الاثنين، 17 مايو 2010

بلاهم الناس يفاولون على عمارهم .. ؟؟



السلام عليكم ...


بــــــــــــــــــلاهم النـــــــــــاس جي يفاولوون على عمارهم، قلنا مصخرة.. بس مب لهالدرجة توصــــل عفان الله ..


صدق يوم قال الرسول عليه الصلاة و السلام " لا تتمارضوا، فتمرضوا، فتموتوا. "


يعني إييبون حق عمارهم المـــرض..


السالفة الله يسلمكم، اليوم يوم نشيت من الرقـــاد .. وحده من ربعي مطرشه برودكاااست " بــاجر بسوي عملية في القلب دعواتكم لي أقوم بالسلامة "


أنا هني تيبست من الزياغ، قلت شو السالفة و من شو ياها القلب ما أحيدها تشكت من شي عشان إييها القلب ..!! و عكر مزاجي بكبره على الصبح ..


المهم طرشتلها مسج قلت خلني أتأكد يمكن فيها القلب بعد و أنا ما أدري.. !!


قلتلها فلانه بتسوين عملية في القلب؟ ؟؟


قالتلي هي ..


و المشكلة إنها ما ترد بسرعة



و آخر شي قلت ليش شو فيج في القلب؟؟


و ماردت و حتى قلت بتصل حق وحده من ربيعاتي كانت من كم من يوم وياها فأكيد تعرف شي ..


و ما اعرف شقى نسيت السالفة و تخيلوا ردت عليه العصر تقووولي بكل بروود ..


أبد و الله يالغالي بس غلاك يزيد

ز قلبي ما يكفي غلاك

لا تخاف عملية بسيطة

بس بوسع قلبي

لأن غلاك يزيد

و قلبي ما يكفيه غلاك ..


نعم .. !!!؟؟؟

هالوقت طلع كله إستهباااال هههههههههههه ..


تنرزفت من الخــــــــــــاطر و أنا طول هالوقت مصـــدقه و على بالي صدق و آخر شي يطلع مسج سخــيف، المهم أنا هزبتها شوي و لو كانت عدالي جان خلاص سطعتها هههههههههه ... !!!


ما أعرف شو سالفة العالم بيمووتوون على هالمسجات، يزيغون الناااااس على الفاضي ..


لا و اللي قهرني من زمان بعد أذكر هالمسج اللي يوصل و الله فلانة توفت .. و آخر شي يطلع شي ثاني ..

ربيعتي تخبرني اليووووم، إنها كانت طالعه و سايره واحد من المراكز ووصلها مسج من وحده عن هالشي إنها توفت و ما أعرف شو .. و هي صدقت على بالها ريلها مطرش هالمسج، بس زين إنها كملته و طلع شي ما يخصه.. ولا جااان سوت مناااااااحه في المركز هههههههه .. !! بس ربيعتي بعد ما قصرت إتصلت فيها و عطتها كم من كلمة عدله .. !!


و الله لوووووووووعت جبد شوووها .. أنا لو كنت برع و طالعه بتخترب سيرتي و مزاجي بيخترب يوم كامل و بتم طول اليوم بتنرفز .. صدق ناس فاضية ...


ليكووون حد منكم شرات هذيلا هههههههه ..

هناك 17 تعليقًا:

  1. الصراحه حركه سخيفه

    اشوه ما صارت فيني

    هالسوالف مافيها غشمره

    ردحذف
  2. جااات سليمه!
    ماعليه ساعات تسبق أفعالنا نفكيرنا...الحمدلله دامكم بخير! :)

    ردحذف
  3. شاي الضحى..

    إلا مب سخيفة، إلا قمة السخافة .. ياليتها كله كاتبتنه في مسج وااحد المشكلة مجزئتنه ههههههه ..
    الحمد الله إنها ما صارت و الله لوعت جبد بالذات يوم تكونين طالعه ..
    ========================================

    Seema*

    الحمد الله سليمة، و صح ساعات الأفعال تسبق الأفكار، فيد حدود معينه، يعني مثلا لو كانت مغيظة محرجة فيها شي تقول كلام من دون ما تفكر.. !! لكن مب في هالشي مخلتني ساعات زايغه .. !!
    و الحمد الله حمدا كثيرا كلنا بخير .. و الله يبعد هالأمراض من دروبنا ..

    ردحذف
  4. ناس باااااااااااايخه بصراحه

    يعني الضحك مسموح و شي جميل بس هم الضحك له حدود

    في ناس مالهم حدود و يمصخونها

    وكله في سبيل الضحك

    الله يكفينا شرهم و يحمينا من الامراض و يغفر لنا و يحسن خاتمتنا هذا اهم شي

    ردحذف
  5. يا حبي للغة الامراتيين ..
    "نشيت من الرقاد" = قعدت من النوم


    بس ،،

    ردحذف
  6. ههههههههههههه

    هذا الله يسلمك نتيجه دراستنا لقصة الراعي والذئب

    تدرين وش اخرتها^^

    اخرتها ام قلب هذي صج بيجيها مرض القلب وبتدز لكم مسجات
    ولااحد راح يعطيها وجه^^

    واللي تقول ماتت تاليها صج بتموت
    وبعد محد راح يحضر جنازتها يحسبونها تستهبل^^

    واخرتها الذيب ياكل الغنم

    واهل القريه يضحكون يحسبون الراعي يستهبل

    بس الراعي يستاهل هذي نهاية كذبه واستهباله^^

    ردحذف
  7. فيلسوف ..

    إلا هب نــاس بايخه من الخاطر .. ينرفزوون .. بس عشان الضحك و المصخرة ..

    اللهم آمين و يعافي الكل يارب ..

