذاهب كلها ماعدا الحنفية  أقرت على أن زواج البنت من دون ولي فهو بــاطل إستنادا إلى حديث الرسول عليه الصلاة و السلام، و لكن الحنفية قالوا يجوز الزواج من دون ولي و العقد صحيح، و ذكروا أدلة على ذلك .. !! 

لكن سمعنا إستوت مشاكل و حروب بينهم ؟؟

 لا ما سمعنا و كل واحد يحترم رأي الآخر، و كل واحد عنده الدليل ..

لكن اليــــــوم إذا واحد قال شي أو نقد فتوى بيكفرونه، و يسبونه و يلعنون أصله و يشلونه " يشيلوه " من منصبه و يسون كل شي عشان يتسكت .. 

يعني بعطيكم مثال لأنه العالم اليوم تغير مب نفس قبل الناس ما تعرف تقرأ أو تكتب .. العالم بدأ يتغير و لا تقولوولي كثرة الفتن، طبعا بتكثر الفتن لأنه محد قاعد يفهم  الناس بس قاعدين يسكتووون .. 

مثال: الشيخ عادل الكلباني يوم حلل الأغاني بشروط و قال أنا عندي الأدلة و كان يبغي أي شيخ يناقشه في الموضوع، أنا ما أدافع عن الكلباني، لكن في حد غيره بعد من قبل محلل و هو صلاح الراشد، طلع يغني بفيديو كليب و قال أتحدى المشايخ و عندي الأدلة على أن الغناء حلال لكن بشروط .. 

لكن هل سمعنا عن شيخ من الشيوخ بيقابلهم وبيقعد معاهم؟؟  اللي سمع يصلحلي المعلومة..

و على فكرة راسي دار اليوم، و على قناة دبي كنت أشوف برنامج.. مقابلين شيخ و قالوله إنه بعض المصلحين الدينييين يحطون بعض الألحان في تصوير حلقاتهم .. على أساس إنه الألحان حلال مب حرام، فالشيخ يقول لا حرام كله حرام و من فتره حطوا واحد شيخ سأله واحد إنه لما يروح الكوفي يحطون ألحان ف قاله عادي جائز .. 

المشكلة إنه المشايخ مايقوولوون إنه هنالك مذاهب حللت كذا و حرمت كذا، و صح في مذاهب حللت و مذاهب حرمت .. 

سيده " على طول " تحريم، و منهم من يسب و يلعن .. ليش؟؟

 نحنا مب جاهلين لهالدرجة ، أنا مب " مش " مع الصف الأول و لا الثاني  لكن ليش ما تذكروون الأسبـــــــاب و المشكلة إنه هذيل مشايخ اللي يتكلمون مب أي واحد يا و حرم .. !! 

و طبعا الحين اللي يعارض فتوى أي شيخ خلاص إكس عليه، نفس عمروا خالد، مسكين لا يحرم و لا يحلل،و لا يفتي  مجرد ما يسرد قصص و يحاول تغيير الأمة للأفضل..

أول شي نقدوا ملابسه، على بالهم الدين باللبس، بعدين قالوا لا وراه مقاصد و على أي غلطه فضحوه مع إنه الإنسان خطاء .. أو بيقولوون هذا موالي للإسرائيليين أو الأمريكييين بدال هالكلام إقعدوا على طاولة وحده و تناقشوا .. م إنه عمروا خالد غير واايد أشياء للأفضل .. و أن الصراحة تقربت و حبيت الدين منه هو ..

أشوف الناس كلها قدرت على الشيعة و تم الحلف على إسم الله بين شيخ سني و شيخ شيعي .. !! و بعد هالسالفة الناس سكتت، ليش مخلين الناس ماتعرف ؟؟ 

و على فكرة مب بس مفهوم الأغاني وايد مواضيع و من أبرزها نسيت إسم الشيخ السعودي لما الدول العربية كلها قالت بتقاطع المنتجات الدانماركية و حرام حد يشتريها، و هو الوحيد اللي قال لا ماتنفع المقاطعة...

