" لا تخلون كرة تفرقنا " ؟؟ نادي النصر السعودي و الوصل الإماراتي ؟؟

أنا اليووم بتكلم باللهجة الإماراتية، لأنه صدق مقهوورة و مب متفيجة أكتب بالعربية .. و أحس إنه السالفة مصخت عشان هالكرة نفترق و تبدأ المشاكل ...

إلى إستوى من كم من يوم و بالذات في تاريخ 30/3/2010م، يوم الثلاثاء.. أنا الصراحة ما شفت المبارة، لكن وصلني مسج على البلاك بيري.. يقول فيه شوفوا السعوديين شو قاعدين يقولون عن الإماراتيين .. !!و كان المنتدى يسب سب في الإماراتيين، و أنا مب عارفة شو الموووضووع و ليش يالسيين يسبوون ..

و أنا أقرا لقطت كلمة " كرة " إذكرت إنه كانت مبارة يوم الثلاثاء بينهم، لكن ما سمعت إنه إستوت ظرابه بينهم .. و قبل لا أكتب هالموضووع شفت الفيديوات و قريت ما كتب على النت و الجرايد... و إستخلصت إنه الغلط من الطرفين و ليس من طرف واحد بس..

سبب الضرابة و هو الطبيب التابع لنادي النصر السعودي أنه سوا حركة تخدش بالحياء للجمهور الإماراتي و تفل عليهم .. و مصادر تقوول ما تفل .. و بعدين بععض من الجاماهير الإماراتية يمكن حوالي العشرة .. يعني 10 من بين الآلاف هذيل ما يمثلون شعب الإمارات ..

المهم .. و إستوت السالفة و ضربوه ضرب الدكتور، و الشي الغريب انه الشرطة ما كانوا ظابطين المكان عدل .. و اللي عجبني في الموضوع قائد شرطة دبي ضاحي خلفان صرح إنه لازم يتعاقبون و يتحاكمون اللي قاموا بهالمشاكل و من بينهم رجال الشرطة الموجودين في الملعب، لأنه منهم ماكانوا يسوون شي .. و كانوا يردوون الناس للمدرج المفرووض يطلعونهم و يحققون وياهم ولا بيتمادوون ..

و من غير التوابع اللي إستوت إنه الحكم كان شديد مع الاعبين، و بالذات السعوديين و أنا شفت الحكم من حقه إنه يسوي هالشي عشان يضبط اللعب ..يعني لاعب مب طايع يشل الكرة و الثاني يدخل الملعب فمن حقه ..

هذا مب موضوعي الحين .. و أنا مب ناقصة بعد أحلل المبارة، و عشان جي ما حطيت صور للمبارة ولا جان شفتووني يالسه أحلل .. و هذا مب من إختصاصي ..

لكـــن اللي ما يعبني، إنه أخاف تنعاد قصة الإمارات و عمان.. مصر و الجزائر.. والحين ناديين الوصل و النصر السعودي .. و أقرا في الجرايد إنهم مب متقبلين الإعتذار اللي ياهم من نادي الوصل، بالرغم من إنهم قالوا الجماهير ما تفهم إنه هاي كرة .. يعني كلام متناقض .. و كلام متناقض أيضا من الطرف الإماراتي ..

لكـــن ياااااااااا عالم لين متى بنتم جذي، أذكر من زمان يوم كنا نقووول خليجنا واحد كنت صدق أحس إنه خليجنا واحد و إنشاء الله حليجنا واحد يستمر و يستمر .. !!

و نحنا كلنا إخوان ليش كرة تخرب بين شعوب و دول.. هذيلا القليل اللي مخربين السمعة لكن مب الكل، و حتى للمنتديات اللي سبوا فيها الإماراتيين فيو إبتعدوا عن النقد و إتجهوا إلى السب.. أنا دايما يوم حد يطرشلي هالأشياء أمسحه على طوول لأنه الحثالة هذيل ما يمثلون الشعب السعودي و حتى إذا طلعوا إمارتيين ما يمثلون الشعب الاماراتيين .. و أنا اتمنى إنه هالشباب اللي تهجموا على المدرب إنه ينزخوون و يسجنونهم عشان يتأدبون، حتى لو واحد صبعلك و لا تفل عليك ليش تظربه بلغ عليه و تلقى حقك عند ريولك ..




أنا بقلكم شغله، أنا قبل الصـــراحة في دولتين خليجيتين ما كانت أحبهم و بقولها بكل صراحة " الكويت و السعودية " ما كنت أعرف هالشعبين و كنت أحكم من تصرفاتهم .. لكن لما دخلت الجامعة و هالجامعة اللي كنت فيها من دول الخليج و باذات التخصص الي أنا فيه هم من هالشعبين .. ما تعرفون الحين كيف أحب و أعشق الكويت و أتمنى أزوورها و السعووديه حبيتها حب مب طبيعي ..

و إذا أي حد تكلم عن هالدوليتين ما أرضى عليهم بأي شي أحس إذا أي حد سب الكويت و لا السعودية أحس كأنه سباني أنا و حتى ساعات يقوولولي ليش جي محرجة، أقوولهم لأنه انتوا ما عاشرتووهم و تتكلمون عن دولة كاملة بسبت شخصين أو 3 شفتوهم في السوق ..

و كل الخليج أحبه و أعشقه يوم حد يقولي شو خليجنا واحد أقول في خاطري اللي مرابع من دول الخليج بيحس إنه خليجنا واحد لو إنه عاداتنا مختلفة و بالذات في الامارات في فرق لكن خليجنا واحد مب في عاداتنا لكن أفكارنا بعدها متصله ببعض .. !!

الله يخليكم .. يا أصحــــاب الكرة الخليجية و العربية لا تخلوووون كرة تكسر ما بينا و تزيد الحدود في ما بينا، نحنا كلنا إخوان .. و بنتم إخـــــــــــوان ..

أنا الحين ما أدافع عن الشعب الإماراتي لا أنا أدافع بعد عن الشعب السعودي، لأنه الكلام اللي إن قال عن الإماراتيين مب هين، لكن هذا مب كلام السعوديين هذا كلام الحثالة اللي بس جي يرمسوون بدون إستناد إلى أي شي، و المشكلة سب و ياليته ينتقد.. و أنا عشان جي ما أبا حد يقول هذيلا السعوديين هم جي ..

إذا كرة جذي تفرق بينا تولي .. و الله ما تدروون كيف مقهووورة منهم أقصد الكرة الاماراتية و السعودية الللي صارت من كم من يوووم ..

خليجنا سيقى واحد مهما إختلفت عاداتنا و تقاليدنا عن بعض، لكن فكرنا هو أننا نحن عالم واحد ..

و أنا كتبت بألوان أعلام دول الخليج .. الأحمر و الأسود و الأخضر و البنفسجي، عشان أبينلكم إنه مدونتي خليجية قلبا و قالبا ...