    ===========================================

    ساخر
    ههههههه، أنته نشيت من الرقاد و علقت عليه ماسمعت شي بعدك .. خخخخخخخ

    ===========================================

    كريزي و الله ظحكتيني .. و كل كلامج صــح وعيبتني قصة الراعي و الذيب

    ردحذف
  8. السلام عليكم ورحمه الله:.
    هناك من يستخدم جهاز البلاك البيري في امور سلبيه كمثل هذه المسجات ولكن جهاز كالبلاك بيري يجب ان نستفيد منه وان يكون دورنا فيه بناء في نشر النصائح والقضائد والحكم والدين ولكن سبحان الله هناك دائما من يسى استخدام التقنيات..
    في الاخير نحن نقول الله لايرواي صديقتك مكروه ان شاء الله والنصيحه كانت واجبه في هذه الامور
    وهناك نقطه وهي ان الحديث اللي ذكرتيه في بدايه الموضوع حديث ضعيف ولايصح عن الرسول عليه الصلاه والسلام

    ردحذف
  9. و عليكم السلام، و ياكثرهم اللي يستخدمون البلاك بيري بس حق البرودكاست.. صح حلو البلاك بيري للتواصل، بس شو بتقوول يوم الناس بس زاختنه لعب و ما تودره من يديها موووول .. يعني أنا ما كنت أودره لكن، ما أزعج الناس بهالمساج التافهه ..

    و ياخويه و الله إستويت حتى النصايح أو الحكم ما أقراهن .. على طول إند جات .. يخلون الواحد مايبا يقرا شي ..

    و عن هالحديث و الله ما كنت أعرف انه ضعيف،بس إنته متأكد من هالمعلوومة ؟؟ لأنه عنا دكتور في الشريعة في الجامعة أذكر قال هالحديث حق البنات اللي قالولها كنا تعبانين ما رمنا نحضر الإمتحان فقالهم هالحديث، فعشان جي ما حطيت في بالي إنه ضعيـــف

    ردحذف
  10. فحديث: "لا تمارضوا فتمرضوا، ولا تحضروا قبوركم فتموتوا" لا يصح عن النبي صلى الله عليه وسلم، ونقل الألباني في السلسلة الضعيفة عن ابن حاتم أنه قال: سألت أبي عن حديث رواه عاصم بن إبراهيم الداري عن محمد بن سليمان الصغاني عن منذر بن النعمان الأفطس عن وهب بن منبه عن عبد الله بن عباس مرفوعاً بهذا الحديث. قال أبي: منكر.
    قلت -أي الألباني -: وعلته محمد بن سليمان هذا. قال الذهبي في الميزان: مجهول، والحديث الذي رواه منكر. يعني هذا. ا.هـ
    والله أعلم.

    وللمعلوميه كتاب السلسله الضعيفه للشيخ الالباني موسوعه رائعه تجمع الاحاديث الضعيفه في اجزاء والشيخ الالباني رحمه الله هو افضل من جمع الاحاديث الضعيفه والصحيحه في كتب

    ردحذف
  11. واااااااااااااي ياملقي << على قولة الكويتين :)

    صج هالحركات بايخة والمسجات من هالنوع "ثقيلة طينه" وفي ناس ما يقدرون ان في اشياء ممكن الواحد يتغشمر فيها وفي أمور مثل الصحة والعمر مو زين الواحد يفاول على عمره وايب حق نفسه المرض والهم!

    الله المستعان

    ردحذف
  12. اللي يسوي هالحركة يطيح من عيني مرة

    ردحذف
  13. للحديث بقية:-

    شكــرا.. بس تدرين أنا شاكيت في كلامك أول شي لأنه اللي قايل هالحديث دكتور عنا في الجامعة و يدرس الفقه فعشان جي ما حطيت في بالي إنه حديث ضعيف .. !! يبالي اراجع و أعرف أكثر .. و مشكور مرة ثانية ..

    ===========================================

    Engineer A

    لووول عيبتي يا ملقي ههههههه .
    و الله لوعت جبد والله هذيلا، و هالبي بي هم ششغالين عليه برودكاست، ماشي شغل.. ترا هذا هو وايدين ساعات يتغشمرون في أمووور معينة و يستويلهم .. و عاده يوم يستويلهم المره الثانية محد يصدقهم.. و شكرا يالمهندسة على مرورج ..
    ==========================================

    سارة ..

    أنا بعد، يطيحون من عيني في نفس الوقت و عقب أنسى .. !!

    ردحذف
  14. يامكثر هالمسجات والله ...اونهم يبون يعرفون غلاتهم عن الناس ..يقهرون انا كم مسج يوصلني يوم العيد جذي ..انا اللي بيوقف قلبي >< منهم

    ردحذف
  15. أم حروبي ..

    عاده يوم العيد يطرشووون هالمسجات، الصراحة ماعندهم ســــالفة .. !!! الله يعينج .. إنتي عيال لا تجيكين المسجات موووول يوم العيد خخخخخ ..

    ردحذف
  16. الحمد لله و الشكر
    جد جد فضآوه اهم شيء جذب الانتبآه
    تتنرفزين من الي كذآ مالهم دآعي

    لكن ب الاخير الحمد لله ع السلآمه

    انا عن نفسي ما اصدق شيء الا لمن اتأكد 90% > و العشره احتيآط > ككف

    انصحك لآ عاد تصدقين شيء ألا لمن تتأكدين شرآتي ع2 > يعني اني ارمس اماراتي :$

    ردحذف
  17. هههههههه لا طلعتي تعرفين ترمسين بعد هههه ..

    بس لا أنا ما أصدق بس هالمسج وصلني كأنه صدق، حتى يوم ماردت قلت يمكن بتدخل العمليات الحين ..
    بس الحين لو يوصلي أنا بموت الحين أخليهم يولووون ههههه

    ردحذف