 الوطن العربي شرقه و غربه نش " وقف " عليه و في الأخير تمت المقاطعة إسبوعين و سمعنا القصص الكاذبه إنه الدانمارك خسرت و من هالقصص و بعدها الكل راد على المنتجات يشتريها ..

و بارك الله في عمروا خالد و ربعه اللي ساروا " راحوا " الدانمارك يفهمووونهم الإسلام و ليش نحنا غيضنا  " عصبنا "بسبب الكاركتير .. !! لكن لو واحد من قبل قال بزور الدانمارك و بفهمهم بيقولووون حــــــرام .. 

أنا الحين اللي قاهرني ليش كل ما حد قال راي ردوا عليه بإساءه بدل لا يناقشوونه .. 

أما بخصوص الترجمة هههه حق الأخ مضيف طيران دايما يطلب بالترجمة لأنه مابيفهمش إماراتي، و الأخوة العرب ههههه 

Bio Oil

السلام عليكم 

شحالكم " إزايوكو " هههه بديت في الترجمة 

المهم حد منكم جرب هالزيت، أنا جربته من زمان ل تشققات الجسم، و ماقريت الورقه و كنت أستخدمه يوميا مرة وحده في اليوم، و ساعات أستخدمه يوم و ترك " يوم بستخدمه ويوم لا " ..  و ماشفت النتيجة و ودرته " سبته " هههههه والله الترجمه عجيبه  .. 

لكن بعد ما ودرته، إكتشفت إنه آثار التشققات خفت عن قبل، و بعدين سويت سيرج على يوتيوب عن هالزيت، وشفت كيف يستخدمونه، و إنصدمت من النتايج، و هو يحتاااااااااااااااااج صبر و شفت على جووجل و شفت بعد من كلام الناس إنه فيه نتيجة لكن يوم سويت سيرج بالعربي العرب ماشافوا أي نتيجة ما أعرف هل إٍستخدامهم غلط أو شو ما أعرف .. 

و الحين رديت أستخدمه و يحتاج على الأقل 3 أشهر و لازم أستخدمه مرتين في اليوم  عشان تطلع النتيجة وناس تبين عليهم بعد الثلاث أشهر ممكن 5 أو 9 على حسب .. بس المهم إنكم تستمرون عليه، و هو مب بس للتشققات، بعد اللي يعاني من البشرة الجافة، و يصلح للجسم كله، و للحبوب، يخفف من آثارهم و اللي يعاني من عدم توحد لون بشرة الوجه هو يعالج هالشي و أنا حتى أجربه على ويهي .. 

و الصراحة أشوفه حلو حق الويه حتى غير ملمس بشرتي .. 

و هذي النتايج 

حد إستخدم هالزيت و ممكن يفيدنا ؟

بالمصري الفصيح ..

بما إن الأستاذ " يوميات مضيف طيران " و الأخ العزيز، و المتابع لمدونتي بالرغم من صعوبة اللهجة الإماراتية و في كل مرة يحتاج ترجمة، قررت إني أترجم اللهجة هههههه .. 

و المسكين هو بيحاول إنوا يفهم لكن مفيش فايدة هههههه، مش بس إنت كتير زيك، و على فكرة موضوع " الخيبة " كتار اللي مافهموش إيه ياعني الخيبة و العسرة " العثرة " بالمصري تتحول العسرة هههههههه ... 

بس إن شاء الله حترجم كلامي مصري بعد كل موضوع أو حديلك المختصر المفيد .. 

و الله ما بتريأ عليك، لكن أنا لاحظت مش بس إنت عاوز ترجمه، غيرك كتير عاوز ترجمه هههه .. ف عشان كده حترجمه مصري، أحلى من العربي شوي تغيير .. 

إيه رأيك في لهجتي المصرية و لهجة المدونين اللي بيردوا عليه 

إزيكواا يا حباااايبي .. عاملين إيه ..